10 علامات بتقولك انك في علاقة هتنتهي قريب! (خد بالك)

البدايات في أي علاقة دائمًا أجمل، لكن وبعد البدايات؟ تيجي المشاكل الصغيرة اللي بـ تكبر مع الوقت، لحد ما توصل إلى علامات على استحالة استمرار العلاقة.

في الجاي أخطر 10 علامات تنبهك إنك في علاقة هـ تنتهي قريب:

انك تدي للعلاقة حجم أكبر من حجمها

في أول العلاقة بـ نحب نقضي كل لحظة مع شريكنا الجديد، بـ تديله أهمية أكبر وتفضّله عن أصحابك وعيلتك، وكل حاجة.

اقرأ أيضًا: 10 رسائل حب فاشلة على واتس آب.. اعرفهم وابعد عنهم

والبداية دي غلط جدًا الحقيقة! كل حاجة في الدنيا علشان تنجح لازم تمشي بـ خطوات ثابتة وواثقة، أصحابك القدام هما كنزك في الحياة وقطع التواصل المفاجئ معاهم أكبر خطأ في الحياة.

خلّي بالك إن اهتمامك الزايد بـ الشريك الجديد، ممكن يخليه يمل من العلاقة، اللي هـ تبدأ تمشي في “تراك” روتيني بحت!.

*ملحوظة هامة*

العلاقات الصحية لازم يكون فيها قدر من الاستقلال، فـ حاول تقسيم وقت فراغك وفقًا لقاعدة (50-30-20) بحيث لا تزيد عن 50٪ مع شريكك المهم، و 30٪ مع أصحابك وعيلتك و 20 ٪ لوحدك.

الشك والفضول علامات مهمة لـ علاقة فاشلة

مافيش حاجة تمنع انك تقابل شخصية فضولية، هما كتير حوالينا، فلو كان شريكك الجديد منهم، فحاول تـ تفاهم معاه في هذه النقطة.

لو حسيت إنه مش محترم مساحتك الشخصية ودايمًا بـ يختلق المشاكل لأسباب تافهة، وبـ يهدد انكم تسيبوا بعض، فـ سيبوا بعض من دلوقتي أحسن!

غير الشخصية دي فيه حد هـ تلاقيه، دايمًا بـ يديك نصايح لـ تحسين مظهرك وعنده مشاكل مع طريقة تعاملك اللي هي طبيعية في بعض المواقف، ده مؤشر لعلاقة سامة.

لو باقي على وجود الشخصيات دي في حياتك، حاول تنبههم، أو تـ تناقشوا بـ طريقة كويسة!…

زي انك تقوله: “أنا مش هقدر أتحمل تدخلك الزيادة في حياتي!” أو “أنا تعليقك على كذا بـ يضايقني” لو النقاش نفع يبقى الدنيا تمام، ولو لأ فـ اهرب بسرعة قبل ما تلبس.

الماضي لازم يفضل ماضي

أخطر حاجة في الدنيا إنك تدخل علاقة جديدة بنفس شخصيتك وتعاملك في العلاقة اللي قبل كده.

خلّي بالك علشان ما تكونش بـ تظلم شريكك الجديد معاك، خاصة لو اختارته على أساس إنه بـ يفكرك بالحب القديم.

لمّا تـ تكلم كتير عن علاقاتك السابقة مع الشخص الجديد، ممكن يعمل حواجز عنده من ناحيتك، ويفقده الثقة فيك أصلًا.

الماضي لازم يفضل في الماضي، وكل وقت وليه طبيعته الخاصة.

مافيش حد سايب للتاني مساحة للتفاهم

مافيش حد عنده القدرة انه يقرأ أفكار التاني، مهما كانت علاقتهم، فـ ما تحكمش على أفعال شريكك من غير ما تفهم.

لو مافيش مساحة للفهم بينكم، هـ تتخلق مشاعر سلبية كتير، ولو ما تمش حل الموضوع ده، يبقى العلاقة دي هـ تنتهي في أسرع وقت!

انك تفكر إن شريكك هو شخص مثالي

مافيش حد مثالي 100% “ماحدش كامل”، كلنا بشر ولينا أخطاء.

لو اختيارك لشريك حياتك نابع من كونه شخص مثالي، ده هـ يخليك ما تقدرش تـ تحمل أي خطأ يعمل كونه بشر.

توقع دايمًا إن كلنا بـ نغلط واتعود تسامح، ولو ما عندكش القدرة لده، فـ ما فيش ما يبشر إن العلاقة تنجح.

انك تتعامل بـ شخصية غير شخصيتك

أحيانًا بـ نحب نتجمل، وده بـ يودينا في منطقة خطيرة، لأن في الوقت ده بـ نتعامل بـ شخصيات غيرنا، كن نفسك، ده أفضل.

جايز الشخصية اللي انت بـ تتجمل عليها، تكون أفضل أصلًا، كمان إنت مش هـ تقدر تعيش بالوِش ده لفترة كبيرة.

ممكن تجملك، يدخل فيه بعض الكذب اللي ممكن يدمر العلاقة لو تم اكتشافه في أي وقت.

مفاتيح العلاقات الصحية هي، الصدق والثقة المتبادلة والاحترام والتفاهم.

حب السيطرة.. مدخل علاقة فاشلة

لو فيه حد منكم جوة العلاقة عنده إفراط في “حب السيطرة”، ده ممكن يعمل مشكلات كتير، أبرزها فقدان الثقة في بعض.

حب السيطرة ممكن يخلي في تحكم زيادة في حياة الشريك ممكن توصل لـ “بـ يصحى امتى وينام امتى!”، وده أكيد مؤذي.

اهتمامك بالتشابهات اللي بينكم فقط هـ يخلق مشاكل

معظم الناس في العلاقة بـ يهتموا لـ وجود حاجات متشابهة بينهم، ده ممكن يكون كويس لعلاقة طويلة وصحية.

لكن لو تجاهلت وجود الاختلافات برضه، سواء كانت فكرية أو أخلاقية أو دينية، ده هـ يخلق مشاكل لا حصر لها.

اهتمامكم المتشابه في الذوق الموسيقي، مش دليل غير لإنكم أصحاب كويسين، لكن مش مرتبطين!

المناقشة قبل قرار الارتباط هتسهل القرار عليكم انتم الاتنين.

انك دايمًا موجود.. علامات على انك في علاقة منتهية!

هي حاجة حلوة إنك تكون متمسك وعاشق ولهان، ودايمًا بـ تتصل وتسأل على شريكك الجديد، بس في وقت ما ممكن ده يبقى ليه أثر سلبي.

اقرأ أيضًا: “بينام عند امه” و”بيقولي يا تخينه”.. اغرب اسباب الخلع في مصر

“ما تدلقش” خليك “تقيل”، اسأل من وقت للتاني، وسيب فرصة لإن هو كمان يسأل علشان العلاقة تبادلية أصلا.

في التأني السلامة.. السرعة بـ تموت العلاقة

“في التأني السلامة، وفي العجلة الندامة”اللي قال المثل ده ما غلطش.

ممكن تحس إن السرعة اللي العلاقة ماشية بيها حاجة كويسة! بس للأسف مش صح، لأن انت ما اخدتش وقتك في التفكير، ولا في فهم الشريك الجديد.

التمهل والتأني أجمل حاجة على الإطلاق، خد وقتك في كل خطواتك، انت ممكن تعبر عن مشاعرك، بس أجل مسألة الارتباط وخليها لوقتها.