(فيديو) جيسيكا كوكس بـ تسوق طيارة برجليها✈

“واجهت كل مخاوفي.. ودلوقتي أعرف أعمل كل اللي الطياريين بـ يعملوه بـ إيديهم، لكن بـ قدمي”، بالجملة دي بدأت جيسيكا كوكس كلامها لـ محطة CNN.

الملهمة جيسكا كوكس، اللي اتولدت في أمريكا من حوالي 36سنة، من غير ذراعين، اتعلمت في المدارس العادية، لكن كانت اهتماماتها غير عادية.

جيسكا كان ليها كل يوم أكثر من نشاط بعد المدرسة، كشافة، وموسيقى وأزياء، وتعلم سباحة وتايكوندوا، فكرة الاستسلام لإعاقتها كانت مرفوضة تمامًا.

قابلت الملهمة كوكس، مشاكل كثير في طفولتها، وسمعت كلام سلبي من نوع “انت مش هتعرفي تعملي حاجة بسبب إعاقتك”.

جربت استخدام الأطراف الصناعية، وحست إن رجليها الطبيعية أسهل وأحسن كثير.

كانت جيسكا بـ تحب الرحلات الجوية جدًا، بس في نفس الوقت كان عندها شوية خوف، في كل رحلة كانت بـ تطلعها، لحد ما واجهت الخوف ده.

في يوم كانت في رحلة بـ طيارة صغيرة، الطيار قرر أنه يسيب لها كل أدوات التحكم، قدرت تـ تغلب على خوفها، وساقت طيارة لـ أول مرة في حياتها.

الرحلة البسيطة دي، كانت بداية رحلة تانية أكبر في حياة الملهمة جيسيكا كوكس ، فـ بعد أن تخرّجت في جامعة أريزونا سنة 2005، أخذت القرار إنها تبقى طيارة.

#TGIF Let's go fly!https://t.co/LwHMsLqnWU

— Jessica Cox (@jess_feet) May 17, 2019

بحثت عن مدربين متخصصين، وبقى عندها مجموعة كبيرة من مدربي الطيران والمساهمين، واللي ساعدوا ان جيسيكا كوكس تـ تعلم بـ إتقان خلال 3 سنين فقط.

في سنة 2008، إعتمدت إدارة الطيران الفيدرالية، جيسكا كوكس، كـ طيارة متخصصة في “الإيركوب”، ودي طيارة رياضية خفيفة، أتقنت سواقتها.

مش بس الطيران هو الحاجة الوحيدة اللي تفوقت فيها جيسيكا كوكس على إعاقتها، لكن كمان هي ناجحة جدًا في الغوص، ومعاها حزام أسود في التايكوندو.

من كمية الطاقة الإيجابية، والإلهام اللي عند جيسكا كوكس، فيه أكثر من 20 دولة، اختاروها علشان تكون متحدث تحفيزي عندهم.

بواسطة محمد أبوزيد