fbpx

نايل بايك.. استمتع بالمشي على المياه بـ 100 جنيه

فكرة جديدة ابتكرتها الشابة المصرية مآب أحمد، علشان تجمع بين حاجتين بـ تحبهم وهما “الكاياك، والعجل” في شيء واحد وهو الـ”نايل بايك”.

الاختراع ده هـ يغير من شكل الخروجات في مصر، من القهوة وخروجات المطاعم في القاهرة، والسينمات، لحاجة جديدة مختلفة تمامًا.

أيوة إيه هي بقى النايل بايك دي اللي هـ تغير شكل الخروجات، ومكانها فين بالظبط وأسعارها.. هـ نعرف ده في الجاي: 

خروجة نايل بايك: سواقة عجل في النيل!

سعر خروجة عجل في النيل - نايل بايك

العجلة النيلية أو “النايل بايك” هي عبارة عن دراجة عادية متوصلة بـ معدات معينة، بـ تساعدها في الطفو على سطح المياه.

اقرأ أيضًا: اشهر مطاعم القاهرة.. (وسط البلد والمهندسين والمعادي) هتاكل فين النهارده؟ 🍽

الموضوع ممكن يظهر إنه غريب، وده اللي كان مخوف ناس كتير إنهم يجربوا في الأول، زي ما قال أصحاب المشروع.

بس في الحقيقة الموضوع ده متعارف عليه في دول كتير حول العالم، وهي رياضة ممتعة جدًا ووسيلة مواصلات شخصية في معظم المناطق بإيطاليا.

وعلشان الموضوع بسيط، حصل عليه إقبال من الناس اللي بـ تلاقي “الكنز في المغامرة”! وصورة من هنا على فيديو من هنا، الموضوع انتشر، وبقى ليه جماهير عريضة.

كمان سياح كتير بقى يحبوا يعملوا التجربة اللطيفة دي في مصر، لأنها مختلفة بالنسبة ليهم هنا برضو.

نايل بايك

وعادي وانت ماشي بعجلتك في النيل تلاقي ناس بـ يتصوروا سيلفي، واللي بـ يقلدوا أحمد السقا في أفريكانو، كل واحد في عالمه الخاص.

المشروع بدأ الأول في منطقة الزمالك، علشان النيل طبعًا، وعلشان تكون قريبة من هواة “الكاياك“، بقوة 3 عجلات فقط.

بس الشباب المشرفين على “نايل بايك” كانوا حريصين إنهم يخرجوا لأماكن تانية، عن طريق “إيفنتات” في الفيوم وأسوان وغيرهم.

الكامبو بارك في المنيب.. ازاي أروح لـNileBike

حديقة الكامبو بارك في المنيب

لأسباب معينة، اتنقلت الـ”نايل بايك” لإحدى النوادي الريفية في منطقة المنيب اسمه “الكامبو بارك“.

و”الكامبو بارك” هو من افضل اماكن الخروجات في القاهرة للعائلات وفيه أماكن مخصصة للأطفال.

بس فريق الدراجة النيلة بيوعد الناس إنهم هـ ينظموا “إيفنتات” تانية على مدار السنة في أماكن كتير في القاهرة والمحافظات.

وعنوان نايل بايك الجديد هو: منيل شيحه في الجيزة بعد محطة مترو المنيب.

نايل بايك: خروجة ويك إند لطيفة وعلى قد الإيد

اماكن خروجات في القاهرة

بعد كل الكلام ده طبعًا عاوز تعرف هـ تكلف كام علشان تظبط الميزانية! ما تقلقش خالص من ناحية الفلوس خد عيلته أو أصحابك وروح.

اقرأ أيضًا: كافيهات على النيل.. من الزمالك لـ المعادي 🍽

بس اتأكد الأول إنك حجزت عن طريق صفحة الفيسبوك، سعر الفرد الواحد 100 جنيه، و”الرايد” نص ساعة بس.

ومعلومة تانية المكان مش متاح فيه إلا 3 دراجات فقط، فلو إنتوا أكتر من 3 هـ تضطروا تحجزوا على مرتين أو أكتر، أو ممكن تتواصلوا مع الإدراة.