fbpx

الحلقة الرابعة من GOT.. أدرينالين وسيروتونين وأشياء أخرى

استحوذ Game of thrones على دماغ ناس كتير من بداية ظهوره، وكل يوم كان بيزيد عدد متابعيه، لحد ما وصل إلى حوالي مليار  مشاهد حول العالم للموسم الثامن والأخير.

أول 3 حلقات من الموسم الأخير…

عجبوا ناس كتير، حتى لو الحلقة اللي فاتت كان عليها شوية ملاحظات عند ناس معينة، بس ده ماكنش حالة عامة.

Game of thrones

الحلقة الرابعة بقى من الموسم الثامن والأخير…

خدعت ناس كتير، وأحبطت توقعاتهم، وتقريبًا هي أخدت أقل تقييم بالمقارنة مع الحلقات اللي قبلها.

اقرأ أيضًا: جيم اوف ثرونز الموسم الثامن.. كل اللي عايز تعرفه عن المسلسل

بـ تبدأ الحلقة من حيث انتهت المعركة، من وينترفيل، بـ مشاعر متضاربة من الحزن وتوديع الموتى، والفرحة والاحتفال بالانتصار.

دانيرس تودع جوارا مورمنت اللي لسه واخده بالها انه بيحبها بعد ما مات، وسانسا بتودع ثيون جيريجوي اللي كلنا زعلنا عليه وأثر فينا جدا.

Game of thrones

بعد كدا بـ يبتدي الاحتفال، أكل وشرب بيرة ورقص، ولا كأن حد مات وزعلنا عليه.

في الوقت ده بـ تستغل دنيريس الأجواء والفرحة وبتعلن تولية جيندري ابن روبرت براثيون كـ ملك على “ستورمز إند” قدام كل الحاضرين اللي بـ يحتفلوا بالخبر، وهما بـ يحتفلوا بالانتصار، ويارب كتر أفراحنا.

في بقى كلام كتير محدش عارف هو حقيقة ولا خيال ولا اشاعات، المهم ان بـ يقول ان في المشهد ده بتظهر كوباية قهوة لـ “ستار باكس” بالغلط قدام دانيريس.

واتريّق ناس كتير على الخطأ ده، وفيه ناس ما أخدتش بالها أصلا من الموضوع، بس مسلسل بـ العظمة دي وارد جدًا انه يبقى في خطأ حتى لو بالسذاجة دي، مفيش عمل كامل ياعني، فممكن نعديها.

اقرأ أيضًا: بتحب الأكشن؟ اعرف أفضل الأفلام في 2019

وقتها بـ تلاحظ التوتر اللي بـ يحصل، دانيريس بـ تقلق لأنها بعد ما وفت بـ كلمتها وحاربت مع الشمال…

وفيه شك انهم ممكن مايحاربوش معاها، وقلقانه أكتر من جون سنو لياخد العرش منها، وعلشان كانت بـ تتوسل ليه يحفظ سر انه من تارجيريان.

بـ يتحركوا بالجيش بعد ما يتفقوا انهم هـ يروحوا علشان يسترجعوا العرش من سيرسي، فـ يهاجمهم يورون جراجوي بـ السفن بتاعته ودانيرس تخسر تنين تاني وتخسر ميساندي اللي سيرسي خلت ذا ماونتن يدبحها قدامهم، وندخل في مآسي تاني في أخر الحلقة.

Game of thrones
Game of thrones

Game of thrones
Game of thrones

الفكرة بقى ان الحلقة مكنش فيها أحداث كتير، مش زي ما الجمهور متعود منهم، بس هي كانت مليانة مشاهد عظيمة جدًا.

مشهد الحوار بين تريون و فاريس اللي فكرنا بـ حوارات قديمة واللورد بيليش.

مشهد تورمند و ذا هاوند اللي كفيل يضحكك مهما كانت حالتك المزاجية.

Game of thrones
Game of thrones

مشهد جيمي مع براين وهو رايح لسيرسي وسابها بتعيط، بس الأكيد ان الحلقة دي تمهيد للحلقة الخامسة واللي كل الناس مستنينها من دلوقتي، لأنهم قدروا فعلا يخلونا نـ ترقب الأحداث.

Game of thrones
Game of thrones

الكل مستني رد فعل دانيريس، هـ تعمل ايه…

هل تضحي باسمها كمحررة العبيد؟ وتحرق الكينجز لاندنج بسيرسي والناس اللي فيها؟، ولا هـ يبقى في خطة يمشوا عليها؟.