من المعروف إن رمضان شهر اللمة والعزومات، وغالبًا الناس بـ يرتبوا للعزومات دي من قبلها بـ سنة لـ أهمية الحدث العظيم ده!
وبما إننا في أول ويك إند في أكتر شهر مشهور بالعزومات، فـ خلونا نتكلم عن أغرب 7 أشخاص في عزومات رمضان:
الناس اللي بـ تيجي من أول اليوم
خلينا نكون متفقين ان يوم العزومة هو معروف لكل الناس من قبلها بفترة، بس ده مش مبرر للناس اللي بـ تيجي من أول اليوم.
غالبًا يوم العزومة بيكون يوم جمعة، وبنكون ما صدقنا انه يوم اجازة علشان نرتاح فيه، وفجأة تلاقي الباب بيخبط والجرس بيرن والواد بيزن، وتقوم مفزوع من أحلى نومة بتحصلك كل أسبوع مرة.
دي تقريبًا بتكون خالتك اللي جاية من سفر بعيد، ومش بـ تجيلكم غير كل سنة مرة، فـ استحملها هي وعيالها معلش، مهما كان ضيوف في بيتكم بردو.
اقرأ أيضًا: الستات مسيطرين على مسلسلات رمضان 2019
جدو وحكاوي جدو
الغريب في الموضوع ان خالتك مش بتحس بأزمة انها جاية بدري بعيالها في يوم اجازة وصيام، لا دي كمان بـ تكلم بقيت العيلة و أولهم جدو، وتقولهم يجوا هما كمان “علشان يحلقوا يقعدوا مع بعض”!
جدو طبعًا بيجي يلم العيلة حواليه ويعمل مؤتمر عائلي مصغر، علشان يتعرف على الخطط الخمسية والسنوية وأحلام وطموحات ومشكلات أولاده وأحفاده، ويقول نصايحه الثمينة جدًا من خبراته الحياتية.
أي محاولة للخلع من المؤتمر دا بيتحسب عليك، وجدك هيسمع والدتك كلمتين ملهمش لازمة، من نوعية “انت معرفتيش تربي” أو بنبرة فيها حزن كدا “العيال كبروا عليا ومش عاوزين يقعدوا معايا”!
مبيدخلش بإيده فاضية
مواضيع ذات صلة:
الناس اللي ديمًا وهما جايينلكم في أي مناسبة شايلين ومحملين، هما ناس كويسين ومحترمين، بس ده بيحسسك انهم جايين صحرا لا زرع بها ولا ماء، بتبقى عاوز تفتح التلاجة وهي مليانة وتقولهم “نفسي مرة تاخدوا بالكم من دي”.. بس في كل الأحوال هما يستحقوا الشكر.
دول بيكونوا اما جوز خالتك أو عمتك اللي لسة متجوزة جديد، ودا اديله سنة كمان مش هيدخلكوا بيت تاني، أو ممكن يكون صاحبك ابن الناس اللي متربي لأقصى درجة، ودا سيبه للدنيا هي كافية تعلمه.
الناس اللي بتيجي تفطر وتتجوز
بما إن العزومات بتكون فيها لمة وكده، فده بـ يعمل بيئة خصبة للتعارف الجاد ومنتديات أبو نواف، فتلاقي طنط جايبة ابنها أو بنتها وأي حد عندها في سن الجواز، وتقعد بقى تقول قصايد الشعر اللي بتجهزها من السنة للسنة علشان تبيع أكتر.
هو لو ولد فبيستغل قصايد مامته دي فـ الحصول على أقرب فريسة للشقط، هو مش جاي يتجوز ويضيع وقت.
ولو بنت بقى فبتعمل نفسها مكسوفة، وبعدين تنشن على أي واحدة من المعازيم ابنها يكون مخلص هندسة وشغال في الخليج، وتلزقلها بقى وتعيش دور الرقة لحد ما يقروا الفاتحة وهما قاعدين.
اللي بيتتدخلوا في حياة كل الناس
دا بقى أشهر نوع في عزومات رمضان أو في أي مناسبة عمومًا، الناس اللي جاية تنظر ويدخلوا نفسهم في حياتك غصب عنك، وبيسألوا أسئلتهم الرخمة من نوعية “انت خلصت كلية يا حبيبي.. طب هنشوفك عريس امتى بقى؟”، “انت يا بنتي كل اللي في سنك اتجوزوا وبقى ماما!”.
اللي يعزم ناس زي دي يستاهل اللي يجراله.
بيجي يفطر ويمشي
هو احنا ممكن نكون بنتضايق من الناس اللي بتيجي بدري أوي يوم العزومة، والناس اللي بيقعدوا يحكوا لحد ما يصدعونا، بس بردو الناس اللي بيجوا يفطروا ويمشوا دول أغرب ناس في الوجود، والأغرب كمان انهم مبيقولوش انهم هيمشوا.
الناس دي غالبًا بيكونوا متوحدين، عندهم مشاكل، أصل أكيد العزومة والليلة الكبيرة دي مش معمولة علشان تفطر وتمشي يا فندم، حضرتك أكيد فاهم غلط.
اقرأ أيضًا: مسلسلات رمضان 2019 المصرية.. كل اللي انت عايز تعرفه
ودول بقى ناس أكيد منعرفش هما مين، عبارة عن أشباح بيظهروا ويختفوا فجأة كدا، حتى والدك ووالدتك اللي هما عازمينه أصلا مبيعرفوش مين دا!
عزومة أند خروجة دونت ميكس
فيه ناس بتخاف على بيتها تقريبًا من بهدلة العزومات، فبيعملوها في كافيه أو مطعم برة البيت، هي خطة في منتهى الذكاء طبعًا، والفلوس بتعمل كل حاجة، بس الحقيقة الخروجات دي ما بـ يكونش فيها نفس كمية الدفئ العائلي بتاع عزومة البيت.
Comments
Loading…