fbpx

أهم 10 اغانى افراح شعبى في مصر🎶 اعرفهم وعليّ الكاسيت🔊

الافراح الشعبية في مصر حاجة شبه تراث يتوارثه الأجيال، حتى نوع المزيكا المستخدم بتكون عبارة عن اغانى افراح شعبى ليها طابع خاص.

وعلى مر الزمن ورغم التطور إلا أن الأفراح الشعبية محافظة على وجودها وشكلها وروحها وواجبها.

في عوامل كتير بـ تأثر على ظهور الفرح الشعبي بشكله المتعارف عليه، وهي انه مثلا:
  • في أغلب الأحوال بـ يتعمل في الشارع، وسط لمة العيلة والجيران والصحاب، وشرط أساسي وجود الواجب فيه.
  • الواجب في الفرح الشعبي بـ يكون عبارة عن أنواع مختلفة من “الكيف”🤔، وده بـ يتطلب أنواع مناسبة من المزيكا.
لو عندك فرح قريب دي “ليستة” بـ أشهر اغانى شعبى افراح مصرية لموسم صيف 2019 .. جهز البلاي ليست:

1 أسماء الله الحسنى – هشام عباس (مش أغنية بس من أهم طقوس الفرح)✔✔

خلينا نكون متفقين ان أسماء الله الحسنى هي أهم طقوس أي فرح مصري، رغم انها مش أغنية مثلا، بس هي مرتبطة مع المصريين بإنها وسيلة لإحلال البركة.

في الأفراح الشعبي، أسماء الله الحسنى بـ تشتغل بدري شوية، من أول ما بتاع “الدي جي” يوصل، كأنه بـ يبخر بيها الشارع.

بعد كده بـ تبدأ وصلة من كوكتيلات الأغاني الشعبية المتنوعة بين المهرجانات وغيرها.

2 أغنية العريس وصل “تييت” – سعد الصغير

أشهر اغاني افراح شعبي في مصر، وبـ تشتغل دايمًا مع وصول العريس والعروسة إلى أرض الفرح.

الأغنية للمغني الشعبي المعروف سعد الصغير، وبـ تتميز بـ مزيكتها المختلفة والعالية وتداخل الإيقاع مع المزمار، اللي بـ يعتبروا أهم أدوات الغناء الشعبي.

3 ولا واحد ولا مية – حكيم

حكيم هو واحد من أيقونات الأغنية الشعبية المعبرة عن الفرحة، لازم في أي فرح شعبي يكون متواجد سواء بـ شخصه أو حتى بـ صوته بس.

ورغم إن أغنية ولا واحد ولا مية قديمة، إلا إنها واحدة من الأغاني اللي بـ تضيف البهجة في الأفراح الشعبية إلى الآن.

4 آه يا قلبي – حكيم

“آه يا قلبي” من اهم اغاني افراح شعبي في مصر، ورغم إن كلمتها ممكن لو سمعتها في جو هادي وحللتها هتلاقيها مش مناسبة للفرح.

شاهد أيضًا:انواع الناس في الافراح المصرية🎶🎶 انت مين فيهم؟🤔

بس للأسف الناس اتعودت تشغلها في الأفراح علشان المزيكا بتاعتها بـ تجبرك انك ترقص.

5 هـ تجوز – سعد الصغير

من وقت ظهور الأغنية في فيلم “لخمة راس” سنة 2006، وهي مش بـ تفارق الفرح الشعبي، وحتى الأفراح اللي مش شعبي أحيانًا.

“هتجوز” وغيرها من أغاني سعد الصغير، هي اتسجلت مخصوص علشان تشتغل في الأفراح ويمكن ده اللي مساعد انها تفضل عايشة لحد دلوقتي، رغم ظهور أشكال جديدة من الغنا.

6 مزمار شعبي – محمد عبد السلام (مدير مستشفى الحظ)

في السنين الأخيرة ظهر واحد من مشاهير الافراح الشعبية وانضم لقايمة اغاني افراح شعبي، بـ مزيكا معتمدة عن نوع المزمار الشعبي المعروف بس بشكل جديد، هو محمد عبد السلام الشهير بـ “عبّسلام”.

الناس اللي مهتمين بالأغاني الشعبي ومحبين “عبّسلام” بيقولوا عليه “مدير مستشفى الحظ“.

وكلمة “حظ”، أطلقت على الأفراح الشعبي من زمن قديم، لأنها كانت مصدر رزق للناس عن طريقة “النقطة”.

والمفروض المطرب اللي في الفرح يجذب الناس علشان يجو يـ “نقطوا” وبـ كده يبقى جلب الحظ لأصحاب الفرح.

7 يا بحر ياه – وائل الغمراوي

من الحاجات المشهورة بيها الأفراح الشعبية نوع من الأغاني اسمه “الموال”، وده بيبدأ بكلمات فيها عبر أو رسايل مع مزيكا أو مزمار هادي.

وبعد كده بـ يحصل تغيير مفاجئ كده والمزيكا بـ تعلى وتخلي أي حد يرقص لوحده، النوع ده مناسب جدًا للدماغ المتكيّفة.

8 الكيف – كايروكي

أغنية “الكيف” لفريق “كايروكي” اللي انتجوها سنة 2017، بقت من الأغاني المهمّة اللي بـ تشتغل في الأجواء الشعبية عمومًا.

وده ممكن لأنها شبه أغاني الموال، ويمكن علشان مثلًا بـ يغني فيها واحد من أهم المطربين الشعبيين اللي هو “طارق الشيخ“.

9 أغنية بونبوناية – محمود الليثي (من أهم اغانى افراح شعبى في مصر)

“بونبوناية” من الأغاني الشعبية المهمّة واللي لازم تشتغل في أي فرح شعبي أو حتى غير شعبي في الكام سنة الأخيرة.

شاهد أيضًا: 16 اغنية من اشهر اغانى افراح مصر لموسم صيف 2019

الأغنية للمطرب الشعبي محمود الليثي، وبـ تشاركه فيها الراقصة “صوفينار”.

10 حلاوة روح – حكيم

“حلاوة روح” من أغاني الختام في أي فرح شعبي، تحس ان الفرح ماشي من الأول للاخر مع الدماغ المعمولة.

في الأول بـ تسخن بالأغاني المفرفشة وفي الآخر بـ يبقى الجسم عاوز يرتاح والـ”أوفرثينكج” بـ يشتغل لأن الساعة بـ تكون عدت 12، فالدماغ بـ تطلب حاجة حزايني كده.