“هنغرق كلنا” المصريون سابوا الامطار والزحمة وعملوا ميمز!

امبارح الامطار عملت دخول مفاجئ غير عادي، والموضوع كان بـ يزيد، لحد ما الشوارع غرقت واتزحمت.

ناس كانت راجعة من شغلها، والطريق أخد منها بدل الساعة اتنين وتلاتة وأكتر.. لكن كل ده ما منعش المصريين من الضحك وانهم يعلمو ميمز على السوشيال ميديا.

شاهد أيضًا: جاليري كوميك عادل امام.. زعيم الكوميديا في السينما المصرية

بطولة صلاح سالم للتجديف في مياه الامطار ⛵

دي صورة انتشرت على السوشيال ميديا، وبـ يظهر فيها نفق صلاح سالم، بعدما غرق في مياه الامطار، واتضاف عليها صور “الكاياك” كـ “تاتش” كوميدي، وفي الكابشن كتبت صاحب الصورة: “بطولة صلاح سالم للتجديف تحت سن 35 سنة”.

هجرة غير شرعية من مكرم لأول عباس

من ضمن صور كوميك اللي اتنشرت عن غرق القاهرة الليلة اللي فاتت، صورة بنشوفها في الاخبار كتير لقارب عليه مهاجرين غير شرعيين.

كتب عليها ضياء صاحب البوست: “هجرة غير شرعية من مكرم لأول عباس”.

مش هـ اجي الشغل بكرا.. علشان العوامة مفسيّة

بعد أزمة غرق الشوارع ومع استمرار نشرات الطقس من التحذير من الامطار خلال اليومين الجايين، ففي ناس قرروا ياخدوا اجازة من شغلهم.

ومن ضمن الايفيهات اللي اتقالت عن الموضوع ده: استخدام الصورة المشهورة من مسلسل “عزمي وأشجان”.

وكتب صاحب الكوميك: “معلش مش هقدر أجي الشغل بكرة علشان العوامة بتاعتي مفسية”.

بعد الامطار .. احنا في موضوع البلاعات ده مش قوي

ده واحد من البوستات اللي انتشر على السوشيال ميديا بعد أزمة المطر وغرق شوارع القاهرة امبارح بسبب أزمة البلاعات.

60 كم دي سرعة ولا عمق؟!

كـ نوع من الهزار، الناس تناولوا الاشارات اللي بـ تحدد السرعة المناسبة للسير بـ أسئلة من نوعية: “هي دي سرعة وعمق؟”.

الطريق إلى التجمع الخامس – ياريتني كنت معاهم

فيلم “الطريق إلى إيلات” كان حاضر في ميمز السوشيال ميديا اللي تناولت أزمة غرق شوارع القاهرة أمس.

وطبعًا ده يرجع لأن الشعب المصري كله ممكن يتحول في لحظة لضفادع بشرية عادي.

العاشر بقت قطعة من أوروبا

بعيدًا عن المطر ففي أماكن نزل فيها تلج امبارح وأهلها فرحوا إن مدنهم بقت شبه المدن الأوروبية، وعبروا عن ده في بوستاتهم.

على جنب ياسطى بعد كده ماليش طول

فى طول عندك فى الباب اللى قدام ؟😂#الامطار pic.twitter.com/DoaWf91DHD

— Omar Amer (@omar_amer94) October 22, 2019

صور الناس في الشارع وقت أزمة الامطار كانت كافية إنها تبقى كوميكس، زي صورة رجل الاوتوبيس مثلًا.

نص روقان الراجل ابو بسجارة ده يارب

يارب نص روقان الراجل ابو بسجارة ده يارب 😂#الامطار pic.twitter.com/rKYKpOaWDO

— Cello ViC (@RealOsama10) October 22, 2019

من أشهر الكوميكس اللي اتعملت على أزمة غرق شوارع القاهرة بالامطار امبارح.

الصورة بـ يظهر فيها احد الشوارع اللي غرقت بمياه الامطار، وتعامل الناس مع الازمة بين المخضوضين والرايقييين .

موظفين البنك وهما مروحين وقت الامطار

مسخرة
موظفين البنك الأهلي وهم مروحين#مصر_بتغرق#الأمطار pic.twitter.com/o0fUHnZgMX

— 🇳️ نــور هــانم (@Humanityyvoice) October 23, 2019

ده فيديو انتشر على “تويتر” امبارح وقت أزمة المطر، وبـ يوضح وجود شخص بـ ينقل الموظفين من البنك للرصيف على كرسي علشان ما يتغرقوش في الميه.

شاهد أيضًا: أشهر افشات افلام محمد هنيدي.. مش هتقدر تبطل ضحك

الناس وهي نازلة تاني يوم بعد الامطار

وانا رايح الجامعه انهارده .#الأمطار pic.twitter.com/iLRqRFbit3

— H_Elashry (@HamadaElashry11) October 22, 2019

الصورة دي بـ تبين حال المصريين وهما نازلين تاني يوم للجامعة والشغل بعد الامطار.