مميزات الست الإسكندرانية.. اعرفها من فتاة إسكندرانية😍

كتير من المصريين بـ يشوفوا ان بنات اسكندرية مختلفين عن باقي بنات مصر.. احنا في “وصلة فيد“، قررنا نروح نسأل بنت إسكندرانية.. (ليه ناس كتير شافيين ان البنت الإسكندرانية حالة مختلفة؟!)….

وكانت دي إجابتها

رسائل البحر

كنت بـ اتفرج على فيلم “رسائل بحر” للمخرج داود عببد السيد، بطولة آسر ياسين وبسمة.. استوقفني مشهد مواجهة بين نورا (الممثلة بسمة) لزوجها في الفيلم (الممثل أحمد كمال)، و هي بتعدّد أسباب ارتباطه بيها، وهي:

(إنها الزوجة اللي في السر، الجميلة، الصغيرة في السن، الإسكندرانية)!

وقفت شوية قدام كلمة “لإسكندرانية لوهلة.. ليه الإسكندرانية اتقالت على أنها من مميزاتها؟ لا ده كمان من أهم أسباب ارتباط جوزها بيها…

بس مع شوية تركيز، هـ نلاقي فعلًا ستات إسكندرية دايمًا كان ليهم مكانة مختلفة.

“بنات بحري”

الفنان التشكيلي محمود سعيد لما قرر يرسم لوحة لمجموعة بنات من محافظة معينة، اختار بنات إسكندرية، وعمل لوحة مشهورة اسمها لوحة “بنات بحري”…

لكن ليه مافيش لوحة “بنات السمبلاوين” أو “بنات المنوفية”؟!

يا سعده وهناه اللي يعرف إسكندرانية

الست الإسكندرانية مختلفة ولها صورة خاصة بيها ومكانة بين أوساط الرجال، فـ يا سعده و هناه اللي يعرف اسكندرانية وبـ يكون “كازنوڤا” عصره بين الشلة.. بس ليه؟

أحب اقولك إن الست الإسكندرانية لها كاريزما مختلفة، وبـ تتعرف في أي محافظة تانية تكون عايشة فيها، و كأنها ست أجنبية، فـ يكون عادي إنها تـ تسمع كل شوية سؤال: “انتي إسكندرانية، صح؟!”

مواضيع ذات صلة:

طريقة كلام البنت الإسكندرانية مؤثرة جدًا.. اختلاف ألفاظها، واللهجة الإسكندراني، وهِزارها بـ يضيف لها خِفة وأنوثة.

كمان معروف عن البنت الإسكندرانية الروَقان.. و ده ناتج عن البيئة و قربها من البحر، و ده بـ يأثر عليها دايمًا، فـ غالبًا هـ تسمع صوت ضحك أينما كنت، ما تتخضّش مهما كان الصوت أو طريقة الضحك.. و ما تتهوّرش وتفتكر أي تفكير غلط، لأنك هـ تتبهدل!

جدعة وتسِد معاك

أكتر حاجة هـ تعجبك في شخصية الست الإسكندرانية إنها جدعة وتسِد معاك في أي موقف وأي زنقة، بس لو تعديت حدودك، هـ يتم إهانتك بشكل غير آدمي! لأنها بـ تتميّز بطرق ملتوية في الإهانة، يعني تقول البقاء لله في كرامة حضرتك.