بالفيديو: أشهر اعلانات شركات المحمول في مصر  

الإعلانات في رمضان، وبـ خصوصًا اعلانات شركات المحمول بقت حاجة أساسية، وماينفعش نقضي الشهر من غيرها، احنا غالبًا بـ نشوف الإعلانات أكتر ما بـ نشوف المسلسلات، وده اللي خلاها بقت شيء مهم بالنسبة لينا في الشهر الكريم.

بس في الحقيقة، الإعلانات من زمان وهي حاجة مهمة، وبتعتبر طريقة كويسة للوصول للجمهور وتعريفه على المنتج، ونجاح الشركات بيكون مرتبط جدًا بنجاح إعلانها بتحقيق هدفه، والوصول للجمهور المناسب في الوقت المناسب.

في اللي جاي هتتعرَّف على  أشهر إعلانات “أورنج- فودافون- اتصالات”:

موبينيل أو أورانج

هي أول شركة خطوط محمول في مصر، ومن بداية ظهورها وهي بتحاول تكون جزء من الشارع المصري.

موبينيل كانت بتركز أوي على اظهار كل فئات الشعب المصري في إعلاناتها، وحتى عروضها كانت لازم بتدي أهمية لكل فرد في مصر، وبالأخص سكان الأقاليم.

وكمان في أول إعلان ليها كان من القطار، لأنه الحاجة اللي معروف انها بتلف كل محافظات مصر.

ومن رمضان 2009 تقريبًا، موبينيل بدأت تركز على الحملات الإعلانية في رمضان، وكانت بتقدم فيها عروض متميزة، لحد ما بقت الناس تستنى إعلانهم كل سنة.

اقرأ أيضًا: إزاي تتفرج على مسلسلات رمضان 2019 في الامتحانات؟

موبينيل بعد كدا بقوا بيعملوا أغاني خاصة بيهم وبينزلوا بيها في حملة رمضان، والموضوع دا عجب الناس أكتر، وارتبطت الشركة في دماغ الناس بكلمات الأغاني دي اللي بقت بتشتغل في الأفراح ولمات الصحاب وفي كل مكان.

خصوصًا بقى ان الأغاني كانت بتضم عدد كبير من المغنيين الشباب والأندرجراوند ومغنيين المهرجانات، اللي الناس بتحبهم.

وفضلوا محافظين على وجودهم في رمضان حتى بعد ما بقى اسمهم أورانج.

فودافون أو كليك

في أول ظهورها كان اسمها “كليك” وفضل اسمها كدا من وقت ظهورها سنة 1999 لحد ما بقت “فودافون مصر” سنة 2003، وبدأت تنافس في الوصول للجمهور المصري عن طريق إعلانات وعروض هي كمان.

وبعدين حسوا ان الإعلانات في رمضان مهمة لـ المنافسة، وان الجمهور في رمضان بـ يكون قاعد أكتر أمام التلفزيون، وبـ يتفاعل مع الإعلانات اللي شكلها حلو وبـ يحبها، فـ نزلوا بـ تقلهم.

إتصالات

اتصالات ظهرت في مصر من 2007، وهي فترة قصيرة قوي، بس قدرت تفهم الجمهور المصري صح، وتدخله من ثغراته، وتقدمله العروض اللي تناسبه في إعلانات مفهومة وواضحة.

وجابوا الكينج محمد منير بـ نفسه عملهم إعلان بصوته.

وزي الشركتين التانيين، اتصالات عرفت قيمة الإعلانات في رمضان، وتأثيرها القوي على الجمهور، فـ اشتغلت على ده هي كمان، وزوّدت المنافسة.

فيه تنافس طول الوقت بين الشركات اللي بينتجوا منتجات شبه بعض، والشاطر اللي يقدم عروض أكتر ويكسب الزبون.

اقرأ أيضًا: روتانا تتعاقد مع محمد رمضان عشان تنتج له أغاني وكليبات!

اعلانات شركات المحمول  في مصر دايمًا فيها منافسة قويّة لـ الوصول لـ الجمهور بـ كل الطرق.. وكل شركة بـ تحاول تكون أحسن من  الشركة التانية، بـ عروض أكتر وإعلانات أحلى تاخد قلب الجمهور قبل ما تاخد عقله.

قولنا بقى إيه أكتر إعلان شوفته وأخد قلبك قبل عقلك..؟