إزاي تظبط (الإريال) وتتفرج على مباريات كأس أمم أفريقيا؟ خطوات بسيطة

احنا دلوقتي بـ نستعد لانطلاق بطولة كأس أمم أفريقيا وده حدث مهم ناس كتير مستنياه.. بس المرة دي الموضوع مخلتف شوية، بعد ما أعلنت الهيئة الوطنية للإعلام عن انطلاق قناة أرضية مخصصة لبث مباريات كأس أمم أفريقيا “تايم سبورت“.

القناة بدون تردد على الأقمار الصناعية ‍♀️ فـ بالتالي انت محتاج كذا طريقة تعرف بيها ازاي تشغلها في البيت، علشان تقدر تتفرج براحتك على مباريات كأس أمم أفريقيا

الطريقة الأولى – الإريال (10 جنيه لو اشتريت الغالي)

الطريقة دي هي الأسهل، خصوصًا لو الشاشة بتاعتك بـ تقبل الاستقبال الرقمي الأرضي، انت بس مطلوب منك توصل وصلة الإريال بـ التلفزيون بتاعك.

فيه أكتر من طريقة علشان تعمل الإريال ده، منهم على سبيل المثال لا الحصر:

طُرق تصنيع الإيريال وتركيبه:

1.  جمع شوية قطع معدنية موصلة للكهرباء، على أي كرتونة قوية أو خشب، أو أي مادي غير موصلة للكهرباء، وهتوصل طرف السلك بالإريال والطرف التاني في الشاشة، طريقة مش هـ تكلفك فلوس أصلا!
2. استخدم اللمبة النيون، وسلك الدش العادي، عن طريق تقشير الطبقة الخارجية، وتوصيل الأسلاك المجدولة، في طرف اللمبة المعدني، والجزء النحاس، في الطرف التاني من اللمبة، ومن الناحية التانية هتوصل السلك بالتلفزيون، دي برضه طريقة ببلاش.
3. ممكن تشتري محول “convert” من أي محل أدوات كهربية، وتوصله فيه السلك اللي نازل من الدش، ومن الناحية التانية توصله بالتلفزيون، الطريقة دي مش هـ تكلفك غير سعر المحول اللي هو تقريبًا من 5 إلى 10 جنيه.
4. هـ تركب الإريال وتظبطه، لازم توجه ناحية محطة التقوية أو الإرسال اللي في محافظتك.
5. هـ توصل الكابل اللي نازل من الإريال بـ الشاشة، هـ تلاقي المكان المخصص ليه اسمه RF.
6. هـ تدخل على السيستم بتاع الشاشة، علشان تفعل الاستقبال، وبعدين ابحث عن القنوات اللي الإريال قادر يستقبلها.
7. القنوات اللي هـ تظهرلك في نتيجة البحث، احفظها.. وهـ تلاقي توضيح أكتر في الفيديو اللي تحت.

الطريقة التانية – اشتري جهاز الاستقبال ( من 300 لـ 600 جنيه)

لو الشاشة بتاعتك مش بـ تقبل الإريال مباشر، هـ تضطر في الحالة دي، تشتري جهاز الاستقبال اللي هو “DVBT” أو “DVBT2″، وده بـ يكون في حدود من 300 لـ 600 جنيه، ومتوفر عند محلات الإلكترونيات في باب اللوق.

وبعد كده:

1- هـ تركب الإريال وتظبطه، لازم توجه ناحية محطة التقوية أو الإرسال اللي في محافظتك.

2- هـ توصل الكابل اللي نازل من الإريال بـ المدخل بتاعه في جهاز الاستقبال، هـ تلاقي اسمه RF.

3- بعدين وصل جهاز الاستقبال، بـ الشاشة، بـ كابل HDMI.

3- هـ تدخل على السيستم بتاع الشاشة، علشان تفعل الاستقبال، وبعدين ابحث عن القنوات اللي الإريال قادر يستقبلها.

4- القنوات اللي هـ تظهرلك في نتيجة البحث، احفظها.. وهـ تلاقي توضيح أكتر في الفيديو اللي تحت.

وده الفيديو توضيحي للطريقيتين

رسيفر بي أوت – 400 جنيه

 

لو عندك Be Out ده هـ يسهل عليك فتح حوالي 10 قنوات مشفرة من قنوات bein sport وهـ تقدر تـ شوف مباريات كأس أمم أفريقيا ، كمان هـ تقدر تشوف قنوات الرسيفر العادي، سعره في حدود 400 جنيه.

تي في بوكس – 800 جنيه

الجهاز ده بـ يحول التلفزيون العادي إلى تلفزيون ذكي،  وهـ يساعدك انك توصل للبث المباشر للماتشات  على الإنترنت، وهو بـ يشتغل بالواي فاي، أو عن طريق سلك نت.

هو بـ يقدر يوصل لـ الفيديوهات المنشورة على فيسبوك أو اليوتيوب، وانت بـ تتحكم فيه من خلال الريموت بتاعه.

سعر الـ “تي في بوكس” بـ يبدأ من 800 جنيه.

رسيفر وان شوت – 700 جنيه

الرسيفر ده بـ يفتح قنوات “بي إن”، وهـ تقدر تـ تفرج على مباريات كأس أمم أفريقيا من خلاله، كمان هو بـ يدعم تقنية الفيديوهات عالية الجودة، سواء 4k أو HD،وبـ يشغل القنوات المشفرة.

“ون شوت” مش بـ يحتاج لـ الدش، هو بـ يشتغل بالنت عادي، وكمان بـ يشغل قنوات “بي أوت”، وسعره في حدود 700 جنيه.

شوف الماتشات لايف

أما بقى لو انت من هواة حضور الماتشات في الاستاد، فـ لازم تحاول تحجز تذكرتك من دلوقتي.

كمان لازم تعرف إن مباريات كأس أمم أفريقيا هـ تكون متقسمة على 6 ملاعب في 4 محافظات مختلفة.. وهي:

“استاد القاهرة – واستاد السلام بالقاهرة – واستاد الدفاع الجوي بالقاهرة – واستاد الإسكندرية بالإسكندرية – واستاد السويس بالسويس – واستاد الإسماعيلية بالإسماعيلية”.

استضافتنا لـ كأس أمم أفريقيا ، بـ يحصلنا للمرة السادسة، في النسخة 32 للبطولة.

الانطلاقة يوم 21 يونيو، ومستمرة لحد 19 يوليو، بـ مشاركة 24 دولة أفريقية، وده بـ يحصل لأول مرة من سنة 1957!.. اللي كانت بداية لإن يبقى فيه حاجة اسمها أمم أفريقيا أصلا.