in

احسن المصايف في مصر ⛱ وبأقل الأسعار.. اعرفهم هنا قبل ماتسافر ‍♀️

احسن المصايف في مصر

الصيف داخل، وعلى المقيمين خارج المدن الساحلية، الاستعداد لـ نفخ العوامات، وشراء المايوهات وكل المستلزمات، وتدور على احسن المصايف في مصر علشان تعرف تفصل.

حاول تركز انك ما تكونش تقليدي، وتدور على أماكن تقليدية، بص ما تدورش، احنا تقريبًا جمعنالك الأماكن دي هنا:

دهب: 2000 جنيه لـ5 أيام

احسن المصايف في مصر
الجنة على الأرض في دهب – احسن المصايف في مصر

دهب من احسن المصايف في مصر، هتقولي موضة وخلصت، دهب دي الموضة اللي عمرها ما تخلص عارف ليه؟

  • جو دهب والهدووء كافي يريح الأعصاب، يعني أحلى ميديتيشن.
  • الأسعار في دهب مش غالية مقارنة بأماكن تانية كتير.
  • بلد مش زحمة ومش بـ تتزحم خالص، دي حاجة من عند ربنا كده.

اعمل حسابك مثلا على متوسط فلوس 2000 جنيه، في 5 أيام، ذهاب وعودة مش بـ يعدي 400 جنيه، اليوم ممكن يقف عليك بـ 200 جنيه.

اقرأ أيضًا: احصل على 10 آلاف دولار واسكن هذه المدينة الإيطالية!

يعني ممكن نقول إن إجمالي المصاريف من غير الأكل والخروجات يوصل 1000 جنيه في الـ 4 أيام، انت بقى تقدر تظبط المصاريف التانية.

بالنسبة لأماكن الخروجات مفيش أكتر منها: “البلو هول – أبو جالوم – بلو لاجونا – ثري بولز – السفاري في الطويلات – وأخيرًا الممشى وسهرات الممشى”.

دهب فيها مطاعم وكافيهات و أكتر من سوبر ماكت، يعني ما تشلش هم الأكل.

طابا: 2500 لـ4 أيام

احسن المصايف في مصر
قلعة صلاح الدين بـ طابا – احسن المصايف في مصر

طابا لسة مكان مش مكتشف ومش زحمة، رغم جمالها، بس الناس بـ تستبعدها، معظمها فنادق، بس فيها كامبات لطيفة وأسعارها مناسبة برضه.

متوسط سعر الإقامة 4 أيام، 700 جنيه، أحيانًا ممكن تبقى شاملة الوجبات، السفر ذهاب وعودة 400 جنيه.

القعدة في طابا، للاستجمام فقط، بس ممكن تطلع رحلات برة، لـ وادي الوشواشي، أو راس الشيطان، سعر الرحلة في حدود 250 جنيه بـ حد أقصى.

راس سدر “مالديف مصر”: 1000 جنيه لـ4 أيام

احسن المصايف في مصر
راس سدر – احسن المصايف في مصر

حرفيًا المكان ده حقه مهدور، والناس مش واخدة بالها منه خالص، مع إنه ساعتين ونص تقريبًا من القاهرة.

ولك أن تتخيل ممكن تقضي 4 أيام هناك بـ 1000 جنيه بـ أكلك وشربك ومواصلاتك.. بس الخروجات عليك بقى.

الخروجات في راس سدر، كتير، منها طبعًا: “المياه الكبريتية – عيون موسى – حمامات فرعون”.

نويبع: 2500 لـ 10 أيام

احسن المصايف في مصر

ثروة طبيعية غير مستغلة، زيها زي كتير من المناطق الجميلة اللي في أقصى الشرق دي..

أحلى حاجة في نويبع إنها مليانة كامبات، وأسعارها تحفة، هو علشان نكون صرحة الخدمة ممكن ما تكونش قد كده، بسبب قلة السياحة إلخ إلخ.

اقرأ أيضًا: أفضل الوجهات السياحية في 2019

بس اللي أقدر أقوله ليك إنك تقدر تقعد هناك مثلا 10 أيام وماتدفعش أكتر من 1500، أهم حاجة تختار كامب قريب من المدينة، علشان تقدر تجيب أكلك وطلباتك.

نويبع زيها زي طابا.. مش أماكن للخروجات، إستجمام وراحة بال وفصلان فقط، بس لو بـ تحب الخروجات ممكن تطلع دهب أو راس الشيطان أو وادي الوشواشي.

السخنة: 2000 جنيه لـ4 أيام

مصايف رخيصة في مصر
العين السخنة

لو انت بـ تقرأ كل اللي فوق ده وعاوز تعيط إنك مسحول في الشغل، ومش عارف تاخد إجازة يومين تغير جو، الجزء ده هـ يبسطك أوي!

