التنقل في الاسكندرية غير القاهرة.. لأنه مافيهوش تنوّع زي المواصلات العامة والخاصة في القاهرة، لكن في نفس الوقت مش صعب انك تروح من مكان لمكان في الاسكندرية، وفي زحمة أقل من اللي بـ تواجهها في القاهرة.
هـ تلاقي قدامك أنواع مختلفة من المواصلات.. من أول أوتوبيس النقل العام واللي بـ يختلف برضه حسب مُكيف ولا عادي، بنزين ولا كهربا.. أو المايكروباص، اللي اسمه في الاسكندرية “مشروع”، وهو الأكتر انتشارًا وأسهل وأسرع حاجة.. وكمان التاكسي الأصفر، وشركات أوبر وكريم.
اقرأ أيضًا: احسن مطاعم الاسكندرية اللي لازم تعدي عليها وانت هناك
لكن المميز فعلًا في مواصلات الإسكندرية هو “الترام”…
في الجاي هـ نتكلم أكتر عن ترام الاسكندرية وايه اللي بـ يميزه عن أي مواصلة عامة في مصر:
ترام الاسكندرية غير أي ترام
الإسكندرانية بـ يسموا الترام بتاعهم “الدودة”! وده لأنك عشان تركبه لازم تكون شخص صبور ومتأمل، ويفضل برضه يكون معاك وقتها ساندوتشات، و عصير، أو ميّة.
في نوعين للترام في الاسكندرية، الأزرق، والأصفر.. في اختلاف ملموس بين الاتنين.
الترام الأزرق:
أغلب اللي بـ يركبوه من الطبقة المتوسطة نوعًا ما، نظرًا لأن خطوطه بـ تمُر على مناطق تعتبر الأرقى حاليًا: (الشاطبي، الرمل، سيدي جابر، سبورتنج، سان ستيفانوا…).
وبـ يتميّز أغلب الرُكاب بصِغر سنهم، وده لأن أغلبهم شباب الجامعة، وده هـ يخليك تستعد للاستماع لكل جديد في كوكب الشباب!
وهـ يخليك تردد الجملة الشهيرة: “شباب بقى، ما احنا كنا كنا شباب…”.
الترام الأصفر:
له معالم مميزة خاصة به لوحده.. ممكن تعتبر ان أغلب اللي بـ ستخدموه من الطبقة العاملة الكادحة،وخاصةً النساء، وده لأن أمهات كتير بـ يستخدموه في انهم يروحوا السوق يشتروا احتياجاتهم من خضراوات وخلافه، واللي بعضهم بـ يجي اسكندرية كل يوم الفجر عشان السوق.
الترام الأصفر دايمًا له “ريحة” مميزة.. هي خليط بين الجبن القريش والسمك المشوي وخضراوات مبللة.
مواضيع ذات صلة:
كمان الرغي والكلام في الترام الأصفر له شكل معين.. أخبار الجيران، وقصص خاصة جدًا تـ تحكي بمنتهى الأريحية من بعض الركاب، وطبعًا لن ننسى قصص الدنيا والدين والأوضاع الاقتصادية والسياسية في وطننا الغالي…
وهنا يبدأ الأكشن بين الركاب.. كل واحد فيهم بـ يقول رأيه بتشدد.. وفي حالة كنت من المحظوظين واستخدمت الترام الأصفر في الشتاء، فـ مش هـ يفوتك فقرة انقطاع كيس البرتقال او اليوستفندي من أحد الركاب!
اقرأ أيضًا: من هو عادل شكل تريند السوشيال ميديا الذي تم القبض عليه؟
في اللحظة دي هـ تلاقي كل ركاب الترام وانت منهم، قاموا يـ جمّعوا اللي وقع من تحت الكراسي وفي كل حتة في العربية!
ايه التشابه بين الأصفر والأزرق؟
يبقى العامل المشترك بين كل من الترام الأزرق والأصفر هو الباعة المتجولين.. “أي حاجة باتنين جني، قصافة، ولاعة، محفظة، بالاتنين جني)، و المتسولين.. (والنبي اتنين جني أروّح بيهم أو آكل بيهم)، وفي شكل آخر “ممكن عشرة جني أسافر بيهم، أنا مش من هنا، ونسيت فلوسي في البلد”.
المهم انك هـ تستمتع مع ترام الاسكندرية برحلة في المحافظة، مع سكانها وعدد لا نهائي من الحواديت، وكل ده فقط و حصريًا بسعر تذكرة يتراوح بين الخمسين قرشًا و الخمسة جنيهات مع اختلاف نوع الترام طبعًا.. مع تمنايتنا لكم برحلة سعيدة
Comments
0 comments