انواع الناس في الافراح المصرية انت مين فيهم؟

احنا دلوقتي في موسم التزاوج عند المصريين.. الصيف يعني أفراح وشوارع مليانة ميكروفونات وأنوار ويادبلة الخطوبة عقبالنا كلنا.

في الأفراح دي بقى الواحد بـ يقابل أنواع كتيرة جدًا من البشر الغريبة، هـ نتكلم عنهم في الجاي:

من انواع الناس في الافراح – المتحمس أبو الواجب

انواع الناس في الافراح المصرية — فرح شعبي

ده شخص ودود بطبعه بـ يحب اللمة والواجب جدًا، يوم الفرح بـ تلاقيه أول واحد ادام بيت العريس بـ عربيته المتزوقة ويفضل بقى “بيب بيب بييب”.

الشخص ده من البشر الطيب وكل حاجة، بس حماسه وأفورته في الواجب ساعات بـ يكون رخم شوية!

حامل الذخائر – طالع من ببجي ناو

الشخص المسلح حامل الزخائر دا اللي بيبقى معاه كل أنواع الصواريخ والألعاب النارية.

ده عادة بـ يكون طالع بنص جسمه من شباك العربية اللي ورا العريس، يخلص التورتة يطلع الشمروخ، أحيانًا بـ يبقى معاه مسدس صوت صغير كده.

ما تعرفش ده بيبقى غرضه يخض العريس والعروسة أكبر قدر ممكن، ولا بـ يأمن ضهرهم مثلا!.. المهم إن دي ميول سادية.

متخصص الشقط والتظبيط

متخصص الشقط، الجنتل اللي في شلة العريس والعروسة، عنده قدرات خاصة في جذب النساء، ولازم يروح الفرح على سنجة 10.

مواضيع ذات صلة:

بـ يعرف دخلة كل بنت، وبـ يعرف يفتح مواضيع كويس أوي، ومن ضمن قدراته الخارقة “اصطياد البنات بالنظرات”.

من انواع الناس في الافراح – سعيد الأرتيست

ده الفنان المتنوع محترف الرقص، عاشق أنغام الطلبة! بـ تلاقيه واقف جنب الدي جي من أول الفرح بـ يتحايل عليه يشغل “شيك شاك شوك”، علشان يقسم عليها بالرقص.

طنط الطيبة

مفيش فرح بـ يخلو من الطنطاية الجميلة اللي بـ تروح تاخد العروسة وترقص معاها.

ومش بـ تقدر تكمل كتير نظرًا لإن الصحة مش مساعدة، فـ بتكمل تسقيف للعروسة اللي بـ تبقى اتحولت سامية جمال خلاص.

غالبًا طنط بـ تكون عاملة ده بنية صافية، وعاوزة تطلع مهارات العروسة المكبوتة، وتعرف العريس إنها بـ تعرف ترقص وتطمنه!

لكن للأسف أحيانًا الموضوع ده بيإذي العريس نفسيًا، ومش بعيد يفضل مأثر على علاقته بـ سامية جمال “قصدي مراته” طول الحياة.

طنط المنفسنة

في المقابل بقى في الطنطاية اللي جاية تنظر على كل الناس “شايفة بنت فلان لابسة ازاي”، “شايفة ابن فلانة بيرقص ازاي”.

طنط المنفسنة هي تقريبًا اللي بـ تسخن العريس على مراته لما ترقص في الفرح، وتهد كل اللي طنط الطيبة بـ تعمله!

المندوب المقيم عند البوفيه

الشخصية دي لابسة كل واحد فينا تقريبًا لأن البوفيه للي عنده عقل هو أهم حاجة في الفرح، واللي عاوز يجرب يقرب.

بس ده ما يمنعش إن فيه شخص صريح مع نفسه لأقصى درجة! هو مش بـ يتفاعل مع أي نشاط في الفرح لا رقص ولا تسقيف، هو بـ بيدخل الفرح يدور على البوفيه ويرشق.

البنت الكيوت

في بنت كده بـ تكون موجودة في كل الأفراح، بس بـ تكون مستخبية! فاكرين طنط الطيبة، هي في الغالب بـ تبقى جاية معها.

البنت دي مش بـ تتفاعل مع أجواء الفرح غير في أضيق الحدود، تسقيف وهي قاعدة مكانها.

البنت الكلبوبة

دي واحدة هي نفسها تبقى كيوت، بس عندها ميول انحراف شوية، هي جاية الفرح تظبط أصلا، مش فارق معها أي حاجة تانية.

عاملة زي الشبح، لو روحت أي حتة هتلاقيها، منتشرة كده.

*بصوت الراجل بتاع عالم الحيوان*.. تراقب الأيادي للتأكد من عدم وجود دبلة.. إلى حين أن توقع بفريستها “الشاب الجنتل”.

اشهر انواع الناس في الافراح – البنت الروشة طحن

دي صاحبة العروسة، أو العريس.. ده بـ تعرفه من التاتو اللي على إيدها “أخت العروسة/العريس”!

هتلاقي صوتها عالي طول الوقت وبـ تنادي على زمايلها علشان يرقصوا سوا مع العروسة، شبح ومش هاممها حد.