في أول أيام شهر رمضان، وفي اللحظة المنتظرة وقت الفطار مع أول فاصل إعلاني، لفت نظر الناس إعلان مصطفى خاطر للشركة المصرية للاتصالات “WE”، وبعده اعلان احمد حلمي الجديد لشركة “اتصالات”.
إعلان مصطفى خاطر اللي ظهر الأول، وقبل إعلان حلمي بفرق ساعات، متنفذ بفكرة فيديوهات “تيك التوك” الطولية، وصور وفيديوهات العيلة من العزل المنزلي اللي انتشرت كتير الفترة الأخيرة على السوشيال ميديا.
بعد ظهور إعلان أحمد حلمي الجديد لـ”اتصالات” للنور، لاحظ الناس التشابه الكبير بينه وبين إعلان خاطر لـ”WE” في الفكرة، مع اختلاف بسيط في المضمون.
اقرأ أيضًا: 5 اعلانات رفضها الجمهور.. قبل اعلان ميس حمدان وقطونيل
الفكرة فكرة مين؟… هل اعلان احمد حلمي الجديد مسروق؟
بشوية تحليل بسيط، هـ نلاقي إن شركة “اتصالات” دخلت رمضان من غير إعلان رسمي، واستعانت بإعلان أحمد أمين عن “باقات سوبر كونكت” اللي هو من أسبوع تقريبًا قبل رمضان، في أول يومين تقريبًا، وحتى إنه مستمر في العرض حتى اللحظة دي.
في اليوم التاني من رمضان بدأ عرض جزء من إعلان أحمد حلمي الجديد “عادي أهو”، وبعد كده ظهرت النسخة الكاملة للإعلان، واللي جات شبيهة جدًا بإعلان مصطفى خاطر، بفارق إن الأخير كان وسط عيلته، وحلمي كان لوحده.
أوجه التشابه بين إعلان مصطفى خاطر واعلان احمد حلمي الجديد
1- المطبخ والأكل المحروق
تشابه اعلان مصطفى خاطر مع اعلان احمد حلمي في مشهد المطبخ، والأكلات الكتير اللي بتتعمل في فترة العزل الصحي، والتجارب اللي بتفشل والأكل يتحرق.
2- الأنشطة المنزلية في الصالة
ظهر في الإعلانين تشابه في الأنشطة المنزلية اللي بيقوموا بها في فترة العزل الصحي، بس في إعلان مصطفى خاطر كانت شوية تمارين رياضية في الصالة، وفي إعلان حلمي كانت التجديف بالكاياك في الصالة برضه.
3- فلاتر السوشيال ميديا
مواضيع ذات صلة:
الإعلانين اعتمدوا على استخدام فلاتر “تيك توك” والسوشيال ميديا، سواءً في تكرار الأشخاص، أو تغيير ملامح الوجه.
4- مشاهدة المسلسلات
اعلان مصطفى خاطر اتكلم عن مشاهدة المسلسلات مع العيلة، لكن في اعلان حلمي وبما إنه كان لوحده، فكان رفيقه هو الأكل وتحديدًا الكنافة.
5- البلكونة
مشهد البلكونة اللي بدأ به إعلان مصطفى خاطر لشركة المصرية للاتصالات “WE”، استخدمته “اتصالات” في إعلان حلمي لكن في الاخر، بس بـ نفس التوظيف.
6- الحلاقة
مشهد الحلاقة في المنزل ظهر في إعلان مصطفى خاطر، واتنفذ بطريقة مختلفة شوية في إعلان حلمي، بس هي نفس الفكرة.
7- اللايف مع الصحاب
بما إن فكرة الإعلانين متشابهة، وواخدة زاوية السوشيال ميديا والعزل الصحي، كان لازم مشهد زي ده يكون واحد من أوجه التشابه بينهم، مصطفى خاطر ظهر في أحد مشاهد الإعلان وهو بيكسر الملل بـ”فيديو كول” مع صحابه، وكذلك حلمي في اعلان اتصالات.
مجرد اجتهاد
في النهاية ده مجرد تحليل واجتهاد شخصي، ممكن كل ده يكون توارد أفكار بين منفذي الإعلانين، بما إننا كلنا تقريبًا بنعيش في نفس الأحداث الثابتة في إطار البيت وبس.
Comments
Loading…