fbpx

عمرو دياب من الشامبو لـ “جمع حبايبك”.. إعلانات تستحق الضجة

مشوار عمرو دياب في الإعلانات، مليان ومتنوع جدًا، لأنه من زمان بيعتبر براند بيقوي المنتج اللي بيعلن عنه، وكتير من الشركات كانوا بيستغلوا شهرته وجمهوره الكبير في الترويج ليهم بشكل أفضل.

مشوار عمرو دياب في الإعلانات
مشوار عمرو دياب في الإعلانات

إعلان شامبو “هيد اند شولدرز” – سنة 1992

ده كان أول إعلان للهضبة، وكان وقتها مشهور بشعره الكبير، علشان كدا شركة الشامبو استغلت دا في إنه يبقى بطل إعلانهم.

كمان عمرو غنى في أخر الإعلان أغنية “ما بلاش نتكلم في الماضي.. دا الماضي كان كله جراح”.

إعلان موبينيل “ألو” – سنة 1999

بعد ظهور شركة موبينيل كـ أول شركة محمول في مصر سنة 1998، حبوا انهم يوصلوا لأكبر عدد من الناس، ودا خلاهم يعملوا إعلان فيديو على التلفزيون، ويكون بطله عمرو دياب.

اقرأ أيضًا: الستات مسيطرين على مسلسلات رمضان 2019😍

الغريب في الإعلان ده إن الهضبة مغناش فيه زي العادي، وحتى مظهرش غير في لقطة واحدة أخر الإعلان وهو بيقول “ألوو”!.

إعلانات بيبسي.. من 2001 – 2017

إعلان “أنا أكتر واحد بيحبك”، ده كان أول إعلان للهضبة مع الشركة العالمية للحاجة الساقعة، وجه بعد غياب ملحوظ ليه عن الشاشات.

الإعلان ده عمل ضجة وقتها، لأن عمرو دياب كسر التابوه اللي كان ديمًا بيطلع بيه، انه قليل الكلام وكده.

وظهر في الإعلان وهو بيعاكس واحدة في التليفون، وبيقولها “أغنيلك؟”، وقام مغني أشهر أغنية ليه في الوقت دا “أنا أكتر واحد بيحبك”.

علشان الهضبة عالمي أصلا، اختارته شركة بيبسي لعمل إعلان عالمي مع شاكيرا.

بيظهر عمرو دياب في الإعلان في صورة ملك روماني بيتفرج على ماتش مصارعة، وجانبه صندوق مليان كانزات بيبسي مثلج.

بعد كده شاكيرا واللي معاها بيغنوا ”  “Rock you علشان يوقعوا الصندوق اللي جنب الهضبة و يشربوا البيبسي، ولما بينجحوا انهم يعملوا كدا، بيسيب عليهم الأسد بتاعه.

تقريبًا كده الهضبة كان ماضي مع بيبسي انه يعمل إعلان بعد كل أغنية، ودا طبعًا جاي من مبدأ “نفع واستنفع”، الموضوع دا بدأ مع ألبوم “كمل كلامك” وكمل بعد كدا في كذا إعلان، وفي الحقيقة الطريقة دي جابت مع الجمهور أوي.

وأخر حاجة عملها الهضبة مع شركة بيبسي كان إعلان كأس العالم، اللي غنى فيه “الفرحة الليلة”، والإعلان كان تعاون بين فودافون وبيبسي.

إعلان “مياه حياة” – 2010

شركة المياه المعدنية “حياة”، استغلت اهتمام عمرو دياب بشكله وصحته، وقدمته للجمهور كمثال يحتذى به في المحافظة على الصحة عن طريق شرب الميه بتاعتهم.

إعلان موبينيل “غنيلي” – 2013

بعد رحلة كبيرة في إعلانات الميه والحاجة الساقعة، رجع الهضبة تاني لإعلانات المحمول، وده بظهوره في إعلان موبينيل “غنيلي”.

في الإعلان دا الهضبة مبيقولش ولا كلمة، ظهر بابتسامته بس، وقابل الجمهور ده برد فعل سلبي أوي، وحسوا ان نجمهم المفضل عنده نسبة غرور.

إعلان ويسترن يونيون – 2015

استغلته شركة تحويل الأموال العالمية “ويسترن يونيون”، في التسويق ليهم، باعتبار ان أي حاجة هيقولها عمرو دياب هتبقى متصدقة، والجمهور هيقلده.

جمع حبايبك – 2019

“جمع حبايبك” أخر إعلانات عمرو دياب مع شركة فودافون، في رمضان 2019، وهو بيحكي جزء من حياة الهضبة، وفيه كمية نوستالجيا عابرة للقارات.

اقرأ أيضًا: رمضان 2019 على الراديو.. هتسمع إيه؟؟🔊🎙

بس الحقيقة الإعلان رغم الضجة اللي عاملها في يومين بس من ظهوره على التلفزيون، ناس كتير بردو عندها علامات تعجب واستفهام عليه.