(بالفيديو) اعلانات مصرية مسروقة غير اعلان بيبسي

بعد ظهور اعلان بيبسي الأخير انقسمت الآراء ما بين ناس شايفينه أي كلام واستسهال، وناس تانية عاجبها فكرة الاعلان، ونكتشف في الآخر انه مسروق! زيه زي اعلانات مصرية مسروقة من حاجات أجنبية.

في الحقيقة رمضان هو موسم لـ حاجات كتير، من ضمنها الإعلانات، اللي بـ يتصرف عليها فلوس كتير جدًا، علشان تطلع بشكل حلو ينافس، ويعجب الجمهور.

بس للأسف دايمًا بـ نتصدم في الإعلانات الحلوة لمّا نكتشف إن فكرتها مسروقة، وهما بصراحة كتروا قوي!

إعلان بيبسي

إعلان بيبسي من الإعلانات اللي عملت بلبلة بعد ما نزل، لـ أكتر من سبب:

أولًا: لأن الإعلان مش على نفس المستوى اللي متعودين عليه من بيبسي.

ثانيًا: تيمة النوستالجيا والكلام ده بقى كليشيه، وحتى لو بـ يعجب فئة من الناس، فـ في فئة تانية أكبر مش بـ يعجبها الجو ده!

ثالثًا: الإعلان ده نزل بعد حملة من بيبسي (صلاح، وميسي) كان باين فيها قلة المجهود الإنتاجي، فـ توقعنا انهم بـ يحوشوا لـ التقيل بتاع رمضان!

رابعًا: والأهم بقى، إن الفكرة اللي فيها العِبر دي، تطلع مسروقة أصلًا!

مسروقة؟ طب إزاي؟، والله أنا زي زيك بالظبط، بـ أدور على يوتيوب، قابلني الإعلان ده:

ده إعلان لـ تطبيق أكل سعودي، اسمه “هنقرستيشن” نفس الفكرة، ونفس طريقة الإخراج، تفتكر ممكن يكون توارد أفكار؟!

بس واضح كده إن موضوع توارد الأفكار ده، بـ يحصل كتير عندنا في مصر، ما هو ده مش أول إعلان الحقيقة، فيه إعلانات تانية زي:

البنك الأهلي المميكن

إعلان البنك الأهلي، للفرع المميكن بتاعهم، اللي أنتجته شركة TNA، وهي واحدة من أكبر شركات الإعلانات في مصر.

الإعلان ماحدش اختلف على جودته، هو حلو من حيث الإخراج والحوار، وعرض الفكرة وسهولة وصولها لـ الناس…

بس للأسف، فيه كلام عليه إنه “مقتبس” من إعلان أجنبي!

فيه تشابه كبير بين إعلان NBE، وإعلان شركة التجارة الإلكترونية الكندية “Lightspeed”.

بس المخرج والكرو بتاع الإعلان المصري، أكدوا إن هما اتفقوا على الفكرة وبدأوا يشتغلوا عليها من قبل ما الإعلان الكندي يطلع بـ حوالي 4 شهور، فهو شكله توارد فعلاً!

بعيدًا عن إعلانات رمضان السنة دي، فيه أكتر من إعلان اتعملوا قبل كده وكان ليهم معجبين كتير بالفكرة، وطلعوا برضه “توارد”!

إعلان مولتو

إعلان مولتو بتاع ماجد الكدواني و درة، اللي بـ يظهروا فيه في كافيه، وبـ يتاقشوا في تغيير شكل المنتج، مع تغيير شكلهم.

الفكرة دي اتعملت قبل إعلان مولتو بـ 5 سنين، في إعلان لـ شركة محسن المية “Mio”، يعني ممكن نعتبره برضه من ضمن اعلانات مصرية مسروقة .

إعلان سيراميكا رويال

من بين كمان قائمة اعلانات مصرية مسروقة ، إعلان سيراميكا رويال، اللي اتعمل من 6 سنين، كان فيه توارد في الأفكار بينه وبين إعلان شركة العربيات العالمية “Dodge”.