جربت فورمة رمضان قبل كده؟؟ تمارين سهلة تنفع لشهر الصيام

لو لسة دافع اشتراك الجيم فـ بننصحك تنزل الجيم بعد الفطار وما توقفش.. ولو مافيش جيم اليومين دول، فـ لسة قدامك فرصة تظبط الفورمة خصوصًا واحنا داخلين على صيف وسفر وبحر وحاجات مهمة كتيييير!

المشكلة اللي بـ تقابل كتير مننا في رمضان، ان مُجرّد التفكير في ممارسة أي رياضة، والدنيا صيام، كافي يجيبلك “دوخة وزغللة وكرشة نفس”!، بس الدنيا أبسط من كده.. خصوصًا وان وصلة حابب يساعدك🤟

تمارين رياضية ممكن تعملها في نهار رمضان

في الحقيقة، مش كل الناس بـ تنصح بـ التمرين في نهار رمضان…

وده عشان الرياضة بـ تحتاج استهلاك مياه الجسم، والمياه طول فترة الصيام بـ تكون محدودة طبعًا.

بس فيه مُدربين لياقة بـ يقولوا إن تمارين الكارديو، ممكن نعملها في فترة الصيام عادي من الفجر لـ المغرب.

خلي بالك.. عشان ده مش معناه إنك لو لعبت شوية كارديو، في أول اليوم، يعني جريت شوية، نطيت الحبل أو لعبت كورة، إنك هـ تكمل اليوم عادي!

للأسف هـ تحس بـ تعب وعطش وحاجات كتير.

لكن عشان التمارين دي مهمة، وسهل تتلعب في فترة الصيام، فـ ممكن توفّرلها طاقة الصبح، بحيث تقدر تلعب وقت العصر أو قبل الفطار بـ ساعة مثلًا.

اشتريت حاجة رمضان؟ شوف ده عالسريع: اشتري حاجة رمضان 2021 بخصومات وتوصيل ببلاش!

تمارين رياضية بـ ننصحك تعملها بعد الفطار في رمضان 2021

مُدرب اللياقة مؤمن ماهر، له فيديو بـ يقول فيه، إنه ضد التمرين في نهار رمضان، لـ الأسباب اللي قولناها فوق☝

ووضح مؤمن إزاي ممكن نتمرن بعد الفطار، أو تحديدًا، بعد المغرب.. قالك بقى👇

• تاكل وجبة خفيفة (تمر أو تونة)، وتنزل التمرين أو تتمرن في البيت لو عندك أدوات الجيم.
• بعد الجيم ترجع تفطر عادي.. بروتينك وكربوهيدراتك وعيش حياتك.
• أهم حاجة، لازم تنام عدد ساعات كافية في يومك قبل التمرين وبعده.

إيه التمارين اللي لازم تلعبها بعد المغرب؟

• مبدئيًا كده لازم تسخن بـ شوية مشي، وكارديو.
• العب اللي تعرفه من تمارين البطن، زي: (Kick crunch – twisted crunch – hollow body hold).
• قلل من المدة اللي بـ ترفع فيها أحمال بـ تشيل حديد، أو قلل وزن وزود المدة عادي.. بس المهم اعمل حساب العضلة والمجهود وكده.
• لو معاك أحزمة كروس فيت، اعمل كام تمرينة مقاومة، عشان تشدّ جسمك.. بـ ننصح تشوف ازاي تلعبها صح من هنا.

لو عملت كل ده صح.. نضمن لك تخلّص رمضان وانت عامل أحلى فورمة.. هـ تحتاج تشتغل بس عليها شوية عشان تحددها أو تنحتها يعني💪