نهاية شهر فبراير اللي فات أعلن الاتحاد الدولي لـ لملاكمة عن السماح لـ اللاعبات المسلمات بـ ارتداء الحجاب أثناء المشاركة في البطولات الدولية الرسمية، ورحب بـ القرار الدول الإسلامية والعربية اللي عندها عدد من اللاعبات اللي بـ يلعبوا وهما لابسين الحجاب.
اقرأ أيضًا: مَدرسة في نيوزيلندا تمنع البنات من لبس الحجاب.. والسبب؟
“صفية سيد” تعتبر من أوائل اللاعبات المسلمات في رياضة الملاكمة اللي لبسوا حجاب.
بـ تقول إنها عايزة تكسر الشكل النمطي لـ لاعبات الملاكمة عن طريق اللعب بـ ارتداء الحجاب، استغلالًا لـ القرار الأخير لـ الاتحاد الدولي.
“صفية” اللي عندها 18 سنة هيّ بنت مسلمة من “برادفورد” في إنجلترا، دخلت عالم الملاكمة كـ هاوية وبقت دلوقتي من أفضل اللاعبات وبـ تحلم توصل للأولمبياد وتكون أول محجبة تشارك في أعمل بطولة رياضية على كوكب الأرض.
قبل دخولها عالم الملاكمة كانت بـ تعاني من مرض مجهول أفقدها الشهيّة وقعدت حوالي سنة كاملة في السرير بـ تعاني من المرض وفقدت كتير من وزنها خاصًة وإنها كانت بـ تاكل ثمرة موزة واحدة في اليوم لـ عدم رغبتها في الأكل.
وهيّ في سرير المرض كانت بـ تخطط لـ عمل حاجات كتير في حياتها بعد ما تبقى كويسة، ومن بين الحاجات دي إنها تلعب ملاكمة.
وفعلًا حقَّقت حلمها وبقت تـ تدرب مرتين في اليوم في أكاديمية “لايت أوت” للملاكمة في برادفورد بـ إنجلترا.
لمّا سألوها عن علاقتها بـ الملاكمة، قالت: “الملاكمة بـ تخليني مبسوطة.. بدأتها كـ تسلية فقط، لكن حبيتها جدًا”.
اقرأ أيضًا: جيسي عبدو عن مقابلتها لـ “محمد صلاح”: مش أنا اللي حضنته
وبـ تضيف صفية: “كنت قلقانة شوية في البداية عشان أنا بنت مُحجبة ودي حاجة مش مألوفة في صلات الملاكمة.. الناس ما اتعودتش على كده.”.
“لكن الحقيقة كل الناس كانوا لطيفين وداعمين، ماحدش كان بـ يفكر أنا لابسة حجاب ولا لأ وبـ يتعاملوا معايا بشكل طبيعي.. وأنا كمان بقيت بـ انسى إني لابسة حجاب”.
مواضيع ذات صلة:
في مايو من عام 2107، دخلت الأميركية “أميّة ظافر” التاريخ بعد ما بقت أول بنت في لعبة الملاكمة تشارك في مباراة رسمية وهيّ لابسة الحجاب، وده بعد ما نجحت في الضغط على الاتحاد الأميركي لـ الملاكمة، وقدرت تغير القوانين لـ صالحها.
Comments
Loading…