كوميكس السقا تتصدر السوشيال ميديا.. شوف بيقولوا ايه 👀

كوميكس السقا اللي بتتكلم عن جدعنته الزيادة بقت حديث الناس على السوشيال ميديا، والضجة دي حصلت طبعًا بعد ظهور السقا خلال موسم رمضان 2020 ببرنامج “اغلب السقا”، واللي بيستقبل فيه الفنانين، وبيدخل معاهم في منافسات وتحديات كتير.

كالعادة أحمد السقا طول الوقت بيحاول يوضح قد إيه هو جدع جدًا، ومتربي على الأصول لأقصى درجة، وده عن طريق كلامه الكتير عن والده الراحل، ونصايحه الكتير اللي كان بيقالهاله.

جرّب أيضًا: (كويزات).. اختبر معلومات وشوف تعرف إيه عن جدعنة احمد السقا 🎮

في الجاي هـ نستعرض شوية من كوميكس السقا ونشوف الناس بيقولوا إيه عنه على السوشيال ميديا:

كوميكس السقا: لما المدرس يتكلم عن “كان وأخواتها” والسقا موجود

طبعًا السقا ميرضاش إننا نتكلم عن أي حد مش موجود، وبالتالي هو بيزعل لو المدرس جاب سيرة “كان وأخواتها”، خصوصًا إنهم ستات.

اقرأ أيضًا: جاليري كوميك عادل امام.. زعيم الكوميديا في السينما المصرية

سر كلمة “بيعتني بكام يا عشري”

طبعًا احمد السقا “فخر الجدعنة”، كان عاوز يعرف العشري باعه بكام علشان يحاسب هو، وكمان يموت مرتاح إن صاحبه قبض فلوس حلوة.

رد فعل السقا لما يعرف إن فيه ناس منزلها الريأكت الجديد

السقا ممكن يضحي بنفسه ويعمل إيموجي حتى، علشان خاطر الناس اللي منزلهاش الريأكت الجديد بتاع الدعم النفسي.

جدعنة احمد السقا دي مش جديدة.. ده جدع من صغره ده

أهم حاجة لازم ناخد بالنا منها، إن الجدعنة دي صفة أصيلة في السقا، ومعاه من زماااان.

اقرأ أيضًا: الإسكندرانية في الشوارع للدعاء على كورونا!

الجدعنة فيه من يوم ما اتولد.. حرفيًا

واحنا بنراجع تاريخ جدعنة السقا علشان نوثق هي من امتى بالظبط، اكتشفنا ان الجدعنة فيه من يوم ما اتولد.

ليه أحمد السقا بيدخن سيجارتين؟

عرفنا أخيرًا حل اللغز يا جماعة.. أحمد السقا بيدخن سيجارتين علشان هو جدع جدًا، وبيخاف يظلم الرئتين، فبيشرب لكل رئة سيجارة.

أحمد السقا بيسد معاك في أي موقف حتى لو ميعرفكش

لو السقا عرف في أي وقت انك محتاجله هتلاقيه جنبك لو فين مكانك، وحتى لو الأمر تطلب انه يعمل دور والدتك علشان يجي يخطبلك.. الجدعنة ↗↗↗.

احمد السقا.. شمعة تحترق من أجل الاخريين

حسنة النجم أحمد السقا اتعلمت منه الجدعنة، وبقى عندها القدرة إنها تطلع “واي فاي” لو النت فصل، حقًا هو “شمعة تحترق من أجل الآخريين”.

كوميكس السقا مختلفة.. من جدعنته ليه كوميك حزين

السقا الفنان الوحيد اللي ليه قفشات حزينة، بفضل الجدعنة والسوشيال ميديا، بعد الله عز وجل، وهنا معانا صورة للنجم احمد صلاح السقا وهو زعلان إنه عمل لقمة هنية ومكفتش 100، لأ كفت 99 بس 🤷‍♂️😥.

سبب اختفاء رقبة احمد السقا

ودي آخرة الجدعنة يا جماعة، السقا واحد طلب منه خدمة قاله: “رقبتي”، ومن ساعتها ومش لاقينها!.

*ملحوظة*

هذا المقال ساخر وهزلي وغير حقيقي، والفنان أحمد السقا نجم النجوم، وكل الناس من حبها فيه عملت الكوميكس دي، واحنا نقلناها عنهم.