فكرة إنك تكون في علاقة متستاهلش سيئة جدًا طبعًا، بس كل شيء وارد، ولازم تعرف إن التجارب دي المفروض نعيشها علشان نتعلم منها، مش علشان تهزمنا.
اكتشاف إنك في علاقة سيئة في وقت مش متأخر، دي حاجة كويسة، ولازم تاخد قرارات حاسمة وتفكر بهدوء، علشان تقدر تنقذ الموقف.
بس ازاي تكتشف ده أصلا؟، خصوصًا إن أغلبنا مش بـ يقدر يشوف حاجات سلبية كتير في الشريك علشان ما يكونش سبب في إن العلاقة تنتهي، مثلا.
اقرأ أيضًا: 5 أسباب لـ الخيانة في العلاقات العاطفية.. اعرف ازاي تتجنبهم
في الجاي 7 علامات تعرف من خلالها انك في علاقة متستاهلش تحاول علشانها:
الاهتمام قل.. ومبقاش فيه وقت لك في العلاقة
أول حاجة ممكن تأكدلك إن العلاقة اللي انت فيها لازم توقف، وانك مع حد سيء وميستاهلش، لما تحس إنه حط العلاقة في منطقة “البريك” بدون مقدمات.
الكلام ده بـ يظهر في قلة الاهتمام المبالغ فيه، وكمان لما تلاقي إن شريكك بـ يقدم حجج وأعذار دايمًا إنه مش فاضي، أو مشغول جدًا لدرجة إنه مش قادر يكلمك نهائي على أي وسيلة تواصل يعني، ده غير طبعًا انك تكتشف عكس ده بالصدفة، كده الموضوع مش هـ يكون محتاج تفكير!
انت مش مجبر تغير حياتك علشان شريكك
لما بـ نحب حد بـ نحبه زي ما هو بـ عيوبه قبل مميزاته، فلما تلاقي انك في مراحل متقدمة من العلاقة مش قادر تتقبل العيوب دي، فـ تقريبًا انت مبقتش تحبه، وكذلك لو الموضوع من ناحية شريكك.
كما لو سمعت كلام كتير وإلحاح من ناحية شريكك، على تغيير حاجة معينة فيك سواء في شكلك أو لبسك أو أي من اهتماماتك، فـ اعرف وقتها إن الحب بدأ يقل وشوية وهـ ينتهي كمان من العلاقة دي.
مواضيع ذات صلة:
اقرأ أيضًا: ما علاقة كورونا بالعودة إلى الحبيب السابق؟ إليك 4 أسباب
لما تلاقي كل مكالمة بينكم تتحول لمشكلة.. اعرف انك في علاقة متستاهلش
العقل بـ يقول إن دي اسمها علاقة حب، يعني الطرفين فيها بـ يتمنوا يسعدوا بعض ويعيشوا حياة هادية ورومانسية لطيفة، لكن لما العلاقة تتحول لعكس كده يبقى انت في مرحلة خطر.
لو بقيت تخاف تتكلم مع شريكك علشان عارف إن الكلام هـ يدخل في جدال ومناقشات كلها مشاكل، يبقى العلاقة دي لازم تنتهي فورًا.
معادلة الأخذ والعطاء في العلاقة بقى فيها خلل
حسابيًا، فإن أي علاقة في الدنيا لازم تكون معادلتها متكافئة، يعني اللي أي طرف بـ يعطيه لازم يكون بـ يتردله؛ لأن مفيش بشر يتحمل يكون “مانح” بس.
لما تلاقي لا مبالاة من ناحية شريكك بكل الاهتمام اللي بـ تقدمه له، فـ انت فعليًا في علاقة متستاهلش تحاول علشان تنفذها، وشوف حد يقدر مشاعرك أكتر.
الملل قاتل العلاقات مهما كانت سعيدة
مش كل في حياتك العاطفية هـ يكون فيلم رومانسي جديد، لكن مينفعش أي طرف يحس بالملل في العلاقة، بسبب روتين معين حتى لو كان سعيد شوية.
اللي عليك في العلاقة إنك تجرب توزنها، تعمل شيء من التجديد، ولو الأمور ما اتحسنتش، ومافيش تقبل أو رضى عمومًا، يبقى في الوقت ده توقف أحسن.
انت طلعت مركون على الرف
الاهتمام طبعًا هو الحكم الرئيسي على مدى نجاح العلاقة، ممكن يقل شوية، بس مايتلغيش، ما بالك لما تكتشف إنك في قايمة أولوياتك شريكك أصلا!
لو طلعت مركون على الرف، فـ لازم تعرف إن العلاقة دي متستاهلش تضحي علشانها بأي حاجة.
العلاقة اللي انت فيها بقت سبب حزنك
من أهم شروط العلاقة السعادة، وطبعًا دي مش بـ تكون موجودة إلا لو فيه حب وبـ زواله بـ تزول كل حاجة حلوة.
فـ لو حسيت في أي وقت إن العلاقة بقت سبب في حزنك، وكلها مشاكل، يبقى كل مجهود بـ تعمله من أجل إنقاذها عديم القيمة.
Comments
Loading…