fbpx

اماكن افطار 2019.. اخترنا احسن المطاعم في القاهرة

لمة افطار رمضان وانك تعيش الأجواء الرمضانية مع العيلة أو الصحاب، أجمل إحساس في الكون سواء كان عزومة في بيت أو حتى خروجة بره للفطار في أي مكان لطيف.

احنا هنا جمعنالك أهم وأشهر الأماكن اللي ممكن تفطروا فيها وتقضوا وقت جميل في القاهرة:

بـاستـا فاكتوري

من أحسن اماكن لمة افطار رمضان واللي بـ تعمل مكرونات جبارة! عندهم عروض حلوة في شهر رمضان، ولاغيين الخدمة والضريبة طول الشهر ده.

اقرأ أيضًا: اماكن افطار على النيل في القاهرة.. (الزمالك – المنيل – الدقي – المعادي)

المكان واخد الاستايل الأمريكي، على عكس ما هو معروف عن مطاعم الباستا وانها بتكون بـ طابع إيطالي.

العنوان: 39 شارع شارع عبدالرازق السنهوري، متفرع من شارع مكرم عبيد، مدينة نصر.

 نايل سوبريم – من افضل اماكن افطار في القاهرة

لو كنت من هواة الرحلات النيلية، يبقى خروجة فطارك هـ تكون في مطعم عائم، وياحبذا لو كانت باخرة متحركة.

الباخرة نايل سوبريم، بـ تقدم رحلات فطار وسحور نيلية في رمضان، حوالي ساعتين ونص في النيل.

اقرأ أيضًا: أفضل مطاعم القاهرة.. (مدينة نصر ومصر الجديدة والتجمع) هتاكل فين النهارده؟ 😋

الرحلة بـ تبدأ من أذان المغرب والفطار، المركب بـ تكون ثابتة نص ساعة.

الأكل إما بوفية مفتوح أو منيو، ومفيش فرق كبير في الأسعار بينهم، بعد الفطار المركب بتتحرك لمدة ساعتين في رحلة لطيفة في نيل القاهرة، مع شوية برامج ترفيهية من غناء وفقرات استعراضية.

الأسعار بين 200 – 300، الأطفال تحت 5 سنين مجاني، وتحت 10 سنين 50%.

العنوان: كورنيش النيل,المعادى بجوار جراند كافيه و كنيسة العذراء مدخل 2 كازينو نادي الشاطئ.

Frosty Eg

افطار رمضان 2019
افطار رمضان 2019

ده مكان لـ الفطار الشيك والسمباتيك، يعني لو انت من الناس اللي بـ تهتم ان خروجتها تكون في مكان أنيق ومريح وجودة ومعاملة وخدمة ممتازة، فـ ده أحسن مكان تخرج فيه، أبيض X أبيض وديكور رمضاني جميل.

السنة دي أول سنة ليهم في رمضان، وعندهم منيو لذيذ للوجبات الجاهزة، صنية مسقعة، حواوشي، لازانيا، فراخ مسحب، chicken strips و اختيارات تانية متنوعة تقدر تختار اللي يناسبك منها.

الأسعار ما بين 130 – 160 جنيه، ومفيش أي زيادات في الخدمة أو الضريبة.

العنوان: 53 شارع مصر حلوان الزراعي، بجوار أكاديمية السادات، توكيل غبور للسيارات – المعادي.

حمزة – مدينة نصر

لو بتفكر في خروجة فطار حلوة مع صحابك أو عيلتك، في اليوم الفري، يبقى البسوا الجلاليب واطلعوا على حمزة، عامل منيو هايل في رمضان السنة دي، بس هيحتاج تحجز قبلها…

ودي أرقام الحجوزات: ٠١٠٠٣٠٣٢١٤٢ – ٠١٠٠٣٠٤٤٨٠٦

العنوان: ٤أ عمارات الشرق للتأمين , امام الباب الرئيسى للحديقه الدوليه , مدينة نصر.

