رمضان 2019 جاي في ظروف صعبة وحر، وفرهدة، وامتحانات، واللي محافظ على صيامه كـ القابض على الجمر سعادتك.. وعشان كده في أشخاص ماينفعش تقابلهم في نهار رمضان.
وعلشان احنا عارفين ان الموضوع صعب، وانك على تكة أصلًا، فـ احنا هـ نعرضلك دلوقتي أهم حاجة تساعدك تحافظ على صيامك.
ده منيو بـ 5 أشخاص التعامل معاهم ممكن يضيَّع صيامك على حاجات مش مستاهلة:
السواق البارد
وده بقى اللي تبقى نازل الصبح متأخر على شغلك، والقدر يرميه في طريقك فـ تركب معاه، تـ لاقيه بـ يوقف كل لحظة لـ أتفه الأسباب.. “افتكر موقف ضايقه”، “واحدة عجبته”، “تليفونه رن”، وحاجات كده مش منطقية.
اقرأ أيضًا: رمضان 2019: حاجات ممكن تعملها وقت الفاصل الإعلاني
الشخصية دي لما تترزق بيها على الصبح وانت رايح الشغل ومتأخر، وش حد داعي عليك، بس حاول تـ تمالك أعصابك، ممكن تزعق فيه بس علشان يحس على دمه، بس من غير ما تشتم، ابقى قول “اللهم اني صائم”.
صاحبك النمَّام
صاحبك اللي كل ما تـ شوفه أو تـ كلمه في أي وقت، يمسك سيرة كل الناس اللي تـ عرفوهم واللي ما تـ عرفوهمش، ويـ قطع في فروتهم.
نصيحة.. ابعد عنه، على الأقل في نهار رمضان، علشان ماتخسرش صيامك بسبب حاجة زي دي.
الحرّيقة
ومن الناس اللي ماينفعش تقابلهم في نهار رمضان الأشخاص اللي بـ تتغذى على حرق كل حاجة في الوجود.
ابعد عنهم، خصوصًا لو كنت شخص مبتحبش حد يحرقلك حاجة.
مواضيع ذات صلة:
وده علشان تتجنب انك تتعصب عليه وتشتمه أو تقول أي لفظ خارج مثلا، حتى لو كان تعبير عن اندهاش.
الصاحب الفرفوش
هو الصاحب الفرفوش رزق، ما قولناش حاجة، لكن للأسف في رمضان بعض الصحاب الفرفوشين، المختصين بـ قسم معين من الفرفشة ممكن يأثروا على صيامك.
يعني مثلًا ممكن يـ بعتلك صورة لـ”داني” مثلًا من أخر حلقة من جيم أوف ثرونز، بعيدًا عن رد فعلك تجاه الصورة…
هي “داني” أصلًا من المفطرات.. والله أعلم.
ملوك الشتيمة
الناس الخلوقة بـ زيادة، اللي طول الوقت الشتيمة على لسانهم، بيسبوا بسبب ومن غير سبب.
التعامل معاهم هـ يخليك غصب عنك تدوس معاهم على نفس التراك، وتفتحوها “مسبّبة” بقى، وترفعوا شعار “وداعًا لـ الصيام”.
Comments
Loading…