امتى هـ نقابل شريك الحياة المناسب ؟.. احنا يوميًا بـ نقابل ناس في حياتنا كتير جدًا، فيه منهم ناس معينة ممكن نقول عليهم “بيدخلوا القلب من غير مفتاح”، وناس تانية بـ يفضلوا واقفين على الباب.
خلينا في اللي دخلوا القلب، هل ممكن حد منهم يكون شريك مناسب لك؟ ولا هما مجرد ناس حلوين في حياتك وخلاص؟
اقرأ أيضًا: أول زواج في العالم لمصابي متلازمة داون.. (استمر ربع قرن)
ناس كتير بـ تقابل شركاء حياتهم المثاليين بطرق عشوائية وبسيطة! وأحيانًا ممكن يكون ده حد من أقرب أصدقائك، وبـ يقولوا إن العلاقات من النوع ده هي الأنجح.
في الجاي هـ نقولك على علامات لو لقيتها مع أي شخص يبقى ده هو شريك الحياة المناسب لك:
احترامك لعيوبه وهو كمان متقبل عيوبك إن ما كانش بيعتبرها مميزات
ما حدش كامل، وكل الناس فيهم عيوب وده مش بإرادتنا، بس زي ما فيه عيوب فيه مميزات.
أحيانًا هـ تقابل ناس بـ يشوفوا عيوبك دي مميزات، أو على الأقل مقدرين إنها بسيطة ومتقبلينها! وفي المقابل إنت برضه مش شايف عيوبهم أو مش مركز عليها.
في الوقت ده نقدر نقولكم “ان شاء الله.. والف الف مبروك”.
لو حسيت بالراحة مع شخص فـ ده غالبًا هو شريك الحياة المناسب ليك
الإحساس بالراحة هو الحاجة اللي بـ تحصل لا إرادي في مواقف كتير، وانت بـ تقدم في شغل أو لما بـ تقابل شخص جديد وغيرها.
مواضيع ذات صلة:
المهم إن الإحساس ده مقياس كويس للحكم على إذا كانت الحاجة دي حلوة ليك ولا لأ.
اقرأ أيضًا: افتح مواضيع مع الكراش بـ 5 طرق.. (اعرفهم قبل الـDate)
فلو قابلت شخص وحسيت بـ راحة معاه، تقريبًا الشعور هـ يكون متبادل، وغالبًا ده ممكن يكون شريك الحياة المناسب بالنسبة ليك.
وجود حاجات مشتركة بينكم مؤشر حلو قوي
دايمًا بـ نسمع ان العلاقة لازم تقوم على شخصين بـ يكملوا بعض، وبالتالي لازم يكونوا مختلفين عن بعض.
ممكن الاختلاف يكون لطيف، وإن فعلا نستغل ده كميزة واننا نكمل بعض.
بس اللطيف أكتر إن شخصياتكم تكون متشابهة، وحتى اهتماماتكم، لأن ده هـ يزود من فرص تواصلكم وتقبلكم لرأي بعض.
فـ لو لقيت الشخص اللي بـ يحب نفس المزيكا اللي بـ تحبها، ونفس الإيفيهات وكمان بـ يحب نفس نوع الكتب اللي انت بتقرأها، فـ ده يعتبر شريك مثالي فعلا.
لو بـ تتواصلوا بـ شكل معقول وبـ تحترموا خصوصيات بعض
مبدأيًا خلينا نتفق على إن الارتباط مش معناه اننا نبقى بـ نكلم بعض (24/7).. مش لازم نكون عارفين أخبار بعض بكل التفاصيل اليومية.
انكوا تسألوا عن بعض ده شيء جميل، بس مش لازم طول الوقت، ممكن حد فيكم الشغل ياخده، المفروض التاني يحترم ده.
كمان مش لازم تكونوا عاوزين تعرفوا كل حاجة، تقبلوا فكرة إن الشخص التاني فيه حاجات مش عاوز يحكيها.
لو انتوا لقيتوا الحد اللي عايش بالمبادئ دي، والحياة بالنسبة له أبسط من مكالمة تليفون أو سؤال يبقى هو ده شريك حياتك المناسب.
بتتقابلوا بشكل شبه مستمر في مكان انت بـ تحبه.. ممكن يكون بينكم شيء لطيف
الصدفة من أجمل الحاجات في أي علاقة حب، أكيد قابلت مواقف كتير أو اتحكالك من أصحابك عن حب الصدفة!
انت نفسك ممكن تكون معرضله، فيه شخص ممكن تقابله في المكان المفضل ليك أكتر من مرة.
غالبًا المكان المفضل بتاعك هو مكانه المفضل برضه، وغالبًا لو انتوا الاتنين “سينجل” فـ ممكن يكون بينكم حاجة حلوة.
الغيرة حلوة في العلاقة العاطفية.. بس تكون بالعقل برضه
لو لقيت الشخص اللي بـ يحب يشوفك فرحان في أي وقت وأي موقف، وعنده ثقة فيك كبيرة لدرجة انه مش بـ يغير مثلا، فده لطيف.
غالبًا الأزواج أو المرتبطين اللي الغيرة بـ ينهم قليلة علاقاتهم بـ تبقى أنجح! غالبًا هما بـ يكونوا بـ يحبوا بعض لدرجة انهم بـ ياخفوا الغيرة تفسد اللحظة الحلوة.
لو مافيش أنانية في أي حد فيكم فـ ده معناه انكم شركاء حياة مناسبين
الحب مش معناه الأنانية، علاقات كتير فشلت بسبب أنانية طرف من الاتنين.
والأنانية ممكن تظهر في حاجات كتير، زي انه مش محترم إنك مشغول أو انت كمان.
وممكن تكون إنه دايمًا عاوز يكون مبسوط فـ مش مقدر لحظات حزنك ومش قادر يبقى جنبك، ده عمره ما هـ يبقى شريك الحياة المناسب.
أما طبعًا لو دايمًا بـ تحبوا تشاركوا بعض كل اللحظات بـ تقدروا لحظات انشغال بعض الغير إرادية، فـ انتوا حلوين أوي كده.
ما محبة إلا بعد عداوة.. المشاكل في البداية ممكن تعمل علاقة قويّة!
المثل الشعبي ده من أصدق الأمثلة، أحيانًا لما بـ نقابل ناس لأول مرة ندب خناقة كبيرة مع بعض! والناس دي بعد كده بـ يكونوا أقرب الناس لينا.
اقرأ أيضًا: 10 رسائل حب فاشلة على واتس آب.. اعرفهم وابعد عنهم
فـ لما تقابل شخص ويحصل بينكم مشكلة أول مرة، اعرف إن ده هـ يكون الأقرب ليك، وممكن يكون أقرب من مجرد صديق.
اللي بـ يحس بيك بزيادة لدرجة إنه ممكن يتعب لو تعبت
سمعت عن وفاء الكلاب؟.. ده لو لقيته في شخص ما تسيبهوش أبدًا!
ناس كتير في حياتنا من كتر حبهم لينا، ممكن إحساسهم بينا يبقى زيادة لدرجة إنهم يزعلوا لو زعلنا ويتعبوا لو تعبنا!
الموضوع غريب شوية، بس الناس دي موجودة فعلا في الحياة، فـ دور كويس بقى علشان تلاقيهم.
Comments
Loading…