مش بس تايسون المصري.. نجوم كتير عاشوا واشتغلوا بمرضهم

زي كل سنة بـ يبدأ موسم مسلسلات رمضان، وبـ يبدأ معاه موسم المتابعة والتحليل والنقد على السوشيال ميديا، من ناحية الجمهور.

تعليقات الجمهور السنة دي ركزت مع الفنان محمد ممدوح، المشهور بـ “تايسون المصري”، في الدورين اللي عاملهم في “ولد الغلابة”، و “قابيل”.

ورغم أداؤه الحلو جدًا في الدورين المختلفين عن بعض تمامًا، إلا أن الجمهور انتقد عدم وضوح صوت تايسون، و اعتبروه “عناد” معاهم، لأن دي مش المرة الأولى اللي يعلقوا ليه على الموضوع ده، من غير وجود استجابة منه لعلاج المشكلة.

ومن ساعات، ظهرت تصريحات من مقربين لـ “تايسون المصري” أو محمد ممدوح، أكدت أنه فهم طبيعة المشكلة وفعلًا بدأ في رحلة العلاج اللي هـ تاخد وقت، والمفروض الجمهور يستنى عليه مش يهاجمه.

وفي الحقيقة، لما دورنا لقينا ان مش بس محمد ممدوح اللي بـ يشتغل وبـ يظهر رغم انه مريض، لكن فيه نجوم كتير عملوا ده:

عبد الحليم حافظ

معروف طبعًا ان حليم كان عنده بلهاريسيا من وهو صغير، بس المرض اتطور عنده في أصعب أوقات حياته وفي عز شهرته، بس ده مامنعش العندليب الأسمر من الغناء، وانه يعيش حياته عادي.

أم كلثوم

كوكب الشرق كانت بـ تعاني من مرض خطير في الغدة الدرقية، أثر على حاجات كتير في جسمها، ومن ضمنها العين، وده سر لبسها لـ النضارة الشمس دايمًا.

وكانت بـ تغني عادي، في نفس الوقت اللي كانت بـ تتعالج فيه من المرض ده، لـ حد ما انتصر عليها المرض، لـ الأسف.

معالي زايد

كانت مريضة بـ سرطان في الرئة، وبدأت رحلة العلاج، وماوقفتش تمثيل، وآخر عمل ليها قبل ما تتوفى في نوفمبر 2017، كان مسلسل “موجة حارة”.

أحمد زكي

اكتشف مرض السرطان في أواخره، وكان وقتها بـ يشتغل على فيلم “حليم”، اللي جسد من خلاله السيرة الذاتية لـ عبد الحليم حافظ.

اقرأ أيضًا: الستات مسيطرين على مسلسلات رمضان 2019

المفروض ان المرض اشتد على “الرجل المهم”، ودخل المستشفى أكتر من مرة، وقت “حليم”، وكان بـ يطلب من المخرج يستغل وجوده على سرير المرض، ويـ صوّر مشاهد مرض عبد الحليم، الخاصة بـ الفيلم.

ويعتبر “حليم” فيلم اعتزال العبقري أحمد زكي عن السينما وعن الحياة كلها.

أحمد عدوية

من الناس القوية جدًا اللي بـ يواجهوا مرضهم بكل الطرق، عم أحمد عدوية عنده شلل رباعي من فترة كبيرة.

بس ده عمره ما منعه من الظهور، سواء في إعلانات أو برامج، أو حتى في أغاني خاصة بيه، ومحب لـ الحياة جدًا.

وكمان عمل ألبوم كامل السنة اللي فاتت اسمه “الأستاذ”.

خالد صالح

كان عنده مشاكل مزمنة في القلب، بس كان رامي المرض ورا ظهره، ومكمل في طريقه الفني، لـ حد ما صنع حفر اسمه بالدهب على جدران الفن المصري، قبل ما ينتصر عليه المرض في الآخر، ويغيب عننا في 2014.

خالد الصاوي

اكتشف النجم المصري خالد الصاوي انه مريض بـ فيروس سي، وده ماأثرش على نفسيته بـ السلب خالص، بالعكس أخد الموضوع كأنه داخل حرب، وقال انه هـ ينتصر عليه.

فاروق الفيشاوي

بـ يعاني من سرطان في العظم، واكتشفه قبل ما يعمل فيلم “ليلة هنا وسرور”، لكنه موقفش شغله، وكمل ومكمل حياته بشكل طبيعي خالص.

حورية فرغلي

كان فيه أخبار كتير انتشرت حوالين مرضها، وده قبل ما تعلن إنها اتصابت بمرض خطير، اتسبب في انها تشيل الرحم.

اقرأ أيضًا: 7 نجوم مش هنشوفهم في رمضان 2019…

بـ رغم كده، حورية كملت شغل عادي من وهي في فترة علاجها، وحتى بعد ما اتعالجت.

محمود عبد العزيز

عانى الساحر محمود عبد العزيز، قبل وفاته من سرطان نادر في الجيوب الأنفية، وقعد فترة كبيرة في رحلة علاج، ما وقفش فيها عن التمثيل، وفضل مكمل لـ حد آخر نفس.

أحمد حلمي

اكتشف حلمي من فترة، ان عنده سرطان في ظهره، بالتحديد وقت تصوير “صنع في مصر” لكن المرض كان في المراحل الأولى.

حلمي ما أخدش الموضوع بـ الصعوبة والخضة اللي بـ تحصل لـ ناس كتير، وكمل حياته وعمل عملية نجحت في استئصال الورم.

ميرنا المهندس

عانت ميرنا من سرطان في القولون 13 سنة، حاولت فيهم العلاج وقاومت المرض، وما وقفتش حياتها.

لكن المرض كان كل مرة بـ يرجع يضربها ضربة أقوى من اللي قبلها، لـ حد ما أنهى حياتها في 2015.

باسل خياط

اتكلم باسل خياط من فترة، وهو في لقاء تلفزيوني، انه بـ يعاني من مرض حمى البحر المتوسط، وقال ان المرض صعب عليه، لكنه بـ يواجهه على قد ما يقدر بـ المسكنات.

روبي

من سنتين كانت انتشرت أخبار إن روبي بـ تعاني من مرض ما، منعها من تمثيل بعض أدوارها، لحد ما طلعت روبي وصرحت ان عندها مرض في الكبد، وهي بـ تعالجه، وانه مش موقف حياتها خالص.