لو أزمة الموديل والمنتخب حصلت سنة 2006 كان إيه اللي اختلف؟

حكاية الموديل والمنتخب أثارت جدل كبير الأيام اللي فاتت، بعدما نشرت “ميرهان كيللير” اسكرين شوت لرسايل عمرو وردة والونش لها على انستجرام.

إدارة المنتخب في تصريحتها ما نفتش الموضوع، بس قالت إنه أخد أكبر من حجمه، ومفيش قرارات حاسمة صدرت ضد أي واحد من اللاعيبة.

اقرأ أيضًا: اغرب عادات الزواج للدول المشاركة في أمم إفريقيا (لو عاوز تتجوز)

احنا حبينا نرجع معاكم فلاش باك للزمن الجميل في الكورة (سنة 2006 لمّا مصر نظمت البطولة)، أيام المعلم حسن شحاته ، وهـ نفترض إن وردة كان موجود وقتها في المنتخب وعمل نفس اللي عمله كان إيه اللي هيحصل؟!

منتديات حلا للتعارف

في 2006 ماكنش فيه سوشيال ميديا، لا فيسبوك ولا تويتر، ووردة بـ طبعه بـ يحب التعارف…

فكان زي أي شاب مصري أصيل هـ يدخل على أي منتدى تعارف زي منتدى “حلا” اللي كان مشهور وقتها.. وهـ يدخل يكلم الموديل اللي هـ تكون مسمية نفسها “أنا الموديل ميرو“.

بعدين يقولها ماتيجي ياهو أصل الدردشة هنا بـ تعلق!

شات الياهو

هـ يلاقيها حاطة صورة قلبظات بوكس، فـ يدخل يقولها “Boxing?haha” هـ تفهمه غلط، وتصوّر الشات بـ موبايلها الـ 6630 أو الـ N70 علشان جودة الكاميرا أعلى.. وهـ تبعتها لبرنامج وائل الإبراشي اللي كان بـ يحاول يشقطها قبل كده “SMS”!

وائل الإبراشي الحريقة

معد وائل الإبراشي هـ يكلمه ويحكيله اللي حصل، وهو ما هـ يصدق يطلعها معاه في برنامج “الحقيقة”.

هـ تكون سايبة الشات بتاعها مع الكنترول، اللي هـ يعرض صور الشات كلها، وأ.وائل يقول:

“هذا لا يليق بلاعب منتخب مصر، ومحتاجين ندخل كابتن حسن شحاتة على التليفون يا جماعة”.

المعلم حسن شحاتة يرد

بعد ما الكنترول يتواصل مع الكابتن حسن أكتر من مرة علشان رافض يتكلم في الموضوع علشان الوضع حرج، وهو خجلان خجل الأب اللي ابنه جابله العار.

بـ يدخل كابتن حسن على الهوا:

“سلام عليكم أ.وائل، أنا مش هـ قدر أتكلم كتير علشان بس انت عارف اننا في معسكر وكده”

ويعتذر للبنت:

“معلش يا بنتي حقك عليا أنا هـ قرصلك ودانه ومش هخليه يعمل كده تاني، بس هو عيل بايظ، وجايلنا كده من اليونان، مش متربي في مصر يا وائل، ولا واخد على عادتنا وتقاليدنا”.

ويطلب ينهي المكالمة: “والسلام عليكم ورحمة الله وبركاته”.

تريكة الأخ الكبير

المعلم بعد المكالمة هـ ينادي أبوتريكة ويحكيله اللي حصل، ويقوله إن عمرو وردة مش هـ ينزل الماتشات الجاية.

فـ تريكة بـ دوره راح لوردة أوضته، وقاله إن اللي حصل ما ينفعش يا عمرو ده انت حتى هـ تلبس فنلتي في يوم من الأيام!

ساعتها وردة هـ يدافع عن نفسه:

“مش أنا يا تريكة، انت تصدق عني كده، ده الياهو اتهكر”.

خناقة وردة وحسن شحاته

فـ أبوتريكة هـ يقوله ان المعلم مش هـ ينزله الماتش الجاي، ساعتها هـ يتجنن ويجري على أوضة حسن شحاته، يقوله:

“ليه؟.. أنا ماعملتش حاجة دي بت بنت *%$#…….”.

المعلم هـ يرد عليه: “على بابا يله.. أنا ما صدقش الكلام ده على أي حد، بس انت بالذات أصدق”.

كلمه من هنا على كلمة من هنا، حسن شحاتة هـ يدخله الأوضة ويربطه في السرير وينزل فيه ضرب!