fbpx

التليفزيون ممل؟😒 خليك على يوتيوب وشوف القنوات دي

في رمضان كلنا بـ نحتاج حاجة نسلي بيها صيامنا، زي اننا نـ تفرج على التلفزيون.. نقرأ، نعمل أي نشاطات مفيدة، أو حتى مش مفيدة.. المهم نـ خلص فيها اليوم.

خصوصًا إن فيه أزمة السنة دي، وصعوبة بـ نقابلها علشان نJ شوف المسلسلات أون لاين، علشان أوقات مش بـ نلحقها على التلفزيون، وبـ التالي فرصة انك تـ تابع مسلسل بـ انتظام، مابقتش موجودة واللي بـ يروح مابيرجعش!

جمعنالك أفضل قنوات على يوتيوب اللي بـ تعرض برامج ومسلسلات وفيديوهات ترفيهية عشان تJ تابعهم بدل التليفزيون:

كريزي تاكسي

ده برنامج مقالب بـ يتعرض على اليوتيوب، على قناة “وان كوميدي”، البرنامج جزء تمثيل وجزء واقعي.

اقرأ أيضًا: رمضان 2019: حاجات ممكن تعملها وقت الفاصل الإعلاني

تقريبًا “كريزي تاكسي” بـ إمكانياته البسيطة مقارنة بـ برامج المقالب بتاعة اليومين دول، هو الأفضل.

مش هـ تشوف ممثلين ولا “تش فريش”، بس مش هـ تبطل ضحك من خفة المحتوى.

حلوة رمضان

لكل المهتمات بـ الفاشون، خصوصًا الميكب أب، قناة “ميك أب فور ايفر” على اليوتيوب، بـ تعمل برنامج اسمه “حلوة رمضان”.

البرنامج بـ يجيب كل يوم موديل من الفنانات ونجمات الوطن العربي، ومعاها حد من أشطر الميك أب أرتيست، وبـ يعملوا فينش لطيف لها وبذكر الخطوات والأدوات.

تكتيك

ده برنامج اجتماعي لطيف وهادف جدًا، لكل زوجين، والتشباب عمومًا، بـ تقدمه قناة “آرام تي في” على يوتيوب.

فكرة البرنامج بـ تدور حوالين شوية اختبارات لـ الأزواج، بتبين مدى توافقهم، وثقتهم وتقبلهم لبعض.

رمضان مع أمير

الداعية الشاب أمير منير، ديمًا متعود انه ينشر فيديوهات بصفة منتظمة على مدار السنة، بـ يناقش فيها مواضيع تخص الشباب على السوشيال ميديا.

في رمضان السنة دي، خصص جزء في قناته على يوتيوب لنشر مجموعة حلقات في رمضان بعنوان “رمضان مع أمير”.

بـ يتكلم أمير في الحلقات دي، عن العادات الحلوة اللي المفروض نعملها علشان نكسب رمضان، والعادات الوحشة اللي نبعد عنها.

يانا يانتي

ده مسلسل كارتون، بـ يعمله أحمد حلمي ومنى زكي، ومعاهم نجوم كبار كتير زي: دلال عبد العزيز، وإدوارد، ورجاء الجداوي، وحمادة بركات، وهبة عبد الغني، وسامية عاطف.

مسلسل “يانا يانتي” بـ يتعرض على قناة “فنون” على اليوتيوب، خلال شهر رمضان.

قلبي اطمأن

برنامج خيري هادف على يوتيوب، بـ يقدمه شاب إماراتي اسمه “غيث”، اللي بـ يحاول يلف العالم العربي، ويعيش تجارب اجتماعية مختلفة، ويشاركها مع الناس.

البرنامج بـ رعاية الهلال الأحمر الإماراتي، وبـ يسعى انه يدخل السرور على الناس اللي ضاقت بهم الأرض، ويغيّر حياتهم لـ الأفضل.

Plant B

ده برنامج بـ يعمله باسم يوسف، هو خاص شوية بـ النباتيين، بس لو عاوز تفهم أكتر عن النظام النباتي أو الفيجن، وفوايده، وتاخد فكرة وتشتري بكرا عادي.

اقرأ أيضًا: أغرب 7 أشخاص هتلاقيهم في عزومات رمضان.. انت مين فيهم؟

طبعًا أي حاجة باسم يوسف بـ يعملها حلوة يعني، فـ البرنامج هـ يعجبك لا تقلق.

تجربة ما تمت

ده مسلسل بـ يعمله مجموعة من الممثلين المصريين الشباب، اللي مش لاقيين فرصة كبيرة في الأعمال الرمضانية الكبيرة اللي بـ تتعرض على التلفزيون.

قرروا انهم يعملوا حاجة ليهم يقدروا يطلعوا فيها إبداعهم على يوتيوب.

الدحيح

لو انت من متابعين أحمد الغندور في المطلق، فاستمر وتابع الحلقات اللي بـ ينزلها في رمضان.

ولو انت مكنتش بـ تتابع “الدحيح”، أو ماتعرفهوش، فـ هو برنامج بـ يتعرض على قناة “AJ+” على يوتيوب، وبـ يقدم محتوى علمي في شكل ترفيهي لذيذ، هـ تحبه وهـ يفيدك جدًا.

بيسوهات

لو انت من الناس اللي بـ تحب السفر، فـ دي قناة على اليوتيوب، بـ يقدمها “بيسو” وأصحابه.

“بيسو” شاب بيحب السفر، والمشاركة، فـ محتوى البرنامج هـ تلاقيه عبارة عن مشاركات خبرات من ناس من أماكن كتير، ومعلومات حقيقية جدًا، والسولجان بتاعهم “لف العالم وانت في بيتك”.