الاحتفال بالعيد السنة دي هـ يكون مختلف عن كل السنين اللي فاتت، وطبعًا ده بسبب إن احنا في ظروف حجر صحي وحظر تجوال خلال أسبوع العيد، علشان نحمي نفسنا وأهلنا وحبايبنا من انتشار فيروس كورونا.
اتعودنا إن العيد فرحة ولعب وخروجات، وحاجات كتير، أكيد بـ نتأثر ونزعل لما نفتكر ده دلوقتي، خصوصًا إن “سعد نبيهة” مش هـ يقدر يتواجد العيد ده لالتزامه بإجراءات السلامة والحجر المنزلي.
بس محتاجين نعرف إن الموضوع في إيدينا برضه، الفرحة السنة دي مش هـ تجلينا، إحنا اللي هـ نروح نجيبها ونعقمها وندخلها البيت، هي والأستاذ سعد كمان.
شاهد أيضًا: (لعشاق المتعة) أفضل أفلام الغموض على نتفليكس
في الجاي 6 طُرق لـ الاحتفال بالعيد في زمن كورونا والحجر الصحي.. هـ نفرح يعني هـ نفرح:
يا كحك العيد يا بسكويت
العيد الصغير أو عيد الفطر، اللي احنا سميناه عيد الكحك والبسكويت أصلا علشان دي أبرز علامات الفرح، أو عيد الفلوس أحيانًا، بالنسبة للناس اللي أهاليهم كانت بـ تضحك عليهم علشان يوفروا “عيدية” العيد الكبير.
بما إن فرحة العيد بـ تكمن في الحلويات الجميلة دي، فـ دي أول طريقة للفرحة السنة دي، لمة العيلة مع الأطفال كده وعمل كحك العيد في البيت على أنغام الأغاني المبهجة سواء أغنية الست أم كلثوم “يا ليلة العيد” أو أغنية الفنانة صفاء أبو السعود “العيد فرحة”، أظن كده فل أوي، نفرح بقى 😍.
هـ نصلي العيد وهـ نلبس جديد
صلاة العيد من الحاجات اللي مش بـ نقدر نحس العيد من غيرها، بس السنة دي مفيش صلاة في الساحات أو المساجد، للأسف 😥.
اقرأ أيضًا: صلاة العيد في زمن الكورونا.. الأزهر يحسم الجدل
مواضيع ذات صلة:
بس ممكن نعوض ده بإن كل أسرة تجمع نفسها ويصحوا يلبسوا لبسهم الجديد ويشغلوا التكبيرات عادي خالص، ووقت الصلاة يصلوا في البيت، مش نفس الإحساس بس دي طريقة علشان نحاول نبسط نفسنا 😄.
لمّة فطار أول يوم العيد
لمّة الفطار بعد صلاة العيد، دي حاجة اتعودنا عليها وكل عيلة ولها طريقتها فيها، من حيث أكل معين لازم يكلوه كل سنة في فطار أول يوم، أو اللمة في البيت الكبير للعيلة مع الجد والجدة، سهل نعمل ده السنة دي ونحاول نفرح أولادنا.
ولو حابين فطار السنة دي يكون مختلف ممكن تجربوا ده، بس بعد ما تاخدوا رأي الأولاد، علشان تعملوا حاجة تعجب الكل، وماحدش يزعل.
ألعاب العيد
ممكن كمان نقضيها رقص وتنطيط ولعب في البيت مع بعض، هـ نبهدل الدنيا شوية، وممكن ماما تهزأنا بس كله يهون علشان الفرحة، أو ممكن على سطح البيت بقى.
ممكن نلعب بـ مسدسات المية، ونكون فرق مثلا وكل فريق معاه مسدسات بنفس اللون، حاجة بسيطة بس هـ تفرق وهـ تفرحنا جدًا.
كمان ممكن نلعب بالبلالين زي زمان، أو نشوف حد فنان في العيلة ونخليه يرسم على وشوشنا حاجات بـ نحبها، أو شخصيات كارتون ونمثل مع بعض قصة حلوة كده، ونطلع المواهب المدفونة.
نتفرج على أفلام ومسرحيات العيد
طبعًا مفيش خروجات ولا سينما ولا مسرح العيد ده، بس في بديل طبعًا، قنوات كتير على التلفزيون بـ تعرض المسرحيات القديمة والأفلام المناسبة لجو العيد، ممكن نتلم كلنا ونقعد نتفرج.
وممكن نحاول نظبط قايمة أفلام ممكن نشوفها أون لاين، في سهرة فشار وحلويات وعصاير حلوة كده، وعلشان نسهل عليك ده، جمعنالك القايمة هنا.
حفلات الشوي في العيد
فكرة حفلات الشوي من الحاجات الحلوة جدًا، واللي ممكن نعملها بكل بساطة في البلكونة أو على سطح البيت، ونخلي الكل يشارك في الموضوع، حد يكون بـ يساعد ماما في تتبيل الفراخ أو اللحمة، وحد بـ يساعد بابا على الشواية.
لو معندكمش شواية، ممكن تشتروا من أي محل أدوات منزلية، وسعرها بـ يبدأ من 70 جنيه تقريبًا.
Comments
Loading…