من هي فتحية نكروما المصرية التي تزوجت رئيس غانا؟

المصريات دايمًا ليهم دور كبير في السلطة في مصر، من أول الملكة حتشبسوت، لحد الملكة نازلي زوجة الملك فؤاد ووالدة الملك فاروق.

لكن مين هيّ فتحية نكروما اللي اتجوزت رئيس غانا؟

اسمها “فتحية حليم”، هيّ بنت مصرية اتولدت في القاهرة سنة 1932، وكانت الابنة الثالثة من 5 أبناء لـ والدها اللي كان شغال موظف في مصلحة التليفونات المصرية، ومات وهى فى سن الـ13.

في الخمسينيات كانت علاقة مصر بـ دولة غانا قويّة، وكان دايمًا في اجتماعات بين السياسي الغاني “كوامي نكروما”.

زادت العلاقة قوة بعد ما تمكنت غانا من الاستقلال عن الاحتلال البريطاني بقيادة “نكروما” اللي بقى رئيس الحكومة، ورئيس الدولة فيما بعد.

تعميق العلاقات

رئيس حكومة غانا “نكروما” كان عايز يعمَّق العلاقات المصرية الغانية، عن طريق الزواج من ست مصرية، وبلّغ رغبته دي لـ السلطة في مصر، واللي رحبت جدًا بالفكرة وبدأت تساعده.

الباحث أسامة عبد التواب قال في كتابه “مصر وغانا” إنّ السلطة في مصر كلّفت شخص اسمه” صالح السنارى” وهو راجل أزهرى مصري، كان عايش فى غانا وصديق “نكروما” إنه يساعده في اختيار عروسته.

جمعت السلطة في مصر 5 صور لبنات مصريات، واختار رئيس حكومة غانا “فتحية”.

أم فتحية رفضت الجوازة

ومن هنا بدأت خطوات الزواج، لكنها ماكانتش سهلة خصوصًا إن والدة فتحية كانت رافضة الطريقة دي، وفضلت رافضة الجوازة!

وكان أحد أسباب رفض الأم، ان مافيش خطوط طيران بين مصر وغانا في الوقت ده، لمن نكروما وجمال عبدالناصر وعدوها إنه هيكون في مطار وخطوط طيران وسفارة لـ غانا في مصر.