السخنة غالية؟ آه غالية.. بس غالية للناس الرايقة ياعم اللي رايحين يقضوا أسبوع ولا حاجة، لكن للغلابة اللي رايحين يقضوا داي يوز رخيصة جدًا.

أحلى يوم ممكن تقضيه في حياتك مش هيكلفك مثلا أكتر من 200 أو 300 جنيه.. وساعة ونص تكون في القاهرة ولا من شاف ولا من دري!

تقدر تدخل أي شط محترم بـ تذكرة في حدود 100 جنيه يعني أعلى حاجة، تقضي نص اليوم بحر ولعب، وتطلع تتغدى أحلى أكلة سمك بـ تبدأ من 70 جنيه وانت طالع، وتروح بقى علشان كده تبزير أوفر الصراحة.السخن

الغردقة: 2000 جنيه لـ4 أيام

احسن المصايف في مصر

الغردقة – احسن المصايف في مصرفي ناس بـ تعتبر الغردقة أجمل مكان في مصر، هو يستاهل الضجة بصراحة، مكان بيجمع كل حاجة، الجمال والخدمات والاسترخاء.

حتة الأسعار دي انت اللي تقدر تتحكم فيها، ممكن اليوم يقفل معاك 100 جنيه، وممكن يقفل 1000، يعني هـ تلاقي أماكن غالية جدًا، وأماكن رخيصة، انت وميزانيتك بقى.

الخروجات والأنشطة كتير أوي في الغردقة زي: “الممشى – رحلات الجزر – السفاري -السنوركيلنج – السهرات الليلية….”

مطروح: 1500 لـ 4 أيام

احسن المصايف في مصر
مطروح شاطئ كليوباترا

بلد السحر والجمال، وشط عجيبة والغرام، وروميل.. أنضف ميه في مصر حرفيًا.

لو عاوز تروح مصيف علشان تنزل ميه حلوة ونضيفة وتقضي يومين مع العيلة وبتاع، لأنها مناسبة للجو الأسري جدًا.

الأسعار هناك مش غالية، سواء فنادق أو شقق، المتوسط مثلا 200 جنيه الليلة، ومواصلاتها مفيش أسهل منها “قطار”.

مطروح مليانة خدمات، لأنها مش مدينة جديدة يعني، ومليانة أماكن خروجات، شارع إسكندرية وسوق ليبيا والكورنيش، انت عمرك ما هـ ترجع مش مبسوط من هناك!

إسكندرية: 1500 لـ 4 أيام

احسن المصايف في مصر
صورة لبحر اسكندرية من فوق قلعة قيتباي

هي اسكندرية اه بقت زحمة، واه ممكن بحرها في الصيف معدش نضيف في أغلب الشواطئ زي الأول، وطبعًا اسكندرية تتراح في الشتا.. بس عمرنا ما نقدر نستغنى عن طلعة اسكندرية في الصيف كمان.

اطلع اسكندرية ولو يوم صد رد، روح القلعة واتفرج على البحر على جمال اسكندرية الحقيقي من هناك، روح اضرب كام سندوتش كبدة من الفلاح، هات أيس كريم واتمشى على الكورنيش، ده كفاية أعتقد.

لو لازم تنزل بحر، في شواطئ ممكن تقضي فيها داي يوز، بـ 200 جنيه بس، زي المنتزه، وشط الهليتون.

خروجة اسكندرية مش هـ تكلفك أكتر من 200 جنيه، لو يوم واحد، ولو عاوز تقضي كام يوم، أسعار الفنادق والكافيهات مش غالي، تقريبًا في حدود 150 لـ 200 جنيه في الليلة.

لو قعدت بقى في اسكندرية، ما تبطلش لف الكام يوم اللي انت قاعدهم، والأماكن مفيش أكتر منها: “المكتبة – القلعة – وسط البلد ومحطة الرمل – وتزور الأماكن الأثرية القديمة”.

بواسطة محمد أبوزيد

محرر محتوى عربي، بشركة "وصلة" وموقع المحتوى الخاص بها "وصلة فيد" اهتم بالقضايا الاجتماعية والفنية بشكل خاص، كما أنني أكتب في المجالات العلمية والتقنية وما يخص الجانب الترفيهي.

ما هو رأيك ؟

Comments

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

Loading…

0

“شاهد قبل الحذف”… المصريين أكبر المخدوعين بـ الأخبار المضللة ‍♀️

إزاي تظبط (الإريال) وتتفرج على مباريات كأس أمم أفريقيا؟ خطوات بسيطة