مافيش سينما في العيد.. اعرف أحسن أفلام ممكن تشوفها مع عيلتك

العيد السنة دي مختلف تمامًا عن أي عيد قبل كده، خصوصًا مع تفعيل إجراءات حظر التجوال ومد ساعتها خلال فترة العيد، وكمان الخروجة الرسمية للعيد اتلغت لأن مبقاش فيه سينما في العيد ولا حتى حفلات ولا أي حاجة.

ممكن تعويض ده بالمسرحيات أو الأفلام اللي بـ تتعرض على التلفزيون، ولو حابب تجدد ممكن تتفرج أون لاين مع عيلتك.

اقرأ أيضًا: 5 افلام تنبأت بكورونا.. الرابع يحكي ما نعيشه الآن

جمعنالك 10 أفلام جديدة، مصري والأجنبي مناسبين لجو العيد ولمة العيلة في البيت:

فيلم سواح – كريم قاسم

فيلم “سواح” للفنان كريم قاسم هو أول ترشيح من “وصلة فيد” لأفلام سينما في العيد؛ وأسباب ده كتير، أولها إن الفيلم جديد ولسة متعرضش في مصر، وكمان هو متصنف “كوميدي – دراما” فمناسب لجو العيلة.

الفيلم بيحكي عن شاب اسمه “سكآراب” بـ يشتغل “دي جي” في مصر، بـ تجيله دعوة للمشاركة في حفل موسيقي كبير في العاصمة البلجيكية “بروكسل”، وبـ تحصل لخبطة وبـ يلاقي نفسه في “لوكسمبورج” بدل “بلجيكا”، وحاجات كتير لازم تشوف الفيلم علشان تستمتع بها.

الفيل الأزرق – كريم عبد العزيز

سلسلة “الفيل الأزرق” للفنان كريم عبد العزيز، من أفضل الأفلام اللي فيها مشاعر مختلطة بين التشويق والرعب والإثارة، مناسب للعيلة لو كلكم بـ تحبوا النوع ده، ولو مش بـ تحبوه، جربوا يمكن يعجبكوا أو أكيد هـ يعجبكوا.

الفيلم بـ يحكي عن قصة الدكتور “يحيى” اللي شغال في مجال الطب النفسي، بمستشفى “العباسية”، بـ يقابل مرضى نفسيين قريبيين منه، أو يعرفوه بـ طريقة ما، ومنهم دكتور “شريف الكردي” صاحبه أصلا، وبـ يكتشف أسرار كتير كده كلها إثارة وتشويق، وفيها “تاتش” رعب.

اقرأ أيضًا: الافلام الـ10 الأعلى إيرادًا في مصر والعالم خلال 10 سنوات.. بنستقبل 2020

بلال: بطل من فصيل جديد – أنيميشن سعودي

فيلم “بلال” من الأفلام اللي لازم تيجي في الترشيحات الأولى لأفلام سينما العيد، اللي ممكن تشوفها مع العيلة، خصوصًا لو من هواة الأعمال التاريخية.

الفيلم بـ يحكي عن قصة “بلال بن رباح”، الصبي الصغير اللي اتخطف من الحبشة ووصل أرض الجزيرة العربية مع أخيه، ورحلته في التحرر من العبودية، حتى وصل لكونه أول مؤذن في الإسلام.

فيلم إكس لارج – أحمد حلمي

رغم إن فيلم “إكس لارج” للفنان أحمد حلمي، قديم شوية، لكن هـ يفضل من أحسن الأفلام اللي ممكن تغير مزاجك، ومناسب فعلا لقعدة سينما منزلية عائلية في العيد كلها ضحك وفرفشة.

وطبعًا الفيلم بـ يحكي عن قصة الرسام “مجدي” اللي بـ يعاني من مشاكل كتير بسبب زيادة وزنه، وأهم مشكلة واجهها كانت محاولة الارتباط الفاشلة اللي وقع فيها بسبب جسمه.

فيلم ليل خارجي – كريم قاسم

فيلم “ليل/خارجي” ده واحد من الأفلام اللي هـ تتبسط جدًا وانت بـ تتفرج عليه، مشاهد حلوة ودراما واقعية وبسيطة، وغير كل ده مليان تمثيل بجد، حاجة كده مفتقدينها بقالنا كتير.

الفيلم بـ تدور قصته، حوالين 3 شخصيات محورية “المخرج محمد عبد الهادي – مو”، “فتاة الليل – توتو”، “سواق التاكسي – مصطفى”، هـ تجمعهم الصدفة الغريبة، وهـ تلف بيهم الدنيا في كام ساعة وتتشقلب حياتهم، ومصيرهم كلهم يطلع مربوط ببعض، والباقي هـ تعرفه لما تتفرج.

فيلم بوشكاش – محمد سعد

أفلام محمد سعد حاجة شبه أساسية في العيد، أو كانت في فترة ما، ممكن العيد ده نحاول نسترجع الذكريات الحلوة مع واحد من أحسن أفلام محمد سعد “بوشكاش”.

الفيلم بـ يدور حول “بوشكاش محفوظ” سمسار لاعيبة الكرة، واللي الحظ بـ يلعب معاه بسبب “سلسلة”، وبعد ما تضيع أو تتسرق منه، المشاكل بـ تجري وراه.

فيلم أرنب جوجو – تايكا وايتيتي و سكارليت جوهانسون

فيلم “جوجو رابيت” أو “أرنب جوجو”، من الأفلام الكوميدية الجديدة، المناسبة لجو العيلة في العيد، وهي بـ تناقش شوية الأحداث في فترة الحرب العالمية التانية من زاوية مختلفة.

الأحداث بـ تدور حول “جوجو” الولد الصغير اللي بـ يخدم في الجيش الألماني مع “هتلر”، وبـ يكتشف إن أمه مخبية بنت في بيتهم.

فيلم Horse Girl – أليسون بري

فيلم “horse girl” من أحدث الأفلام على الساحة دلوقتي، ولطيف في ظل ان مفيش سينما في العيد ممكن تتفرجوا عليه مع بعض انت وأصحابك أو انت وعيلتك.

الفيلم متصنف دراما، وبـ تدور أحداثه حول “سارة” اللي بـ تلعب دورها “أليسون بري”، وهي الفتاة الخجولة اللي عايشة حياتها داخل روتين محدود، وفجأة الأحلام بـ تغير حياتها.

فيلم Coffee & Kareem – إد هيلمز

فيلم “Coffee & Kareem” من الأفلام الجديدة اللي بـ نرشحها بقوة إنك تشوفها ضمن افلام السينما في العيد، وكمان الفيلم “أكشن – كوميدي” يعني مناسب 100% تشوفه مع العيلة.

أحداث الفيلم بـ تدور حول ضابط الشرطة “جيمس كوفي” اللي بـ يدخل في علاقة جديدة مع “فانيسا مانينج”، في حين إن ابنها كريم 12 سنة، بـ يخطط لفعل كل شيء علشان يبعده عن أمه.

فيلم Despicable Me – أنيميشن

ده واحد من أفلام الكارتون والرسوم المتحركة المفضل عند ناس كتير، وهـ يكون لطيف لو اتفرجتم على أجزاءه خلال أي سهرة من سهرات العيد.

أحداث الفيلم بـ تدور حول مجموعة بنات بـ يحاولوا اقناع المجرم “جرو” إنه يعيد النظر في خطته لسرقة القمر، اللي كان بـ يخططلها علشان يبقى “نمبر وان” في عالم الجريمة.