أخبار الخطوبة والجواز عن طريقة لعبة PUBG بقت شبه يوميّة، كل شويّة نـ لاقي اتنين لعبوا مع بعض كام جيم ويـدخلوا في علاقة وبعدين يعلنوا خطوبتهم أو يتجوزوا.
الموضع واضح انه ماشي كويس مع المصريين، وبعد ما كان موضوع الارتباط عن طريق بابجي مُجرّد إفيه وكوميكس على فيسبوك والسوشيال ميديا، اتحول لـ حقيقة الفترة الأخيرة.
المرة دي إحنا قصاد خطوبة جديدة، أحمد كان يعرف زميلته شريهان من سنتين، ولما لعلوا PUBG وقعوا في حب بعض، هو حَس إنها بنته اللي بـ يخاف عليها لا تضرب بـ النار أو تـ موت في اللعبة، وهيّ حَست بـ حنيته وخوفه عليها طول الوقت، ومن هنا بدأت القصة.
اقرأ أيضًا: الكلام جاب بعضه واتخطبوا من على لعبة PUBG.. ممكن تتجوز بنفس الطريقة؟
بـ تقول شريهان: “من حوالي سنتين اتعرفت على أحمد في الشغل، كان زميلي عادي.. بعد كدا في لعبة ظهرت اسمها بابجي، أنا ماليش في ألعاب الإنترنت قوي، بس لقيت زمايلي كلهم بيلعبوا، وكان عندي فضول ألعب، كنت دايمًا في التيم بتاع أحمد، ولما كان أي حد يضرب نار عليا كنت ألاقي أحمد يجي يحميني، ولما كنت أدوّر على سلاح، ألاقي أحمد يساعدني ويديني سلاح، وكل ما أقرب أموت، أنادي على أحمد يجي يساعدني أعيش.. هو الوحيد في التيم اللي كان بيحترمني ويحسسني بكياني في اللعبة”.
حبيتي إيه في أحمد يا شريهان؟
بـ تقول شريهان إنها حَبت في أحمد إنها كل ما تنادي عليه تـ لاقيه في ضهرها، بـ يجري معاها، ولما الزون يـ قفل يـ جري عليها ويموت معاها.. “في مرة كنت بموت خلاص وهو مش عارف ينقذني، فـ قرر ينتحر عشان يموت معايا وندخل نلعب تاني مع بعض.. ومن هنا بدأت قصة الحب والحمد لله”.
أحمد كمان حكى قصة حبهم، وقال: “أنا أعرف شريهان في الشغل من سنتين، ولما سابت الشغل ماكناش بنتكلم كتير، لحد ما عرفت إنها عندها مشاكل، فقلت لازم أسأل وأقف جنبها لو محتاجة حاجة، وابتديت الفترة دي أحن، لحد ما نزلت هيّ اللعبة وبقينا نلعب سوا، وارتبطنا، وبعدين حصلت الخطوبة”.
[yop_poll id=”6″]
Comments
Loading…