في عيد الاضحى دي حاجات أرجوك ما تعملهاش علشان ربنا يكرمك

كلها ساعات ونهل علينا أجواء عيد الاضحى السعيد أو بمعنى أخر “عيد اللحمة” كما يسميه البعض!

والحقيقة عيد الاضحى مشهور بالسلوكيات الخاطئة اللي بـ يعملها الناس من أول ساعات الاحتفال لحد آخر يوم.

في الجاي هـ نوضح أغلب مظاهر السلوك السيء في الاحتفال بـ عيد الأضحى، أرجوك ما تعملهاش علشان ربنا يكرمك: 

اطلع من جروب العيلة على الواتس آب

بص أول حاجة لازم تعملها قبل العيد كده بـ الصلاة على النبي انك ما تبقاش موجود على جروب العيلة الجميل السعيد الحلو.

اقرأ أيضًا: اسعار كحك وبسكويت العيد .. اعرف أحسن الأماكن في القاهرة

فكرة اننا نحصر نفسنا في التواصل من ورا الشاشات مش حاجة لطيفة خالص! كمان الوقت ده تحديدًا موسم لرسائل خالتوا وتيتة الغريبة جدًا، فـ “اهرب اهرب يا ياسين ربنا معاك“.

استغل عيد الاضحى في انك تزور قرايبك

هو مش معنى انك تخرج من جروب الواتس انك “تكره أهلك”، التواصل الفعلي أحسن ألف مرة من التواصل الوهمي.

فـ استغل فرصة العيد انك تزور أهلك وقرايبك اللي مش بـ تشوفهم غير كل 20 سنة مرة دول، علشان ربنا يكرمك أخي الكريم.

ما تدبحش في الشارع خلال عيد الاضحى

تقريبًا الزمن اتغير والدنيا اتطورت، وبقى فيه أماكن مخصصة للدبح، فـ مفيش مبرر لإنك تدبح في الشارع وتإذي الخلق.

كمان الأماكن المخصصة للدبح بـ يتوفر فيها الإمكانات المتاحة من الأدوات والمناخ الصحي، ومش ملوث للبيئة.

ما تعذبش الحيوانات

احنا اتفقنا انك ما تدبحش في الشارع، فلما تروح تدبح في أي مكان راعي إن ما يكونش في تعذيب للحيوان “نفسي أو جسدي”.

خلي بالك من الحيوان ما يشوفش أي دم قبل ما يتدبح علشان ده بيإذيه نفسيًا، وكمان وقت دبحه خلي فيه شوية رحمة واتبع طرق الدبح الشرعية المعروفة.

ما ترميش أي مخلفات للدبح في الشوارع

الدنيا عيد وخروجات وزيارات والواحد بـ يكون نفسه يشوف الدنيا حواليه نضيفة والشوارع ريحتها حلوة.

فـ ماتجيش انت تلوث الشوارع بمخلفات الحيوانات المدبوحة، حاول ترميها في الأماكن المخصصة ليها.

الفرحة في القلب مش برسم الدم على الحيطان

معاك إن العيد فرحة وإن فيه ناس الدبح بالنسبة ليهم قمة الفرح، بس أكيد الفرحة مش هـ تنقص لو ما رسمتش بالدم “انت وعيالك وماما وناهد” على جدران وعربيات الشارع كله.

ما تغرقش الشارع ميّة

هو فيه علاقة وثيقة بين عيد الاضحى والدبح ورش الميّة في الشارع، يا جماعة احنا داخلين على حرب ميّة الفترة الجاية، فحافظوا عليها بقى.

اقرأ أيضًا: 16 اغنية من اشهر اغانى افراح مصر لموسم صيف 2019 

كمان علشان المية مع الطين بـ يبهدل كل حاجة وزحلايق احنا في غنا عنها، فـ ارحموا من في الأرض يعني.

ما تفرجش الأطفال على الدم

هو مشهد الدبح في عيد الاضحى صعب بالتأكيد في المطلق، كميات كبيرة من الحيوانات بـ تدبح في وقت واحد ودم كتير كتير.

الأزمة بقى إن الأطفال يتفرجوا على المشهد ده كل عيد وهما في سن صغير، فـ يتحول الدم والعنف إلى شيء عادي بالنسبة ليهم، فرجاءً بلاش تعملوا فيهم كده.

ما ترميش صواريخ على الناس في الشارع

https://youtu.be/_S4K3DZ–eQ?t=245

من أسوأ العادات في جميع الأعياد والاحتفلات بشكل عام، الهزار بـ الألعاب النارية “الصواريخ”.

والأزمة إن أحيانًا الهزار بـ يوصل لـ رمي الصواريخ دي على الناس وإفزاعهم كنوع من الكوميديا والهزار!!

مدينتك بيتك فحافظ عليها

طبعًا احنا كلنا بـ نزهق من الشعارات والكلام ده، بس نيجي عند النضافة وهوب نقف.. لما تخرج في العيد في أي مكان حاول تحافظ على نضافته، علشان المفروض اننا بشر وكده “معلش تعالى على نفسك”.

لو مافيهاش إساءة أدب ممكن نختار أوقات مناسبة لخروجة السينما

السينما هي أهم خروجات العيد عند كل الناس، وطبعًا في عيد الاضحى كله أول يوم بالنسبة ليهم دبح ولحمة وأنتخة في البيت.

فـ ممكن مثلا نطلع أذكياء شوية، ونجرب خروجة السينما أول يوم بالليل بـ تكون قمة الروقان، واختاروا سينما تكون بعيدة عن الناس مش معروفة أوي وأغلى شوية.

أوعى يتنصب عليك في العيد

https://youtu.be/1fV6Rrq0gNM?t=4179

في موسم الأعياد أغلب الكافيهات والمطاعم بـ يعملوا “مينيمم” غالي جدًا بدون أدنى سبب واضح!

فلازم تاخد بالك من حاجة زي دي، وما تدفعش غير اللي في الفاتورة أو تمن الحاجة اللي انت أخدتها بس.

ما تاكلش دهون كتير

خلي بالك العيد السنة دي جاي في وقت صيف، وانت تلاقيك بقالك شهرين بـ تعمل فورمة الساحل، فـ ماتبوظش كل اللي انت عملته بقى في يومين العيد.

بص في العيد الكبير ما تنزلش أصلًا من البيت

بص العيد الكبير مشاكله مش هتتحل والناس هتفضل تدبح في الشوارع والدم هيكون مغرق مصر كلها، فخليك ياعم في بيتك بكرامتك أحسن.