نجوم ضحكونا كتير ودلوقتي هما في سرير المرض

احنا شعب “ابن نكتة” زي ما دايمًا بـ يتقال علينا من العالم كله، والكوميديا والكوميديانات المصريين، عملة نادرة.

الكوميديا في مصر طبيعية، وغير مصطنعة، وعلشان كده احنا بنتعلق بالممثلين اللي بـ يضحكونا.

الأيام دي ومع دخول العيد، اللي بـ يعتبر رمز للفرحة لكل المصريين، في 3 نجوم كانوا جزء من فرحتنا، والسنة دي هما في سرير المرض:

محمد نجم – أشهر شخص بـ نشوفه في كل عيد!

محمد نجم أيقونة للكوميديا المصرية، ماينفعش العيد يجي علينا من غير ما نشوف أي حاجة من أعمالها المسرحية، اللي تموت من الضحك!

النجم الكبير اليومين دول راقد في المستشفى في حالة حرجة جدًا، وغيبوبة تامة، وده بعد إصابته بـ جلطتين في المخ ورا بعض.

اقرأ أيضًا: افلام عيد الفطر 2019 – اختار هـ تشوف إيه

نجم الكوميديا، اتولد في يناير سنة 1944، وبدأ التمثيل في السبعينات بعدد كبير من الأعمال الفنية، كان أغلبها مسرحيات، وأخر عمل ليه كان مسرحية “فتحية بيه” في 2018.

حسن حسني – تيمور أنا مش حرامي

كتير أوي إيفاته كانت سبب في رسم الضحكة على وشوشنا، ومين فينا مش فاكر مثلا: “أمك حلوة أوي يالمبي”، “أنا مش حرامي يا تيمور”، “الكيلو 270″، ومشاهده كلها في غبي منه فيه…!

حسن حسني، دخل المستشفى من فترة صغيرة، بسبب أزمة صحية، وعمل شوية عمليات، ونقابة الممثلين، قالت إنه بقى أحسن.

بس كل يوم الإشاعات بـ تكتر حول الموضوع ده، وفيه قلق كبير في الوسط الفني وجمهور حسن حسني.

لكن زوجة الفنان الكبير، قالت في تسجيل صوتي انتشر على المواقع والسوشيال ميديا، إنه بقى “زي الفل”.

حسن حسني، من مواليد أكتوبر 1931، وبدأ العمل الفني، من حوالي 40 سنة تقريبًا، قدم أكتر من 200 عمل فني، بين الأفلام والمسلسلات والمسرحيات الكوميدية.

رجاء الجداوي- 60 سنة شغل متواصل!

أسعدتنا بأدوارها اللي عملتها على مدار 60 سنة تقريبًا، قدمت فيها كل حاجة مبهجة، طلتها على الشاشة، كانت بتفرح القلوب، وقصة شعرها كل الستات كانوا بـ يحبوا يقلدوها.

وكانت الفنانة الكبيرة، اتعرضت لوعكة صحية، دخلت بسببها المستشفى الفترة اللي فاتت، لكن اتعالجت بشكل سريع، وإلى حد ما صحتها بقيت أحسن.

اقرأ أيضًا: الستات مسيطرين على مسلسلات رمضان 2019

وكانت قالت إنها تعرضت لـ جفاف بسبب الصيام، وهي راجعة من الإمارات، ودخلت المستشفى لـ يوم واحد بس، وهي دلوقتي في البيت.

رجاء الجداوي، من مواليد سبتمر 1983، وبدأت العمل الفني، بـ فيلم “غريبة” سنة 1958، وقدمت حوالي 350 عمل على مدار رحلتها.

عزت أبو عوف –  مُكتشف النجوم

على قدر ما كانت شخصية الدكتور ومناخ تربيته مسيطر عليه في الكاريزما والتعامل، بس الروح المرحة المتأصلة فيه ساعدته على تقديم أروع الأعمال اللي عرف يبسط بيها الناس ويدخل الفرحة والبهجة على قلوبهم.

ومين ما يفتكرش، دوره مع عبلة كامل في عودة الندلة، ولا رشدي الأب الهلاس في عمرو وسلمى… وغيره وغيره.

عزت أبو عوف هو أخر المبهجين اللي المرض بـ يحاربهم الأيام دي، وهو دلوقتي في المستشفى في حالة حرجة جدًا، على حسب ما أعلن الناقد طارق الشناوي.

الدكتور والفنان والموسيقار الكبير، عزت أبو عوف، من مواليد أغسطس 1948، وبدأ العمل في السينما من سنة 1992 بـ فيلم “آيس كريم في جليم”، وعلى مدار 27 سنة قدم ما يقارب الـ 200 عمل فني.