fbpx

ازاي تبدأ دايت فاشل؟! 🍽 (في 3 خطوات فقط)👀

دايمًا في الصيف الكل بـ يسعى لأنه يعمل “الفورمة”، ويخس، وطبعًا الطريقة الوحيدة الأسلم للموضوع ده “الرياضة والدايت، دايت والرياضة”!.

بس هل فيه حد بـ يقدر يعمل ريجيم مظبوط، ويستمر فيه وينزل جيم ويلعب رياضة وكده؟

الحقيقة فيه، بس دول ناس عندهم إرادة وحاجات كده، وبعدين ما انت برضه اللي بـ تعمل حاجات غريبة😶

بس علشان انت مش لوحدك، وفيه ناس كتير بـ تبوّظ الدايت، احنا هـ نوضح إيه أكتر الحاجات اللي بـ تبوظ الدنيا، وبـ تضيع تعبك علشان ما تعملهاش بقى 💪👌

جرايم نص الليل لـ دايت فاشل

دايت - فتح التلاجة بالليل من جرايم فشل الدايت
دايت – فتح التلاجة بالليل من جرايم فشل الدايت

يعني لما تبقى طول اليوم ملتزم بـ الدايت، ومانع نفسك من كل متع الدنيا، وعايش ومتحمل، تيجي في ساعة تضيع كل ده!

الفكرة مش إنك أكلت إيه يبوظ تعب اليوم، لا الفكرة أكلت إمتى، أكتر وقت غلط للأكل هو الليل من أول الساعة 7 كده لحد ميعاد النوم بقى.

فـ لما تبدأ دايت، ولقيت أي حاجة بـ تقولك تاكل بعد الساعة 7 قاوم، وأوعى تعمل ده، أو ممكن تاكل فاكهة أو خضار “كميات بسيطة هااه”.

اشتراك جيم فلوسه حرام

دايت ورياضة
دايت ورياضة

من الخطوات المهمة وانت في أول يومين دايت، والحماس واخدك، بـ تروح جيم مناسب ليك وتحجز، وتدفع فلوس أد كده!

وبرضه بـ تروح الجيم يومين، وبعدين حماسك بـ يقل.. طب ليه.. هل الفلوس اللي انت دفعتها دي حرام مثلًا!

اقرأ أيضًا: مميزات الراجل التخين: بيدَفي ويتمسك من أيّ حتّة

بص يا وحش “بلغة كابتن الجيم” 😅 طالما دفعت الفلوس يبقى تحضر، علشان تستفيد، والرياضة مفيدة في الحياة عمومًا، مش بس علشان تخس يعني.. زي الأستاذة راينا يوسف كده👌

الفرهدة

لازم تعرف إن الموضوع محتاج نفس طويل، فـ لو نفسك قصير، حاول تيجي على نفسك، لأن لو سيبت نفسك للفرهدة هـ تخسر حاجات كتير!

ما تفرهدش علشان النتيجة اللي هـ توصلها تستحق التعب ومافيش حاجة بـ الساهل كده!

حاول تحافظ، وتستمر في النظام بتاعتك، وأكلك ظبطه على أد مجهودك، ونسبة الحرق في جسمك.