fbpx

7 حاجات تخلي أي علاقة طويلة تنتهي بعد الزواج 🤔 اعرفهم وربنا يستر 🤷‍♀️

عادةً لما بـ ندخل في علاقة طويلة من واحنا في سن صغير وتستمر سنين  بـ نحس إن ده كويس ومميز، وإنها فرصة أقوى لـ حالة حب عميقة وتـ تحول لارتباط رسمي.

الطبيعي بعد فترة من العلاقة الطويلة دي ان يحصل جواز، الحاجة اللي بـ يخططلها أي اتنين في علاقة طويلة…

لكن هل الجواز ده هـ يستمر وهيبقى ناجح؟🤷‍♂️

في الجاي هـ نتكلم على الحاجات اللي ممكن تكون سبب في انتهاء علاقة طويلة بعد الجواز: 

تحمل المسئولية صعب في السن الصغير.. وعدم الالتزام بـ يقتل العلاقة

نساء في حياة الفيشاوي
7 حاجات تخلي أي علاقة طويلة

الجواز في سن صغير مش أحسن حاجة في الدنيا وليه سلبيات كتير  👀 لأنك هـ تواجه التزامات كتير ومسئوليات صعب تـ تحملها في الوقت ده.

اقرأ أيضًا: افتح مواضيع مع الكراش بـ 5 طرق.. (اعرفهم قبل الـDate) 💑

كمان خبرتك القليلة في الحياة مش هـ تساعدك على احتواء مواقف كتير، وتفهم متطلبات شريكك المتغيرة.

غير بقى إنك في وقت ما هـ تحس إنك ربطت نفسك بدري، وساعتها ممكن تفكر تكسر الحاجز ده!.. فـ تخرج مع صحابك وتستمتع زيك زيهم، وده هـ يكون على حساب بيتك والتزاماتك، ومش هـ يكون مقبول من الطرف الآخر.

جمال البدايات خدَّاع.. والمحافظة عليه صعبة🤦‍♀️

أحمد فلوكس وهنا شيحة - 7 حاجات تخلي أي علاقة طويلة

الحنيّة المفرطة اللي بـ تكون في أول العلاقة دي، أكتر حاجة ممكن بعدين تكون سبب في انتهائها بعد الجواز😢

مافيش بشر في الدنيا قادرين إنهم يفضلوا حلوين طول الوقت، وعندهم عطاء وحنيّة… وكل الكلام الجميل ده.

لو شريك حياتك ما تقبلش المنطق ده، هـ يبقى صعب عليه يتحملك في الأوقات اللي ممكن فيها مزاجك يتغير، واللي للأسف هـ يروح بـ العلاقة لـ منطقة خطر.

فـ توقعوا إن التغيير المتكرر وارد دايمًا علشان احنا بشر، وما تخلوش جمال البدايات يخدعكم.

هل الجواز بعد علاقة طويلة ممكن ما يكونش حب حقيقي؟

الشرنوبي وسارة الطباخ
7 حاجات تخلي أي علاقة طويلة

المشكلة الكبيرة اللي بـ يقع فيها ناس كتير هيَّ الخلط بين الحب والإعجاب 🤔

هل العلاقة اللي انت فيها حب ولا إعجاب ولا مجرد ارتياح لشخص هـ يروح مع الوقت، ولا إدمان وتعود…؟

الإجابة على السؤال ده وانت في أول العلاقة أو حتى في نصها هو اللي هـ يحددلك تكمل ولا توقف حالًا علشان ما توصلش للهاوية.

في علاقات عاطفية كتير مبنية على علاقة صداقة في الأساس، ودي أكبر حاجة خدَّاعة.

التفاهم والمحبة بينكم في حالة الصداقة مش مبرر خالص إنكم تكملوا لارتباط أو جواز، إذا ما كنش بينكم حب صادق فعلًا.

الاحتياجات مُتغيّرة طول الوقت.. وطول مدة العلاقة بـ يتأثر بالتغُيرات دي

رانيا يوسف وطليقها

خلينا نكون متفقين إننا كـ بشر متغيرين طول الوقت، أفكارنا وحياتنا وشكلنا وحتى احتياجاتنا بـ تتغير.

العلاقة الطويلة بـ تواجه كل التغيرات دي بين الطرفين على طول فترتها، فـ لك أن تتخيل كمية الأعاصير والمشاكل.

كتير من المشاكل بـ تظهر أكتر بعد الجواز، بعد ما يبقى الاتنين تحت سقف واحد! عدم قدرتهم على تحمُّل التغيرات دي، واحتوائها، بـ يؤدي لانتهاء العلاقة.

الارتباط أو الجواز بهدف الاستقرار فقط.. يعتبر اختيار فاشل!

الجواز لأي سبب غير الحب الواضح، زي انك بـ تدور على الاستقرار وخلاص، أو هـ نتجوز علشان نبعد عن المشاكل، كل دي خطوات في طريق فشل العلاقة.

لو على مدار العلاقة حسيت إن فيه اختلافات بينكم مش عارفين تـ تقبلوها، فـ ما تفكروش إن الجواز هـ يكون سبب علشان تيجوا على نفسكم وتـ تعايشوا.

اقرأ أيضًا: 10 علامات بتقولك انك في علاقة هتنتهي قريب! (خد بالك) 

“اعتزل ما يؤذيك”، لأنك مش مجبر وما فيش حد مجبر على أي حاجة مش مريحة بالنسبة ليه، وعمر ما دي كانت طريقة للاستقرار.

العلاقة الطويلة مش دليل على انكم عرفتوا بعض 100%  🤔

أحمد سعد وسمية الخشاب

انتوا طول العلاقة بـ تكتشفوا بعض، بس برضه مش كل حاجة بـ تظهر أثناء الارتباط.

ناس كتير بـ تتفاجئ بصفات غريبة في شركاء حياتهم بعد الجواز، رغم ان كان بينهم علاقة طويلة جدًا، ما ظهرش فيها العيوب دي.

للأسف اكتشاف العيوب المفاجئة بعد الجواز بـ يكون صادم لدرجة إن ممكن يوصل للانفصال.

ما اختارتش صح؟!.. ابعد عن التوقعات العالية✔✔

بعد علاقة طويلة 10 سنين تقريبًا، حب إعدادي البريء، بـ يجي الطرفين بكل ثقة يقولوا “مش هـ نتجوز بقى؟!”.

الجواز هو النهاية الحلوة والوحشة في نفس الوقت لأي علاقة عاطفية بين اتنين 👀

لكن أحيانًا بـ يتفاجئ بعض الناس بعد الجواز إنهم ما اختاروش صح! وإن اللي معاهم مش الشخص المناسب!

وده سببه إنهم بـ يكونوا راسمين شكل معين للعلاقة في دماغهم، فـ لما مش بيلاقوه بـ يتصدموا، وده ناتج عن سقف التوقعات العالي للأسف 🤷‍♂️.

في النهاية بقى حاولوا دايمًا تختاروا صح من الأول، اتعلم من كل الأخطاء اللي قولناها فوق دي، وقولنا بقى:

Coming Soon
هل انت مع ولا ضد الزواج بعد العلاقات الطويلة؟