إزاي تتفرج على مسلسلات رمضان 2019 في الامتحانات؟

مسلسلات رمضان 2019 غير أيّ سنة، خصوصًا وانها جايّة مع فترة امتحانات سواء لـ الناس اللي بـ تدرس في الجامعة، أو الطلبة اللي هـ يمتحنوا ثانوية عامة، وما أدراك ما الثانوية!

وطبعًا شهر رمضان، يعني حاجات كتير، من ضمنها التليفزيون.. برامج ومسلسلات وإعلانات كمان، النجوم بـ يقعدوا السنة كلها يـ حضروا هـ يعملوا إيه في رمضان، واحنا بـ نستنى نـ شوف الجديد…

بس إزاي هـ نعرف نتفرج ونتبسط في رمضان؟!

اختار حاجات معنية

ما تتفرجش على كل حاجة في رمضان، عشان مافيش وقت قُدامك تـ شوف كل حاجة أصلًا.

مسلسلات قليلة

رمضان 2019 مسلسلاته أقل من رمضان السنة اللي فاتت، وده هـ يساعدك تختار وتتفرج بـ روقان.

المُذاكرة والفُرجة

ثبّت وقت مُعين لـ المذاكرة، ووقت معين لـ الفُرجة.. يعني مثلا لو هـ تذاكر بالليل، اتفرج على المسلسلات أو البرامج الصبح.

ما تتفرجش على التليفزيون

الفُرجة على التليفزيون بقت مملة عشان كميّة إعلانات رهيبة بـ تتذاع في رمضان وبـ تضيَّع وقت كبير من يومنا خصوصًا بعد الفطار.

اقرأ أيضًا: نجوم رمضان 2019.. مين الفنان اللي مستني تتفرج على مسلسله؟

اليوتيوب حلو

اتفرج على اليويتوب، هـ تلاقي وقت المسلسل أقل، وتقدر توقف وتشغل زي ما تحب.

حمّل الحلقة

اتفرج وقت ما تحب في الميعاد اللي يناسبك، ويوتيب بـ سمح لك تحمّل أي فيديو عشان تعرف تتفرج عليه في الوقت اللي تختاره، يعني مافيش حِجة إنك تنظم مواعيدك.

شوف حلقتين في ساعة

انت النهارده ممكن تذاكر من غير ما تـ شوف أي حاجة، بس في اليوم اللي بعده، ممكن تتفرج على حلقتين ورا بعض على يوتيوب، مش هـ يعدوا الساعة تقريبًا، وبعدين تكمل مذاكرة عادي.

شوف ملخصات البرامج

مش لازم تتفرج على كل برامج رمضان خصوصًا انها بقت مملة شوية، ممكن تـ شوف الملخصات بتاعتها على يوتيوب، أو تـ شوف حلقات النجوم اللي بـ تحبهم بس.

ما تتفرجش على أكتر من مسلسلين!

افتكر انك بـ تمتحن، وان ما ينفعش تـ شوف كل حاجة، حاول ما تتفرجش على أكتر من حاجتين في رمضان، عشان تنجح ‍♀️