الهجرة الى امريكا.. كل اللي عايز تعرفه علشان تسافر✈✈

الهجرة الى امريكا هـ تفتح خلال أيام، وهي تعتبر حلم بالنسبة لـ ناس كتير في العالم، وكل سنة التقديم في برنامج الهجرة العشوائية بـ يكون عليه إقبال كبير جدًا، ووصل لمليون مصري، و 4 مليون عربي في السنتين اللي فاتوا.

برنامج الهجرة العشوائية لامريكا هو الطريقة الشرعية الوحيدة علشان تقدر تحقق حلمك وتعيش باستقرار في امريكا، وهو مُقدم من الخارجية الامريكية.

التقديم بـ يكون من أول أكتوبر 2019 لـ 3 نوفمبر 2013، ونتيجة القرعة بـ تطلع في مايو من السنة اللي بعدها 2020.

في الجاي هـ نتكلم بالتفصيل عن كل ما يخص الهجرة الى امريكا:

إيه هي مميزات الهجرة الى امريكا؟

طبعًا لو انت حد ما فكرتش ولا بـ تفكر في الهجرة الى امريكا فـ بالنسبة ليك مستغرب الناس اللي هتموت وتتقبل دي.

اقرأ أيضًا: شروط الهجرة الى كندا.. وكيفية الحصول على اقامة دائمة للمصريين ✈

في الحقيقة الهجرة لامريكا لها مميزات كتيرة، من أهمها هي فكرة الحصول على الجرين كارد اللي بـ يوفرلك حقوق كتير.

كمان انت بعد قبولك في الهجرة، وبعد ما تقعد 5 سنين هناك، بـ يكون من حقك طلب الحصول على الجنسية.

المهاجر الحامل الجرين كارد بـ يتم معاملته كأنه مواطن أمريكي له كل الحقوق، عدا التصويت في الانتخابات.

التقديم للهجرة العشوائية (اللوتري) – الهجرة الى امريكا

الهجرة بـ تفتح كل سنة في شهر أكتوبر، التقديم بـ يستمر لـ 30 يوم، من وقت الإعلان.

والتقديم لـ الهجر العشوائية بـ يكون من خلال موقع الخارجية الامريكية، وبـ يختاروا من كل الطلبات 140 ألف فيزا فقط على مستوى العالم، ودي عملية حظ جدًا.

كل دولة ليها حصتها الخاصة في برنامج الهجرة الى امريكا ده، على سبيل المثال، مصر بـ يتقبل منها من 4300 – 4800 على حسب الوضع كل سنة، الموضوع متغير.

بعد ما بـ تقدم خلال شهر أكتوبر، بـ تقعد تستنى النتيجة اللي بـ تطلع بعد حوالي 7 شهور تقريبًا في شهر مايو اللي بعده، فـ “كن صبورًا”، والسفر بـ يكون في نفس سنة القرعة.

التقديم في برنامج الهجرة العشوائية لامريكا مجاني تمامًا، لذا لزم التنويه.

خطوات التقديم لـ الهجرة العشوائية لأمريكا

• أول حاجة ما فيش طريقة للتقديم غير موقع الخارجية الأمريكية، القسم الخاص بالهجرة العشوائية.

• بعد كده هـ تجاوب المفروض على حوالي 14 سؤال في استمارة التقديم، خليك واضح فيهم.

• المعلومات الشخصية هتملاها زي ما هي في بطاقتك أو جواز سفرك.

• فيه دول محظور على سكانها “اللوتري” إلا في حالات اللجوء.. مصر مش منهم لا تقلق.

• تحديد انت من الدول المسموح ليها بالسفر بـ يكون بناءً على الدولة اللي انت اتولدت فيها، ممكن تكون انت من عيلة كلها من بلد زي مصر مسموح ليها بالهجر، بس حظك السيء انك اتولدت في دولة محظورة زي “إيران” أو “كوريا الشمالية” مثلا.

