5 من أقوى إفيهات بيومي فؤاد احتفالًا بعيد ميلاده الـ55 🥳

بـ نحتفل النهارده بـ عيد ميلاد الفنان المصري أو الكوميديان أو “جوكر الدراما المصرية” وألقاب تانية هـ نعرفها لسة مع الأيام، وكلها متفصلة على مقاس شخص واحد هو بيومي فؤاد، واللي بـ يكمل 55 سنة، لكن بروح شابة أو أصغر من كده كمان.

بيومي فؤاد حالة فنية وعجينة إبداع سهل تشكيلها وتطويعها، علشان تناسب أي عمل بيشارك فيه، طبعًا ده مخليه اختيار أساسي من مخرجين عدد كبير من الأعمال الفنية.

لو بصينا على سنة 2020 بس، هـ نلاقي إن “الجوكر المصري” تواجد خلال نصها الأول بس في أكتر من 10 أعمال بين أفلام ومسلسلات، منها اللي اتعرض ومنها اللي متأجل أو تحت الإعداد بسبب أزمة كورونا دي.

لو اعتبرنا إن أول خطوة لـ بيومي في التمثيل كانت سنة 2003، فهو من وقتها لحد دلوقتي قدر يجمع رصيد فني وصلت قيمته لأكتر من 200 (فيلم ومسلسل ومسرحية).

ومن بداية معرفة الجمهور بيه، ورغم ظهوره في أكتر من حاجة في نفس التوقيتات، إلا إنه محافظ على الإفيه الطازة بالسمسم، واللي عمره ما بـ يتحرق، لذلك مش بيفشل أبدًا في خطف “السوكسيه”.

اقرأ أيضًا: جاليري كوميك عادل امام.. زعيم الكوميديا في السينما المصرية

في الجاي هـ نعرض لأبرز 5 من أقوى إفيهات بيومي فؤاد “الجوكر” احتفالًا بعيد ميلاده 🎂:

كوميكس بيومي فؤاد من “الكبير أوي”

ده واحد من أشهر وأحلى إفيهات بيومي فؤاد في المسلسل الكوميدي “الكبير أوي” اللي شارك فيه مع الفنان الكبير أحمد مكي في أكتر من موسم.

شخصية دكتور ربيع أصلا كانت طبيعية وخفيفة لأقصى درجة وحتى الإفيه كان بـ يخرج مش متكلف إطلاقًا، رغم إن الدور بسيط بس بيومي قدر يعمل منه حاجة تفضل الناس فاكراها العمر كله.

مشهد إصابة أشرف ده كمان من المشاهد اللي ممكن تتفرج عليها أكتر من 5 مرات في اليوم، وكل مرة هتضحك كأنها أول مرة عادي جدًا.

محدش ينكر إن وجود مكي وحسين أبو حجاج كان له تأثير جامد، وهما اللي كانوا بيفرشوا صح لكل إفيه بيقوله بيومي فؤاد.

اقرأ أيضًا: عبلة كامل: أشهر قفشات “ملكة كوميكس” السوشيال ميديا

إفيهات بيومي فؤاد في فيلم “الكويسين”

طبعًا بيومي فؤاد في فيلم “الكويسين” كان عامل شغل نقدر نقول عليه “عالي أوي”، بس أشهر إفيه بـ نفتكره من الفيلم ده هو “لطيف يابني احنا بعااد أوي” أو “احنا بعاد أوي يا لطيف” 😂.

أقوى إفيه لبيومي فؤاد من مسلسل “الواد سيد الشحات”

دور “جوكر الدراما المصرية” في المسلسل الكوميدي “الواد سيد الشحات” كان مؤثر، رغم إنه مش متصدر البطولة ولا حاجة، لكن لما تتفرج على المسلسل، تحس إنه مكنش ينفع من غير بيومي فؤاد.

وطبعًا المسلسل مليان إفيهات جامدة جدًا، بس إفيهات “ابراهيم الابيض” كانت مختلفة كده.

إفيهات بيومي فؤاد من الفيلم صاحب الاسم الأطول في التاريخ

دويتو بيومي فؤاد ومحمد ثروت في فيلم “عندما يقع الإنسان في مستنقع أفكاره” من أقوى الثنائيات الكوميدية في تاريخ السينما المصرية.

انت بـ تتفرج على ماتش “بينج بونج” من الإفيهات، بين اتنين محترفيش فـ عمر الكورة ما بتطلع أوت إطلاقًا.

وطبعًا فيه حاجات كتير مكنش ينفع نستخدمها علشان الرقابة 😅.

في النهاية، لو عجبكم الموضوع ياريت تقولونا تحت في التعليقات، ولو فيه أي إفيه تاني لـ”جوكر الدراما المصرية” بيومي فؤاد عاوزنا نضيفه في التحديثات الجاية ياريت تقولنا عليه برضه، شكرًا ليكم جدًا 🙏.