شريف مدكور يعترف انه تسبب في إصابة نفسه بفيروس في الدم!

 الاعلامي شريف مدكور اعلن من خلال فيديو لايف نشره على حسابه على فيسبوك انه أصيب بفيروس في الدم، وأكد ان الإصابة دي جت له بسبب إهماله اتباع تعليمات الدكارتة، خاصة أنه كان بـ ياخد علاج كيماوي بعد استئصاله ورم في القولون، واللي تسبب في ضعف مناعته.

شريف مدكور وسرطان القولون

في شهر مايو اللي فات دخل شريف مدكور المستشفى بسبب سرطان القولون، اللي اكتشفه بعد الكشف والتحاليل الفترة اللي فاتت.

انتشرت أخبار كتير بـ تقول ان شريف عنده سرطان في القولون، وهو كان قال ده في فيديو على السوشيال ميديا، وكمان في البرنامج بتاعه “4 شارع شريف” اللي بيتذاع على قناة الحياة.

شريف بعد ما اكتشف ان عنده المرض ده، بدأ في رحلة علاج في مستشفى “دار الشفا”، ودا قبل العملية اللي المفروض هيعملها خلال شهر رمضان، زي ما قال.

شريف مدكور بـ يتعالج في المستشفى زيه زي أي حد

وفي الوقت اللي بيتعالج فيه بـ “دار الشفا”، نشرت صفحة على فيسبوك اسمها “أطباء مصر” صورة لـ شريف مدكور في المستشفى، يظهر في برواز من البلالين المبهجة، وشايل ورد في ايده، وعليها كلام لدكتور أشرف طويلة.

“دار الشفا” في الحقيقة هي مستشفى حكومة تبع هيئة الأمانة التعليمية بوزارة الصحة، وشريف قرر يتعالج فيها، علشان يبقى زيه زي أي حد، وعلى حسب ما قال البوست، فكل الأطباء والتمريض في المستشفى بيشهدوا لأخلاق شريف مدكور وأدبه في التعامل.

كمان الصفحة قالت، إن شريف مريض عادي زي كل المرضى في المستشفى، “محجوز في أوضة بيتعامل بسعة صدر مع أي بني آدم و أي إجراء طبي، ومابيحرجش حد ومابيملش من زيارات الناس”.

وكملت: “محجوز في أوضة جنبه عيانين تانيين والله عادي.. فمعلش حزب النكد، و ائتلاف شباب إشمعنا ولا عشان هو شريف!، و جمعية محبي الحسبنة يعذرونا في البالونتين اللي إتحطوا قدام باب أوضته”.

اقرأ أيضًا: أول ظهور لمحمد صلاح بعد الإصابة الخطيرة

هزار وقعدة جميلة

الدكتور أشرف، صاحب البوست، قال إن تجربة شريف مدكور في التعامل مع مرضه تجربة جميلة، ممكن تبقى رسالة أمل لجميع مرضى الأورام ويكلم الناس عنها”.

وضاف: “ناس كتير الكلمه بتفرق معاها حتى لو كان مجرد تخفيف، كمان دعا ان ربنا يتم شفاه على خير، ويرزق الناس البصيرة علشان ميتسرعوش في الحكم على البشر من غير ما يتعاملوا معاهم”.

وطلب من الناس في آخر البوست، انهم يدعوا لشريف وكل اللي زيه، وقال: “وادعو تجربة دار الشفا تتعمم في كل مستشفي حكومي في مصر نفسي كل مريض يتعامل كده و أفضل والله أو علي الأقل يكون في خدمة آدمية كأبسط حقوقك كمريض”.

وقال كمان إن “مستشفيات حكومية كتير فيها مهارة بشرية عالية، لكن ينقصها إمكانيات وسيستم محترم يراعي المريض والطبيب ويحسن من كفاءة الخدمة الصحية”.