• المفروض انك ما تكونش حامل لأي مرض معدي، فلو كده بلاش تجاوب بالنفي، أو أجل التقديم لحد ما تنهي فترة علاجك.

• صورتك اللي هترفعها على الموقع تكون (5 في 5) على خلفية بيضاء.

• حط عنوانك زي ما في البطاقة حتى لو انت نقلت مكان تاني، هو كده كده مش مهم أوي، بس لازم يكون مكتوب.

• التقديم بـ يكون بآخر شهادة انت حصلت عليها في وقت التقديم، يعني لو بـ تقدم وانت لسة ما خلصتش جامعة يبقى التقديم بـ الشهادة الثانوية أو الدبلوم، ولو بـ تقدم وانت في الثانوية، يبقى التقديم بالإعدادية لأنها آخر شهادة أخدتها، وخلصت مراحل دراستها.

• خد سكرين شوت من كل بيانات اللي انت مسجلها في الاستمارة واحتفظ بيها لأنك هـ تحتاج تطابق الكلام ده السنة الجاية لو تم قبولك.

• فيه رقم للحجز هيطلعلك في الاخر ده تطبعه وتعمله Save ولو فيه أي طريقة تانية علشان تحفظه بيها اعملها، لأن ده هو اللي انت هتدخل بيه على السايت بعد كده في شهر مايو 2020 علشان تعرف اتقبلت ولا لأ.

شروط التقديم لـ هجرة امريكا

• أول وأهم شرط إن عمرك وانت بـ تقدم على الهجرة ما يقلش عن 18 سنة.

• لازم تكون على الأقل مؤهل متوسط.. يعني درست حوالي 12 سنة، ما يعادل الدبلوم، سواء ثانوية عامة أو صناعية وغيرهم.

• بالنسبة للمؤهلات العليا، فـ انت محتاج يكون عندك حوالي 4 سنين خبرة عملية غير سنين دراستك.

• ضروري يكون ليك موقف واضح من التجنيد.

• غير مطلوب يكون معاك لغة أو شهادة زى الايلتس او التويفل.

• أخيرًا بـ تقدر بعد توافر الشروط دي إنك تقدم في برنامج الهجرة العشوائية من خلال الموقع اللي اتكلمنا عليه فوق.

إيه بقى مميزات الجرين كارد

• اللي معاه الجرين كارد يقدر يدرس في أمريكا بأقل التكاليف.

• كمان يقدر يحصل على أي مساعدة مالية من الدولة.

• تقدر تشتغل في أي مشروع أو شركة في أمريكا ما عدا الأماكن اللي مش بـ تشغل غير أمريكان.

• حامل الجرين كارد من حقه يفتح ويدير أي مشروع صغير أو كبير داخل الولايات المتحدة.

• طبعًا لو انت معاك الجرين كارد فانت ليك حقوق في الضمان الاجتماعي والتأمين.

• تقدر تجيب أولادك وزوجتك وقرايبك يعيشوا معاك في أمريكا، وتقدر تتقدم بـ طلب الإقامة الدائمة لأولادك ومراتك فقط بشرط إن الأولاد يكونوا قاصرين.

• ومن أهم مميزات الجرين كارد، إن يكون من حقك التقدم بطلب الحصول على الجنسية الأمريكية.

تكاليف الهجرة الى امريكا

بعد التوفيق وقبولك في الهجرة، هـ تكون محتاج شوية فلوس لزوم تكاليف السفر، وده جزئين:

الجزء الأول: اجراءات الفيزا والأوراق وحجز تذكرة الطيران، هـ يكلف الشخص الواحد حوالي 25 ألف جنيه مصري.

اقرأ أيضًا: دول تدفع لك مقابل العيش فيها اجمع هدومك وسافر

الجزء الثاني: لازم يكون معاك مبلغ كافي يعيشك في أمريكا لمدة شهرين مثلًا بعد السفر، لحد ما تلاقي شغل، لأن العيشة هناك غالية، غير مصر خالص.