ليه المصريين أكتر شعب بيحتفل بـ”الهالووين” طول السنة؟!

في نهاية شهر أكتوبر من كل سنة، بـ يحتفل العالم بعيد الهلع أو “الهالووين” والاحتفالات بـ العيد ده بـ تكون عن طريق لبس الأزياء المرعبة ويرمز لهذا الاحتفال بثمرة اليقطين أو القرع البرتقالية اللون.

وفي الوقت اللي كل الناس بـ تحتفل بـ يوم رعب وحيد في حياتهم، المصريين مش بـ يدوله نفس الدرجة من الاهتمام العالمي ده.

شاهد أيضًا: 22 من اقوى افلام الرعب على Netflix.. ماتتفرجش لوحدك

وتقريبًا المصريين مش بـ يقدسوا العيد ده لأنه حاجة عادية بالنسبة ليهم.. طول السنة عايشين في احتفالات الهالووين: 

هالووين أول يوم دراسة

بداية العام الدراسي هو عيد هلع عن المصريين وده بيبان من الإطلالات التنكرية المرعبة للولاد والبنات، سواء بـ استايل شعر غريب، أو مكياج الجوكر.

كوميديا الهالووين في رمضان

مسلسلات رمضان المرعبة أو اللي كلها قتل ودم، دي بـ تجبرنا نحتفل بالهالووين 30 يوم كل سنة مش يوم واحد!

انتشار الزومبي في الأعياد ده في حد ذاته هالووين

في الأعياد في زومبي بـ ينتشروا في شوارع مصر بشكل رهيب! والأفعال اللي بـ يعملوها أصعب بكتير من اللي الأرواح الشريرة ممكن تعمله فينا.

بصمة الشغل.. وهالووين الخصم

كل موظف بـ يعيش حالة من الهلع كل يوم الصبح وهو بـ يعافر في الزحمة علشان يوصل الشغل بدري، لأن المرتب ما بقاش فيه حاجة تتخصم!

في مصر بـ نشتغل علشان نصرف على المواصلات

احنا عندنا في مصر المرتب بـ يخلص قبل ما الشهر يبدأ، لأن بـ حسبة بسيطة كده بـ تكتشف إنه كله رايح على المواصلات!

الهالووين و السواقين

يوميًا بـ نعيش حالة الرعب والهلع من السواق اللي مش معاه فكة، واللي ممكن يتخانق مع الزباين كأنهم السبب!

كمان قوانين السواقين الغريبة، من مظاهر الهالووين المصري اليومي، زي ان لازم 4 يركبوا ورا، وواحد ياخد اتنين قدام.

محمد رمضان وهالووين نمبر وان

محمد رمضان بقى عامل هلع لأي حد يفكر يقول اسمه، علشان ساعتها هـ نلاقيه منزل كليب تلقيح على الشخص ده.

هالووين الانترنت المصري

طبعًا الإنترنت في مصر كافي يعيشنا في الهالووين كل يوم، لأنه بـ يفصل في أي لحظة دون سابق إنذار.

أحيانًا تكون بـ تبعت ميل مهم وفجأة الانترنت يفصل، ولسة بقى حوار على ما تكلم خدمة العملاء والدايرة المفرغة بتاعة “اقفل الراوتر وافتحه تاني…”!!

الهالووين وماتشات الأهلي والزمالك

طبعًا كل مباراة قمة بين النادي الأهلي و نادي الزمالك هي رعب للطرفين.. مين اللي هـ يحاسب على المشاريب، ويلبس الحفلة!

كده ميت وكده ميت.. الهالووين والتلوث في مصر

في مصر مش هـ تقدر تهرب من التلوث، حتى لو بـ تحافظ على صحتك وبـ تاكل خضار وفاكهة علشان تبقى “هيلثي”، هـ تلاقيه مرشوش ومضر.

شاهد أيضًا: 10 افلام رعب لازم تشوفهم لو عايز تعلّي نسبة الأدرينالين

ولو بـ تاكل من الشارع أو أي أكل “مش هيلثي” فهو في الغالب معمول بـ زيوت هالكة وكلها أمراض مضرة بالصحة وتسبب الوفاة.

قصة نشأة الهالووين.. عفاريت الشتاء

فكرة الهالووين ظهرت من اعتقاد عند الأوروبيين القدماء، بظهور الأرواح الشريرة مع انتهاء الصيف وبداية الشتاء البارد.

وبالتالي كانوا بـ يحاولوا يعملوا أجواء الرعب دي، علشان يبثوا الخوف في الأشباح والشياطين، ويبعدوها عنهم، والفكرة انتشرت بعد كده في العالم كله.

وتاريخ احتفالات الهالووين بـ يقول إن بعد انتقال الموضوع لأمريكا، وبعد كده العالم كان معروف من قبل الشباب فقط.

لكن الفترة الأخيرة الأمر بقى متعارف عليه حتى بين كبار السن.