مصر مليانة بالكنوز الطبيعية، اللي للأسف احنا ممكن مانكونش شايفينها، من الكنوز دي .. دهب أجمل مكان في الشرق الأوسط، في تقييم قناة “ناشيونال جيوجرافيك” الأمريكية.
في اللي جاي هـ نتكلم عن أجمل مكان في الشرق الأوسط، وإيه سبب تصدرها قائمة منصة الطبيعة الأشهر:
مدينة دهب في جنوب سيناء، بينها وبين شرم الشيخ 100 كم، مشهورة بطبيعتها الخلابة، اللي بـ تاخد العقل.
كل حتة في دهب أجمل من التانية، وفي ألف نشاط ممكن تعمله هناك:
الغطس: آلاف بـ يزوروا مدينة دهب من كل حتّة مخصوص عشان الطبيعة البحريّة
الغطس من أشهر وأهم النشاطات اللي ممكن تـ تعمل في مدينة دهب.. السُيّاح بـ يجوا من كل حتّة في العالم، علشان يجرّبوا الغطس في “البلو هوول”.
اقرأ أيضًا: احسن المصايف في مصر ⛱ وبأقل الأسعار.. اعرفهم هنا قبل ماتسافر ♀️
وطبعًا في الغطس 100 فايدة معروفة هـ تشوف بقى أحلى شعب مرجانية و هـ تعيش كام دقيقة وسط الطبيعة البحرية بـ كل جمالها
الـ سنوركيلنج.. أسهل من الغطس وممتع
دهب بـ تتميز بـ إن فيها أجمل شواطئ العالم، لأن الطبيعة فعلًا بـ تغزو كل شبر فيها…
وأكيد ماينفعش تفوِّت فرصة إنك تعمل سنوركيلنج وانت في دهب.. خاصةً لو ماكنتش جرّبت الغطس!
السنوركيلنج غير الغطس، لأنك بـ تكون عايم على وش الميّة، راسك بس اللي بتنزل تحت عشان تتفرّج على الطبيعة البحريّة، وتستمتع بـ الشعب والأسماك اللي بـ تعوم على مسافات قريبة منك.
من أجمل مناطق السفاري في العالم
رحلات السفاري من الحاجات المحبوبة لأي حد بـ يزور مدينة دهب ، أو شرم الشيخ أو طابا.. سواء وقت الشروق أو الغروب.
الانطلاق في الصحاري بـ البيتش باجي، والدخول وسط الجبال مغامرة ممتعة لأقصى درجة لازم تجرّبها
اليوجا في مدينة دهب غيييير!
تمارين اليوجا والسلام النفسي، من أعظم النشاطات اللي ممكن تعملها في حياتك، لكنها مختلفة جدًا في دهب، وسط الطبيعة الرائعة.
مواضيع ذات صلة:
أصلًا التواجد في دهب في حد ذاته كافي للراحة النفسيّة، يخرَّج الطاقة السلبية من الجسم، حتى بدون أي تمارين!
السهرة البدوية من أيقونات الرحلات في دهب
خروجات دهب كتييير.. ماينفعش تكون في دهب وماتقضيش يوم في سهرة بدوية، جو الخيَّم والشويّ، والأكل البدوي، والمزيكا، حاجة كده خياااال!
السهرة بـ تبتدي مع غروب الشمس، وبـ تنتهي وقت ما تحب
Comments
Loading…