Oldish

من الأماكن اللي بـ تجمع كذا حاجة مع بعض، جودة أكل، جودة خدمة، كمان مكان لطيف فوق ما تتخيل.. من أهم أماكن إفطار 2019 في وسط البلد.

لو عاوز تـ شبّرق بقى على عيلتك أو صحابك، أو لو قررت تعمل حركة شيك وتخرج تفطر انت ومراتك في مكان سو رومانتيك، مش هـ تلاقي أحلى من المكان ده، خصوصًا إن أسعاره كمان مش غالية جدًا مقارنة بـ الكواليتي دي.

المنيو فيه اختيارات كتير، وأسعاره بين 150 و 200 جنيه، بس ده من غير ضريبة الخدمة، والأحسن تحجز قبل ما تروح.

العناوين: فرع مصر الجديدة : 61 شارع ابو بكر الصديق – ميدان سفير .

فرع وسط البلد : 20 شارع محمد محمود – خلف الجريك كامبس.

مطعم وكافية – صاحب السعادة

إفطار رمضان 2019
إفطار رمضان 2019

خروجات رمضان يعني شارع المعز والحسين، أول ما تسمع كلمة نخرج في رمضان أول مكان بـ يجي على بالك الحسين وشارع المعز.

مطعم وكافية صاحب السعادة، روف في شارع المعز قمة في الروقان، وأجواء رمضانية مع التراث وأضواء مساجد شارع المعز، وتخت شرقي.

اقرأ أيضًا: صلاة التراويح: جمعنالك أشهر مساجد القاهرة بالعناوين

المنيو بتاعهم محترم وأسعاره لطيفة، يعني ممكن تبدأ في الطواجن من 100 جنيه، والحلويات متوسط 30 جنيه، وأسعار الولايم بتبدأ من 300 جنيه.

العنوان: ١٢١ شارع المعز لدين الله الفاطمى امام جامع برقوق وقلاون بجوار متحف النسيج.

Capital Business Park

إفطار رمضان 2019
إفطار رمضان 2019

المكان ده قطعة من أوروبا في الشيخ زايد 6 أكتوبر، مبهج وشغل كده فاخر من الاخر من ديكورات ومحلات كتير وفيها كل حاجة، بـ تديك فرصة تختار براحتك.

الأسعار في المطاعم هناك مش رخيصة بصراحة، بس هو يوم بقى وانك تفرح وتفرح ولادك وعيلتك دي أهم من الفلوس، بس خلي بالك وانت بتصرف برضه.

العنوان: مدينة الشيخ زايد على المحور الرئيسى بعد هايبر وان، قبل مدخل زايد 2000.

R&J

إفطار رمضان 2019
إفطار رمضان 2019

ده مكان في المعادي عبارة عن فيلا دورين، الدور الأول للهدوء والاستجمام والانسجام، والدور التاني ميوزك ومود رمضاني، وكمان فيه تراس كبير يلم العيلة والصحاب وعلى النيل.

أوبن بوفية فيه، ٧ أنواع سلاط، نوع شوربة، مقبلات سمبوسك، و محاشى. ممبار، ٢ نوع معجنات، ٢ نوع لحوم بلدى، ٢ نوع فراخ، ٢ نوع رز بالخلطة، ٢ مشروب رمضان، بوفية حلو شرقى او فاكهة الموسم 220 جنيه.

العنوان: كورنيش النيل المعادى بجوار جمعية الاورمان بين المدخل الأول أكاديمية السادات والمدخل التاني محطة توتال أمام معدية المعادى.

الحضرة

ده بقى اتعمل مخصوص للعزومات الكبيرة، والناس اللي بـ تحب تعزم برة البيت في رمضان، ده هـ يكون مكان مناسب.. يعتبر من أهم أماكن إفطار 2019 .

المنيو بتاعهم مليان حاجات ترد الروح، حمام محشي، وطواجن بـ كل الأشكال والأنواع، لحوم بـ ألف طريقة، وبـ تحتاج تحجز قبل العزومة بـ وقت كافي.

الأسعار: الأربع أفراد بـ 1200 جنيه – ستة أفراد بـ 2000جنيه، ومافيش لا ضرايب ولا خدمة.

