fbpx

احسن مطاعم الاسكندرية اللي لازم تعدي عليها وانت هناك

بنفكر كتير في طلعة لاسكندرية واحنا داخلين على الشتاء، وأهم حاجة في الخروجة دي هي زيارة مطاعم الاسكندرية المختلفة، دي الحاجة اللي “بـ تغسلنا من جوة”😍

جو اسكندرية في دخول الشتاء هو ساحر فعلًا…

هدوء، ومافيش زحمة، الخروجة هـ تبقى للاستمتاع بالأكل والمشيّ على الكورنيش، وفي إيدك الـ”حلبسة”، وارمي همومك في البحر بقى.

بس لو انت مخطط للخروجة دي ومش عارف ممكن تروح فين في اسكندرية، احنا هـ نقولك، تابع الجاي: 

مطاعم الاسكندرية بالنسبة للأسماك: (شعبان بتاع السمك)

احسن مطاعم الاسكندرية للاسماك
من احسن مطاعم الاسكندرية

لو انت من الناس اللي بـ تنزل اسكندرية علشان تضرب أكلة سمك محترمة، فـ ما تدورش كتير.

شعبان بتاع السمك اللي بـ يقولوا عليه” واحد من أفضل وأقدم مطاعم الاسكندرية بالنسبة لوجبات الأسماك.

الناس بـ تقول عليه إن أكله طازة، والخدمة كويسة، وكمان السمك معمول بـ صنعة، وكل ده وأسعاره كمان معقولة.

العنوان: 6 شارع كريت خلف سينما ريكس الإسكندرية.

بلبع اسكندرية لأكيلة السمك والأكل المصري (صاحي وبيلعب)

قرية بلبع للمشويات والمأكولات البحرية، من أكبر مطاعم الاسكندرية، ، وفيه ناس بـ تروحله مخصوص من كل مكان في مصر.

اقرأ أيضًا: اماكن افطار 2019.. اخترنا احسن المطاعم في القاهرة 

المطعم مشهور بجودة أكله ومستوى خدمته العالي، وتنوع الأطباق اللي بـ يقدمها، عندهم مثلا “مبمار محشي كوارع“!.

أسعار بلبع اسكندرية مقارنة بالخدمة والأكل والراحة في المكان هي أسعار عادية ومقبولة لبعض الناس، في الأول والأخر الموضوع متوقف على ميزانيتك.

اقرأ أيضًا: اشهر مطاعم القاهرة.. (وسط البلد والمهندسين والمعادي) هتاكل فين النهارده؟ 🍽

العنوان: 154 ش ملك حفنى – سيدى بشر, الاسكندرية بجوار محطة قطار سيدى بشر، ولمزيد من المعلومات اضغط هنا.

ابو ربيع بولكلى

من اشهر مطاعم الاسكندرية
مطعم ابو ربيع بولكلى

من افضل مطاعم اسكندرية في تقديم الاكلات الشعبية، عنده تشكيلة متنوعة من الفلافل والفول زي ما تحب.

بص لو نازل اسكندرية بدري ولسة ما فطرتش أو لو عاوز تتعشى عشوة حلوة قبل ما تودع البحر، و”تعود من حيث أتيت”، يبقى لازم تروح تجرب “أبو ربيع”.

العنوان: 202 ش احمد شوقى بولكلى – الاسكندرية – قريب من: امام محطة ترام بولكلى.

البان سويسرا – من معالم مطاعم الاسكندرية

بقالة ومطعم البان سويسرا

طبعًا أي حد تعرفه راح اسكندرية لازم تلاقيه بـ يحكي ويتحاكى عن جمالها وجمال مطاعم اسكندرية، وجمال البان سويسرا.

وده لأن المطعم بـ يقدم وجبات مختلفة شوية من منتجات الالبان “واضح من اسمه”، أي أكلة ممكن تتخليها داخل فيها اللبن ومشتقاته من الجن وخلافه.

العنوان: 82 شارع بورسعيد، الإبراهيمية بحري.

كبدة الفلاح – أقل من 10 سندوتشات ماينفعش

مطعم كبدة الفلاح في محطة الرمل
من اشهر محلات الكبدة في اسكندرية

بص يا سيدي لو رايح اسكندرية في الشتءا فـ انت محتاج أول ما توصل تسخن علشان تبدي اليوم، ده ازاي؟

الموضوع بسيط، مشوار لمحطة الرمل، 15 أو 20 سندوتش كبدة من الفلاح، ولو عاوز تزود زود مايهمكش، بس أهم حاجة كيس الشيبسي العائلي مع الأكل.

بعد الأكلة دي، انت مستعد تلف اسكندرية جريّ، غالبًا لو أكلت شطة كتير مع الكبدة، فـ حوَّد على أقرب محل آيس كريم يقابلك علشان تطفي النار.

اقرأ أيضًا: اماكن افطار على النيل في القاهرة.. (الزمالك – المنيل – الدقي – المعادي)

العنوان: محطة الرمل – شارع صفية زغلول ، بجانب سينما مترو.

عم زغلول بتاع الفول (أشهر مطعم في الأزاريتة ووسط اسكندرية)

معطم عم زغلول بتاع الفول في اسكندرية
عم زغلول مع الفانز

“عم زغلول بتاع الفول” أكيد سمعتها كتير أو قابلتها في بوستات على فيسبوك أو غيره، ده بقى اسم أشهر مطعم أو عربية فول في اسكندرية.

صاحب العربية هو شاب خريج هندسة، وتقريبًا كده قرر يحط نظرية جديدة في تقديم الفول والفلافل والمسقعة والذي منه.

الإقبال عليه رهيب من طلاب جامعة اسكندرية، وحتى الناس اللي بـ تزور اسكندرية من السنة للسنة.

سيرفيس عم زغلول بتاع الفول في اسكندرية
سرفيس الفول بتاع عم زغلول.. 35 جنيه

هو مكان هايل تبدأ به يومك في اسكندرية، وأسعاره على قد الإيد خالص! بس لازم يكون معاك واحد أو اتنين علشان تقدروا على السرفيس.