5 أنواع غريبة هـ تقابلهم في المصيَّف ‍♀️اعرفهم قبل ماتسافر

احنا بقينا في القرن الـ21 ولسة في ناس غريبة بـ نقابلهم في المصيف!.. في الموضوع ده هـ نتكلم عن أغرب الناس في مصايف مصر 2019 وازاي تتعامل معاهم.

أبو جلمبو البحر “كنت عارف انه نو على فكرة”

دول الناس اللي بـ يتخنوا جدًا في الشتا، وبعدين في دخلة الربيع بـ ينزلوا الجيم، علشان يعلموا الفورمة اللي مش بـ تظبط في الاخر!

النوع ده هتلاقيه ماشي فارد دراعاينه كأنه عنده تسلخات كده “على أساس ان الباي قافشة عليه”!

اقرأ أيضًا: قصص حقيقية.. أشخاص ضاعوا في البحار والمحيطات ‍♀️

بـ يقرب من المناطق اللي فيها بنات كتير، علشان يلفت الأنظار، تقدر تقول ” متحرش صغير أو مبتدئ”.

هو شخص مش مؤذي ليك كـ ولد، بس لو حسيت انه مزودها مع أي بنت في النطاق بتاعك خد موقف إيجابي.. ياريت.

إني جائع “بولي كاتاه”

الناس اللي عندها هسهس “الميه بـ تجوَع”، هما دول مش بـ يكونوا شخص، بـ تبقى عيلة مع بعضها.

أول ما بـ يوصلوا الشط، تلاقي الحلل اتفرشت وفيه مطعم اتفتح جنبك، محاشي وكبدة ومكرونة، وسندوتشات حلاوة بالقشطة!

بص الناس دي ما تفكرش تتعامل معاهم “ده لمصلحتك انت والله”، انت أول ما تلاقيهم تنسحب في هدوء من المكان، ومن البلد كلها.

مدير البحر!

https://www.facebook.com/roo7.tal3a.walah.lnkif/photos/a.648031148555896/1455200617838941/?type=3&permPage=1

ناس كتير بتحب تنزل البحر بكامل شياكتهم، وبكل ملابسهم، زي ما انت شايف في الصورة كده، والفئة دي شايفة إن البحر مالوش ملابس خاصة بيه وإنه ممكن يتنزل بنفس اللبس اللي بنحضر بيها اجتماعاتنا وأفراحنا ومناسبتنا العادية!

أشيك ناس في الكوكب

علميًا المصيف هو مكان بـ نروحه ننزل الميه ونستجم نسترخي، ونتخفف من أعباء الحياة، والمايوه اللبس الرسمي.

عمليًا في مصر، ناس بـ تعتبره فرح، وبـ يروحوا الشط بـ لبس عجيب، وناس تانية بـ يروحوا بـ الأندر وير!.. الأزمة ان هما فعلا بـ يكونوا مفكرين إن دي كجولة وموضة.

لو الزمن كان جه عليك في يوم من الأيام وروحت المصيف بالشكل ده، استغفر ربنا وتوب توبة نصوحه.. وحاول تنصح أي حد تعرفه بـ يعمل كده إن لبس المصيف “المااايووه”.. مش البوكس هااه!

مش صرف صحي!

أغرب ناس في الدنيا هما الناس اللي بـ تتصرف مع البحر إنه صرف صحي، وبـ يعملوا فيه “بيبي يا سعيد”!

والأغرب الأمهات اللي بـ تاخد أطفالها على مرأى ومسمع من كل الناس وتخليهم يعملوا كده في الميه

اقرأ أيضًا: احصل على 10 آلاف دولار واسكن هذه المدينة الإيطالية!

في الحالة الأولى انت ممكن ما تاخدش بالك وهي مشكلتها اننا بـ نتغفل!.. بس هما شكلهم بيبقى باين شوية، فـ حاول تبعد عنهم، بالقدر الكافي

في الحالة التانية بقى، لو قفشت واحدة بـ تعمل كده ياريت تروح تفهمها إن اللي بـ تعمله ده غلط حتى لو هـ تدفعلها انت تمن دخول الحمام.