7 اختراعات من وكالة NASA الفضائية بـ نستخدمها في حياتنا اليوميّة

وكالة ناسا – NASA هيّ أهم مؤسسة متخصصة في علوم الفضاء، أسستها الولايات المتحدة الأمريكية سنة 1958 بـ هدف ارسال البشر إلى خارخ كوكب الأرض.. وفعلًا ناسا نجحت في كتير من رحلاتها الفضائية وأشهرها رحلة رائد الفضاء “نيل آرمسترونج” اللي كان أول إنسان يحط رجله على القمر.

اقرأ أيضًا: أغرب ما شاهده رواد الفضاء خارج كوكب الأرض

ورغم إننا مالناش علاقة بـ ناسا ولا بـ رواد الفضاء، لكن أي اختراع جديد بـ تعمله ناسا، بـ يأثر في حياتنا اليوميّة، وكتير من المنتجات اللي بـ نستخدمها في حياتنا، ناسا لها الفضل الأول فيها.

لكن إيه هيّ اختراعات ناسا اللي بـ نستخدمها؟

 

فلتر الميّة

مبدئيًا كده لو عندك فلتر في البيت بـ تشرب منه كل يوم، لازم وانت بـ تشرب تشكر “ناسا”، عشان هيّ اللي لها الفضل في ظهور وانتشار الاختراع ده في حياتنا.

ناسا في أبحاثها اكتشفت إن رواد الفضاء محتاجين دايمًا جهاز ينقي الميّة اللي بـ يشربوها، وعشان كده فكروا في الاختراع ده اللي بقى جزء أساسي من ملايين البيوت في العالم حاليًا.

أكل الأطفال

غالبًا أكلت النوع ده من الأكل وانت صغير، وهو الأكل اللي المخصص للرُضَّع، وبـ يكون في علب أو برطمانات إزاز (زي ما واضح في الصورة).

ناسا هيّ اللي ابتكرت النوع ده من الأكل، بعد ما اكتشفت إن ماينفعش رواد الفضاء ياكلوا الأكل بنفس الهيئ’ العادية بتاعته، فـ ابتكروا النوع ده بحيث يكون سهل هضمه وأكله، وفي نفس الوقت بـ يحتوي على كل مكونات الأكل الأساسية اللي محتاجها الجسم.

نظّارات مش قابلة للخدش

لو كنت بـ تقرا المقال ده وانت لابس نظّارتك المصنوعة من بلاستيك مش قابل لـ الخدش، فـ لازم تشكر ناسا، لأنها ليها الفضل في ظهور الابتكار ده.

ناسا اكتشفت إن ماينفعش رواد الفضاء يكونوا بـ يستعملوا البلاستيك العادي اللي بـ يتعرّض بـ سهولة لـ الخدش، وعشان كده ابتكروا نوع جديد، بقى موجود في حياتنا اليوميّة.

تقويم الأسنان الشفّاف

لو عانيت وانت صغير من تقويم الأسنان التقليدي اللي بـ يشوّه شكل الأسنان، فـ لازم تعرف إن ناسا اخترعت تقويم شفّاف، مختلف تمامًا عن العادي ومش بـ يبان.

الأطراف التعويضيّة

فقدان أي طرف من أطراف الجسم بـ تكون مشكلة، وبـ تغيَّر من شكل حياتنا، لكن بفضل ناسا، بقى في حاجة اسمها طرفغ صناعي تعويضي، بـ ستعمله الإنسان اللي فقد دراعه أو رجله.

الطرف بـ يكون مزوّد بـ نظام دقيق وعضلات صناعية عشان تقدر تعوّض الفقد اللي حصل.

الاتصالات والأقمار الصناعية

تخيَّل لو ناسا ما كانتش بذلت مجهود وتفكير في ابتكارات الاتصالات والأقمار الصناعية، كان هـ يبقى ماعندناش أي تقدم تكنولوجي في الاتصالات أو في التواصل مع باقي الدول البعيدة.

اقرأ أيضًا: احصل على 320 ألف جنيه مقابل النوم ومشاهدة أفلام لمدّة شهرين

سمّاعات الأذن الدقيقة

الابتكار ده مهم جدًا لـ الأشخاص اللي بـ يعانوا من ضعف السمع، لأنه بـ يقدر يزيد من حجم الترددات الصوتية و بـ كده الشخص بـ يقدر يسمع أفضل وبـ شكل طبيعي.