7 فوائد لـ (الطلاق) اعرفهم وانت بـ تتجوِّز

إيه هي أسباب الطلاق ؟.. دايمًا بـ نسمع عن فكرة إن الجواز هو الاستقرار “الجواز نص الدين!” الجواز سنة الحياة الجواز الجواز الجواز..

لكن بعد الجواز والوقوع في الفخ، بـ تبدأ تظهر حاجات كتير ومشاكل وحوارات في الغالب بـ تنتهي بـ الطلاق ‍♀️

اقرأ أيضًا: بينهم الحب من طرف واحد وشرب الدماء.. أغرب أنواع الإدمان

حسب الإحصائيات، فـ الطلاق في معظم الحالات بـ يكون أسلم القرارات لا وله فوائد صحية أكتر من الجواز المدمر للحياة.

وإذا كان الجواز هو فعلا نص الدين، فهل الطلاق ممكن يكون النص التاني؟ .. هـ نعرف ده في اللي جاي:

1- الطلاق بـ يساعدك تفتح صفحة جديدة مع الحياة وتقابل أشخاص أحسن

وقت الارتباط بـ تحس إن فيه حاجة بـ تمنعك من التعرُّف على شخصيات جديدة، تقريبًا علاقاتك مع الجنس الآخر بـ تكون مقطوعة تمامًا.

هو لو انت في علاقة صحية ومش مؤذية فـ ده تمام، أما لو بدأت تحس بأي أضرار من العلاقة، فـ الأحسن انك تنهيها أو تحاول تدي لنفسك فرصة للتعرف على ناس جديدة.

والنصيحة هنا: “خليك ذكي ولا تقع في الفخ مرتين!”

2- هـ تلاقي وقت لتطوير مهاراتك الحياتية والعملية✔✔

تقريبًا أي حد لما بـ يتجوز بـ يبقى قرر إن يدخل بـ نفسه قفص في الغالب هـ يقيد حريته ومش هـ يقدر يعمل كل الحاجات اللي كان بـ يعملها وهو لوحده.

يعني مثلا فكرة ان انت وقت كله يكون ملكك انت بس ده بـ يخليك تقدر تقسمه بـ مزاجك، تاخد كورس، تنزل تسهر مع صحابك أيًا كان.

الجواز ساعات بـ يحرم الاتنين من التمتع بحياتهم الشخصية، لأن كل واحد منهم وقته مش ملكه ولا حتى قراره ملكه.

الانفصال بـ يرجع الشخص حر تاني، قادر إنه يتحرك بدون ضغوط ولا مسؤوليات ولا مشاكل، وده هـ يساعده يطور من نفسه على كل المستويات.

3- بعد الطلاق هـ تكون في غاية السعادة

هو ممكن الفراق يكون حاجة صعبة، بس الاستمرار في علاقة غير صحية أصعب ومدمر.

غالبًا هـ تحس إحساس منعش وجميل بعد ما تنفذ قرارك بـ الطلاق، هـ تعرف انك عملت حاجة صح.

الحياة قصيرة جدًا وحرام نضيعها في علاقة بشرية مؤذية، “اعتزل ما يؤذيك”.

4- الأطفال مش حِجّة.. بالعكس الطلاق هـ يكون لمصلحتهم في حالات كتير

دايمًا لما زوجين بـ يعرفوا ان حياتهم بقت مش كويسة مع بعض ويفكروا في الانفصال، الأطفال بـ تكون عائق كبير.

وأوقات تلاقي العيلة كلها بـ تصلح بينهم علشان الأطفال ما تتمرمطش!.. لكن في الحقيقة الأطفال لو عاشوا مع حد من الزوجين في جو هادي، ده أفضل مليون مرة من إنهم يعيشوا وسط توتر وخلافات.

5- صحتك هـ تيجي مع الطلاق

لو كنت في علاقة مش لطيفة، ومليانة مشاكل، ده هيأثر على كل حاجة في حياتك وأولهم صحتك.

الانفصال في الحالة دي بـ يكون أولى الخطوات الإيجابية في طريق حياة صحية سليمة.

ممكن بعد الطلاق تستغل جزء من وقتك للجيم ولعب الكورة مع صحابك كل يوم خميس…إلخ.

6- شكلك بيبقى أحسن بعد الطلاق .. معروفة

الراحة النفسية اللي الواحد بـ يكون فيها بعد الطلاق هي سبب كافي لتغيير ملامحه واختفاء تجاعيد الجواز المؤذي.

ممكن نشوف ده في الواقع على ناس كتير، عمرو دياب مثلا بعد انفاصله عن زينة عاشور رجع 20 سنة لورا!

7- الطلاق هو بداية لنجاحك في حياتك العملية

الجواز بـ مشاكله ومسؤولياته بـ يشغل الدماغ وبـ يقلل التركيز للضعف، وده ممكن يأثر على الحياة العملية.

اقرأ أيضًا: انت مش لوحدك.. تعرَّف على فنانين وقعوا في حب زملاء العمل 

بالتالي فـ الطلاق ممكن يساعدك انك تركز أكتر في شغلك وتنجح أكتر وتكسب فلوس أكتر وتعيش حياتك صح.