العنوان: مدينة نصر ، أمام بوابة فندق الإنتركونتيننتال بسيتى ستارز.

Arkan plaza

إفطار رمضان 2019
إفطار رمضان 2019

أركان مول من الأماكن الحلوة جدًا في الخروجات، بالذات بقى في الأوقات اللي فيها مناسبات زي شهر رمضان، بـ يكونوا مظبطين شوية ديكورات جميلة جدًا، بـ تخليك تعيش كده مود رمضان.

المول فيه كافيهات ومطاعم حلوة كتير، أسعارها غالية شوية، بس مش هـ تندم يعني.

العنوان: مدخل زايد 2000، 6أكتوبر.

La siesta

إفطار رمضان 2019
إفطار رمضان 2019

ده بقى المكان اللي حطم الأسعار وقال “وداعًا لغلاء التجار” بجد، بـ يوفرلك قعدة شيك مع عيلتك وكمان فيه كيدز إيريا، بـ مشرفات على أطفالك، وفيه قعدة جاردن تحفة.

 كمان بـ يقدَّر الشباب المطحون، وبـ يديهم فرصة يعزموا أصحابهم بـ راحتهم، في مكان شيك وجودة أكل ممتازة، بـ سعر في الحنين، هـ تاكل كل اللي انت عاوزة وهتدفع تقريبًا 100 جنيه بس.
المنيو فيه شوية أطباق حلوة، زي: (موزاريلا تشيكن مشروم – كرسبى تشيكن – كوردون بلو – تشيكن تندورى – شيش طاووق – فراخ مشوية – مكرونة سباجتى مع كرات اللحمة، و بتختار كمان طبق جانبي “رز – مكرونة – بطاطس محمرة أو مهروسة – سوتيه).
العنوان: المنطقة ١٣ – زهراء المعادى – بجوار مزارع دينا.

ليالي ميراج

دي من أكبر وأشهر الخيم الرمضانية، لو حابب تفصل بقى أو تعزم عزومة تقيلة شوية.

المكان ده مليان بـ الممثلين والمشاهير، فـ ممكن تبقى فرصة ليك لو بتحب تعمل علاقات وكده!

أسعارهم غالية شوية، وعندهم عروض كويسة في المنيو بتاعهم من حيث تنوع الأكلات، وكمان عندهم فقرات غنائية كل يوم لـ مطربين مشهورين.

العنوان: الطريق الدائري، مدينة المعراج، فندق جي دبليو ماريوت القاهرة.

Mezaj World

عندك إجارة مثلا، ونفسك تخرج انت واصحابك أو انت وعيلتك، وتـ كسروا الروتين الرمضاني، بتاع القعدة في البيت.

المكان ده مناسب جدًا لـ خروجة كاملة، فسحة حلوة، لعب وحمام سباحة، ورحلات نيلية طول اليوم، وبالليل بقى فطار “أوبن بوفيه” وقعدة روقان على النيل، وكل ده في حدود 200 جنيه للفرد تقريبًا، أنا نفسي مش مصدق زيك بالظبط، هي حاجة خيالية فعلا!

اقرأ أيضًا: ادخل ما تخافش.. اشهر اماكن الرعب في مصر🤔

العنوان: كورنيش المعادي – مدخل المعادي رقم 2 – مرسى نادي الشاطئ- بوابة رقم 3 , بـ توصل و بـ تركب المركب بـ توصلك لغاية الكافية.. أقرب محطة مترو >> المعادي.

من اماكن افطار رمضان – Geo

اماكن افطار
دول ملوك الأوبن بوفيه في افطار رمضان ، تخصص، مقدرين ان الناس بـ تزهق، فـ بيجددوا في الأكل بـ استمرار.
رافعين شعار “أحلى قعدة في المهندسين”، وبالنسبة للأسعار، فـ انت هتاكل كل اللي انت عاوزه ومش هـ تدفع أكتر من 200 جنيه.
العنوان: 30 شارع إسراء متفرع من شارع لبنان – المهندسين.